Jaratılıs 11 bob
1 Sol waqıtları du'nyadag'ı barlıq adamlar bir tilde so'ylep, birdey so'zlerdi qollanatug'ın edi.
2 Adamlar shıg'ısta ko'ship ju'rgende, Shınar jerinde bir tegislik taptı ha'm sol jerge ornalastı.
3 Adamlar bir-birine: «Kelin'ler, ılaydan gerbish quyıp, olardı otqa pisireyik», – dedi. Olar tastın' ornına gerbish, ılaydın' ornına qara may qollandı.
4 Son'ınan olar: «O'zimizge bir qala qurayıq ha'm to'besi aspang'a jetetug'ın bir minara tiklep, dan'qımızdı shıg'arayıq. Sonda bizler jer ju'zine tarap ketpeymiz», – desti.
5 Jaratqan İye adamlar qurıp atırg'an qalanı ha'm minaranı ko'riw ushın to'menge tu'sti
6 ha'm bılay dedi: «Mine, olar bir xalıq bolıp, bir tilde so'ylegenlikten, usı isti basladı. Bunnan bılay olar oylag'an oyların ju'zege asırmay qoymaytug'ın boladı.
7 Qa'ne, to'menge tu'seyik, olar bir-birin tu'sinbey qalıwı ushın tillerin aralastırıp taslayıq».
8 Solay etip, Jaratqan İye olardı jer ju'zine taratıp jiberip, qala qurılısın toqtatıp tasladı.
9 Sonlıqtan bul qala Babıl dep ataldı. Sebebi Jaratqan İye sol jerde barlıq adamlardın' tillerin aralastırıp taslap, olardı pu'tkil jer ju'zine taratıp jibergen edi.
10 Samnın' shejiresi mınaday: topan suwınan eki jıl o'tkennen son', Sam ju'z jasta bolg'anda, ulı Arpaxshad tuwıldı.
11 Arpaxshad tuwılg'annan son', Sam ja'ne bes ju'z jıl jasadı. Onın' basqa da ulları ha'm qızları boldı.
12 Arpaxshad otız bes jasqa shıqqanda, ulı Shelax tuwıldı.
13 Shelax tuwılg'annan son', Arpaxshad ja'ne to'rt ju'z u'sh jıl jasadı. Onın' basqa da ulları ha'm qızları boldı.
14 Shelax otız jasqa shıqqanda, ulı Eber tuwıldı.
15 Eber tuwılg'annan son', Shelax ja'ne to'rt ju'z u'sh jıl jasadı. Onın' basqa da ulları ha'm qızları boldı.
16 Eber otız to'rt jasqa shıqqanda, ulı Peleg tuwıldı.
17 Peleg tuwılg'annan son', Eber ja'ne to'rt ju'z otız jıl jasadı. Onın' basqa da ulları ha'm qızları boldı.
18 Peleg otız jasqa shıqqanda, ulı Reu tuwıldı.
19 Reu tuwılg'annan son', Peleg ja'ne eki ju'z tog'ız jıl jasadı. Onın' basqa da ulları ha'm qızları boldı.
20 Reu otız eki jasqa shıqqanda, ulı Serug tuwıldı.
21 Serug tuwılg'annan son', Reu ja'ne eki ju'z jeti jıl jasadı. Onın' basqa da ulları ha'm qızları boldı.
22 Serug otız jasqa shıqqanda, ulı Naxor tuwıldı.
23 Naxor tuwılg'annan son', Serug ja'ne eki ju'z jıl jasadı. Onın' basqa da ulları ha'm qızları boldı.
24 Naxor jigirma tog'ız jasqa shıqqanda, ulı Terax tuwıldı.
25 Terax tuwılg'annan son', Naxor ja'ne bir ju'z on tog'ız jıl jasadı. Onın' basqa da ulları ha'm qızları boldı.
26 Terax jetpis jasqa shıqqannan son', onnan İbram, Naxor ha'm Haran degen ullar tuwıldı.
27 Teraxtın' urpaqlarının' tariyxı mınaday: Teraxtan İbram, Naxor ha'm Haran tuwıldı. Al Harannan Lut tuwıldı.
28 A'kesi Teraxtın' ko'zinin' tirisinde, Haran o'zinin' tuwılg'an jeri bolg'an kaldeylerdin' Ur qalasında qaytıs boldı.
29 İbram da, Naxor da u'ylendi. İbramnın' hayalının' atı Saray, al Naxordın' hayalının' atı Milka edi. Milka İskanın' a'kesi Harannın' qızı edi.
30 Saray na'silsiz bolıp, balası joq edi.
31 Terax ulı İbramdı, Harannın' ulı bolg'an aqlıg'ı Luttı ha'm İbramnın' hayalı bolg'an kelini Saraydı alıp, Qanan jerine barıw ushın kaldeylerdin' Ur qalasınan jolg'a shıqtı. Biraq olar Xaran jerine jetkende, sol jerge ornalasıp qaldı.
32 Terax eki ju'z bes jıl o'mir su'rip, Xaranda qaytıs boldı.
