Efesliklarga maktub 5 bob

21 Oilaviy munosabatlar haqida nasihatlar.

¹ Xudoning sevikli farzandlari ekansiz, endi Xudodan o‘rnak olinglar.

² Masih bizni yaxshi ko‘rib, biz uchun O‘zini fido qildi va shu yo‘sin Xudoga ma’qul keladigan qurbonlik bo‘ldi. Sizlar ham Iso Masihga o‘xshab, xuddi shunday mehr– muhabbat bilan yashanglar.

³ Sizlarning orangizda fahsh, zinokorlik, ifloslik yoki xasisligu ochko‘zlik hatto tilga ham olinmasin. Bular Xudoning azizlariga munosib emas.

⁴ Shuningdek, orangizda beadablik, nojo‘ya so‘zlaru qo‘pol hazillar ham bo‘lmasin, chunki bunday qiliqlar sizlarga to‘g‘ri kelmaydi. Yaxshisi, Xudoga shukr aytinglar.

⁵ Shuni bilib qo‘yinglarki, hech bir fahshboz, iflos yoki xasisu ochko‘z inson Masihning va Xudoning shohligidan bahramand bo‘lmaydi, chunki aytib o‘tilganlarning hammasi butparastlik bilan tengdir.

⁶ Hech kim sizlarni quruq gaplar bilan aldamasin, chunki o‘sha gunohlar tufayli Xudoning qahr–g‘azabi Unga itoatsiz bandalarning boshiga tushadi.

⁷ Shuning uchun ularga sherik bo‘lmanglar.

⁸ Bir vaqtlar sizlar zulmatga to‘la edingiz, endi esa RabbimizIsoga tegishli bo‘lganingiz uchun nurga to‘ldingiz. Shunday ekan, nurga to‘la insonlar kabi yashanglar.

⁹ Axir, har qanday ezgulik, solihlik va haqiqat nurning samarasidir.

¹⁰ Rabbimizga nima maqbul ekanligini bilishga tirishinglar.

¹¹ Zulmatning besamara ishlarida ishtirok etmanglar, aksincha, ularni fosh etinglar.

¹² Maxfiy ravishda qilinadigan o‘sha ishlar haqida gapirish ham uyatdir.

¹³ Ammo nur porlaganda hamma narsa fosh bo‘lib, ochiq–oshkor ko‘rinadi.

¹⁴ Axir nur hamma narsani ochiq–oydin qiladi–ku! Mana shu sababdan Muqaddas Bitiklarda quyidagicha yozilgan: “Ey uxlayotgan, tur! O‘liklar ichidan tiril! Masih senga nur sochar.”

¹⁵ Shunday qilib, qay tarzda yashayotganingizga diqqat qilinglar. Nodonlar kabi emas, balki donolarday hayot kechiringlar.

¹⁶ Fursatni g‘animat bilinglar, chunki biz yashayotgan bu kunlar yomonlikka to‘la.

¹⁷ Shuning uchun beaql bo‘lmanglar, balki Rabbimiz Isoning irodasi nima ekanligini anglashga harakat qilinglar.

¹⁸ Sharob ichib mast bo‘lmanglar, chunki bu buzuqlikka olib boradi. Aksincha, Muqaddas Ruhga to‘lib– toshinglar.

¹⁹ Birga yig‘ilganingizda sanolar, ruhiy madhiyalaru qo‘shiqlar kuylanglar. Musiqa asboblariyu xonishlaringiz bilan chin yurakdan Rabbimizga hamdlar ayting.

²⁰ Har doim, har bir narsa uchun Rabbimiz Iso Masih nomi bilan Otamiz Xudoga shukr qilinglar.

²¹ Iso Masihni izzat–hurmat qilganingiz uchun bir–biringizga bo‘ysuninglar.

²² Ey, xotinlar, siz Rabbimiz Isoga qanday bo‘ysunsangiz, erlaringizga ham shunday bo‘ysuninglar.

²³ Masih imonlilar jamoatining boshi bo‘lgani kabi, er ham xotinning boshidir. Masih O‘z tanasi bo‘lgan jamoatningNajotkoridir.

²⁴ Jamoat Masihga qanday tobe bo‘lsa, xotinlar ham har jihatdan o‘z erlariga shunday tobe bo‘lishlari kerak.

²⁵ Ey, erlar, Masih jamoatni yaxshi ko‘rib, O‘zini jamoat uchun fido qilganiday, sizlar ham xotinlaringizni shunday yaxshi ko‘ringlar.

²⁶ Masih jamoatni suv va Xudoning kalomi orqali poklab, muqaddas qilish niyatida O‘zini fido qildi.

²⁷ Jamoatni O‘z huzuriga keltirganda, jamoat har qanday g‘ubor, ajin va dog‘dan holi bo‘lib, ulug‘vor, muqaddas va benuqson bo‘lishi uchun Masih shunday qildi.

²⁸ Erlar ham o‘z xotinlarini o‘z tanalarini sevganday sevishlari kerak. O‘z xotinini sevgan erkak o‘zini sevgan bo‘ladi.

²⁹ Hech kim hech qachon o‘z tanasini yomon ko‘rmaydi. Aksincha, uni oziqlantirib, parvarish qiladi. Masih ham O‘z jamoatini xuddi shunday oziqlantirib, parvarish qiladi.

³⁰ Biz Masih tanasining a’zolarimiz.

³¹ Muqaddas Bitiklarda shunday yozilgan: “Shuning uchun erkak kishi ota–onasidan bo‘lak chiqib, xotiniga bog‘lanib qoladi, ikkalasi bir tan bo‘ladilar.”

³² Bu buyuk sirdir, endi Masih hamda jamoatga ham taalluqlidir.

³³ Xullasi kalom, har bir er o‘z xotinini o‘zini sevganday sevsin. Xotin ham erini hurmat qilsin.