Jaratılıs 15 bob
1 Bul waqıyalardan son', Jaratqan İye İbramg'a bılay dep ayan berdi: – Qorqpa, İbram. Men – senin' qalqanın'man. Sag'an beriletug'ın sıylıq og'ada ullı boladı.
2 Biraq İbram bılay dedi: – Quday İye! Sen mag'an ne beresen'? Men ele biyperzentpen-g'o! Menin' u'yim damaskli Eliezerge qaladı.
3 Sen mag'an perzent bermegenin' sebepli, u'yimdegi bir xızmetshim miyrasxorım boladı.
4 Sonda Jaratqan İye İbramg'a: – Senin' miyrasxorın' ol emes, al o'zin'nen tuwılatug'ın balan' boladı, – dedi.
5 Son'ınan İbramdı sırtqa shıg'arıp bılay dedi: – Aspang'a qara! Eger juldızlardı sanay alsan', olardı sanap ko'r. Mine, senin' urpaqların' da sonday ko'p boladı.
6 İbram Jaratqan İyege isendi ha'm Jaratqan İye sol isenimdi a'dillik dep sanadı.
7 Son'ınan Ol İbramg'a: – Bul jerdi sag'an menshik etip beriw ushın, seni kaldeylerdin' Ur qalasınan shıg'arg'an Jaratqan İyen' Men bolaman, – dedi.
8 Biraq İbram Onnan: – Quday İye, bul jerlerdi menshik etip alatug'ınımdı qalay bilemen? – dep soradı.
9 Sonda Jaratqan İye og'an: – Mag'an ha'r birinin' jası u'sh jasar bolg'an qashar, eshki, qoshqar, ja'ne de, bir qumırı ha'm kepterdin' palapanın alıp kel.
10 İbram ha'mmesin alıp keldi ha'm olardı da'l ortasınan bo'lip, bo'leklerdi bir-birine qarama-qarsı qoydı. Al quslardı bo'lmedi.
11 Soyılg'an mallardın' denesine jırtqısh quslar ushıp kelip, qona basladı, biraq İbram olardı quwıp jiberdi.
12 Ku'n batar waqıtta, İbram teren' uyqıg'a ketti. Sonda qorqınıshlı bir qara tu'nek onı qorshap aldı.
13 Jaratqan İye İbramg'a bılay dedi: «Mınanı jaqsı bilip qoy: senin' urpaqların' jat elde kelgindi bolıp jasaydı. Olar to'rt ju'z jıl qulshılıqta bolıp, eziwshilik ko'redi.
14 Biraq Men olardı qul etken xalıqtı jazalayman. Sonnan son', olar sol jerden ko'p mal-mu'lik penen shıg'ıp ketedi.
15 Al sen g'arrılıq da'wranın su'rip, o'lip jerlenesen' ha'm tınıshlıq penen ata-babaların'nın' janına barasan'.
16 Senin' urpaqların'nın' tek to'rtinshi a'wladı g'ana bul jaqqa qaytıp keledi, sebebi amorlardın' gu'nası ele tolıw mo'lsherine jetken joq».
17 Ku'n batıp, qaran'g'ılıq sho'kkende, ishi tu'tep turg'an ıdıs ha'm lawlag'an jalın payda bolıp, bo'lingen mallardın' arasınan ju'rip o'tti.
18 Usı ku'ni Jaratqan İye İbram menen kelisim du'zip bılay dedi: «Men senin' urpaqların'a Mısır da'ryasınan ullı Evfrat da'ryasına shekem sozılg'an jerdi,
19 yag'nıy ken, keniz, qadmon,
20 xet, periz, refa,
21 amor, qanan, girgash ha'm ebus xalıqlarının' jerlerin beremen».
