Jaratılıs 14 bob
1 Sol waqıtları Shınar patshası Amrafel, Ellasar patshası Aryox, Elam patshası Kedorlaomer ha'm Goyım patshası Tidal birigip,
2 Sodom patshası Berag'a, Gomora patshası Birshag'a, Adma patshası Shinabqa, Seboyım patshası Shemeberge ha'm Bela patshasına, yag'nıy Soar patshasına qarsı urıs ashtı.
3 Al son'g'ı atalg'an bes patsha birigip, Siddim oypatlıg'ında, yag'nıy ha'zirgi O'li ten'iz jaylasqan orında awqam du'zdi.
4 Bul patshalar on eki jıl Kedorlaomerdin' qol astında bolıp, on u'shinshi jılı og'an qarsı bas ko'terdi.
5 On to'rtinshi jılı Kedorlaomer ha'm onın' menen awqamlas bolg'an patshalar kelip, Ashterot-Qarnayımdag'ı refa, Hamdag'ı zuz, ShaweKiryatayımdag'ı em xalıqların,
6 ja'ne de, tawlı Seir jerindegi xor xalqın sho'l shetindegi El-Parang'a deyin qıyratıp, jen'iliske ushırattı.
7 Olar sol jerden izge qaytıp, En-Mishpatqa, ha'zirgi Qadeshke keldi ha'm amaleklerdin' barlıq jerlerin basıp alıp, Xaseson-Tamarda jasawshı amorlardı qıyrattı.
8 Bes patsha – Sodom, Gomora, Adma, Seboyım ha'm Bela, yag'nıy Soar patshaları Siddim oypatlıg'ına shıg'ıp,
9 to'rt patshag'a, yag'nıy Elam patshası Kedorlaomerge, Goyım patshası Tidalg'a, Shınar patshası Amrafelge ha'm Ellasar patshası Aryoxqa qarsı atlandı.
10 Siddim oypatlıg'ında qara may ka'nleri ko'p edi. Sodom ha'm Gomora patshaları qashıp baratırg'anda olardın' adamlarının' geybirewleri sol ka'nlerge tu'sip ketti, al qalg'anları tawg'a qashtı.
11 Jen'gen to'rt patsha Sodom ha'm Gomoranın' pu'tkil baylıg'ın ha'm azıq-awqatların alıp ketti.
12 Olar ja'ne sol waqıtta Sodomda jasap atırg'an İbramnın' inisi Luttı ha'm onın' malmu'lkin de alıp ketti.
13 Ol jerden qashıp qutılg'an bir adam kelip, evrey İbramg'a bolg'an waqıyanı xabarladı. Sol waqıtta İbram Eshkol menen Anerdin' tuwısqanı bolg'an, amor xalqınan bolg'an Mamrenin' terebinf terekligi qasında jasap atır edi. Bulardın' ha'mmesi İbramnın' awqamlasları edi.
14 İbram inisinin' tutqıng'a tu'skenin esitip, u'yinde tuwılıp o'sken, urısqa jaramlı u'sh ju'z on segiz adamdı qurallandırdı da, to'rt patshanın' izinen Dan qalasına shekem quwıp bardı.
15 İbram adamların toparlarg'a bo'lip, tu'nde dushpang'a qarsı hu'jim jasadı ha'm olardı qıyratıp, Damasktin' arqa ta'repindegi Xobag'a shekem quwıp bardı.
16 Ol oljag'a alıng'an pu'tkil mal- mu'likti, inisi Luttı, onın' mal-mu'lkin, hayallardı ha'm tutqın bolg'anlardı qaytarıp alıp keldi.
17 İbram Kedorlaomer ha'm onın' awqamlasları u'stinen jen'iske erisip qaytıp kiyatırg'anda, Sodom patshası onı ku'tip alıw ushın Shawe oypatlıg'ına, yag'nıy Patsha oypatlıg'ına shıqtı.
18 Quday Taalanın' ruwxaniyi bolg'an Salim patshası Melkisedek nan ha'm sharap alıp shıqtı.
19 Ol İbramg'a pa'tiyasın berip, bılay dedi: «Aspan ha'm jerdi jaratqan Quday Taala İbramdı jarılqasın.
20 Dushpanların'dı ta'slim ettirgen Quday Taalag'a alg'ıslar bolsın». Sonda İbram Melkisedekke o'zindegi barlıq na'rselerden u'sir berdi.
21 Al Sodom patshası İbramg'a: – Adamlarımdı mag'an qaytarıp ber, al oljalardı o'zin'de qaldıra ber, – dedi.
22 Biraq İbram Sodom patshasına bılay dedi:
23 – Sen: «Men İbramdı bayıttım», – dep aytıp ju'rmewin' ushın, men Jaratqan İyenin', yag'nıy aspan ha'm jerdi jaratqan Quday Taalanın' aldında sag'an tiyisli hesh na'rseni, ha'tte, bir sabaq ta, ayaq kiyimnin' bawın da almaytug'ınımdı aytıp, ant ishemen.
24 Biraq tek adamlarımnın' iship-jegeni ha'm menin' menen birge urısqa barg'an Aner, Eshkol ha'm Mamrenin' o'z u'lesleri bug'an kirmeydi. Olar o'z u'leslerin alsın.
