Jaratılıs 12 bob
1 Jaratqan İye İbramg'a: «O'z elin'di, ag'ayin-tuwg'anların'dı ha'm a'ken'nin' u'yin qaldırıp, Men sag'an ko'rsetetug'ın elge bar.
2 Men sennen ullı xalıq do'retemen. Seni jarılqayman ha'm atın'dı ma'rtebeli qılaman. Sen basqalarg'a jarılqaw bolasan'.
3 eni jarılqag'anlardı Men jarılqayman. Seni na'letlegenlerdi Men na'letleymen. Jer ju'zindegi barlıq xalıqlar sen arqalı jarılqanadı», – dedi.
4 İbram Jaratqan İyenin' buyrıg'ı boyınsha jolg'a shıqtı. Lut ta onın' menen birge ketti. İbram Xarannan shıqqan waqıtta jetpis bes jasta edi.
5 Ol o'zi menen birge hayalı Saraydı, inisi Luttı, Xaranda jıynag'an malmu'lkin ha'm xızmetshilerin aldı da, Qanan jerine qaray jolg'a shıqtı. Olar Qanan jerine jetip barg'anda,
6 İbram el boylap ju'rip, Shexemdegi More terebinf tereginin' janına bardı. Sol waqıtları usı elde qanan xalqı jasaytug'ın edi.
7 Sonda Jaratqan İye İbramg'a ko'rinip: «Men bul jerdi senin' urpag'ın'a beremen!» – dedi. İbram o'zine ko'ringen Jaratqan İyege arnap, sol jerde qurbanlıq orın qurdı.
8 Keyin ol Beyt-El qalasının' shıg'ıs jag'ındag'ı tawlı jerge qaray ju'rip, batıs jaqtag'ı Beyt-El qalası menen shıg'ıs jaqtag'ı Ay qalasının' ortasına shatırın tikti. Sol jerde İbram Jaratqan İyege arnap qurbanlıq orın qurıp, Onın' atın aytıp shaqırdı.
9 Son'ınan ol qubla ta'repke, Negebke qaray jolın dawam etti.
10 Sol waqıtta elde ku'shli ashlıq bolg'anlıqtan, İbram waqtınsha jasap turıw ushın Mısırg'a ketti.
11 Olar Mısırg'a jaqınlag'anda, İbram hayalı Sarayg'a bılay dedi: – Men senin' sulıw hayal ekenin'di bilemen.
12 Mısırlılar seni ko'rgende: «Bul onın' hayalı», – dep, meni o'ltirip, al seni tiri qaldıradı.
13 Olarg'a: «Onın' qarındasıman», – dep ayt. Sonda sen sebepli olar mag'an jaqsı qatnasta boladı ha'm men aman qalaman.
14 İbram Mısırg'a kelgende, mısırlılar onın' hayalının' ju'da' go'zzal ekenin ko'rdi.
15 Faraonnın' xızmetkerleri hayaldı ko'rip, faraong'a onın' sulıwlıg'ın maqtap aytıp berdi. Hayal faraonnın' sarayına alındı.
16 Faraon Saray sebepli İbramg'a jaqsı qatnasta boldı. İbram iri ha'm mayda mallarg'a, erkek ha'm urg'ashı esheklerge, qul ha'm shorılarg'a, tu'yelerge iye boldı.
17 Biraq Jaratqan İye İbramnın' hayalı Saray sebepli faraondı ha'm onın' u'y-ishin awır apatlarg'a duwshar etti.
18 Sonda faraon İbramdı shaqırtıp og'an bılay dedi: «Sen nege mag'an bulay isledin'? Ne sebepten mag'an, onın' hayalın' ekenin aytpadın'?
19 Ne ushın onı qarındasım dedin'? Men onı hayallıqqa alayın dep qaldım-g'o. Hayalın'dı al da, ket!»
20 Solay etip, faraon o'z adamlarına İbramdı hayalı ha'm barlıq jıyg'an-tergenleri menen shıg'arıp salıwdı buyırdı.
