Jaratılıs 17 bob
1 bram toqsan tog'ız jasta bolg'anda, Jaratqan İye og'an ayan berip: – Men Qu'direti ku'shli Qudayman. Menin' jolım menen ju'r ha'm minsiz bol.
2 Men senin' menen O'z kelisimimdi du'zemen ha'm senin' urpaqların'dı esap-sansız qılıp ko'beytemen, – dedi.
3 İbram et betinen jıg'ıldı. Sonda Quday og'an bılay dedi:
4 – Menin' senin' menen du'zetug'ın kelisimim mınaw: sen ko'p xalıqlardın' babası bolasan'.
5 Endi senin' atın' İbram emes, al İbrayım boladı. Sebebi Men seni ko'p xalıqlardın' babası qılaman.
6 Men senin' na'silin'di sansız etip ko'beytip, sennen xalıqlar do'retemen. Senin' urpag'ın'nan patshalar kelip shıg'adı.
7 Men senin' menen ha'm sennen keyingi urpaqların' menen keleshek a'wladlarg'a o'tetug'ın ma'n'gilik kelisim du'zemen: Men senin' ha'm sennen keyingi urpaqların'nın' Qudayı bolaman.
8 Ha'zir o'zin' kelgindi bolıp jasap atırg'an pu'tkil Qanan jerin sag'an ha'm sennen keyingi urpaqların'a ma'n'gige menshik etip beremen ha'm Men olardın' Qudayı bolaman.
9 Quday İbrayımg'a ja'ne bılay dedi: – Al sen ha'm sennen keyingi urpaqların' Menin' kelisimimdi a'wladlar dawamında saqlawın'ız tiyis.
10 Menin' senin' menen ha'm senin' urpaqların' menen du'zgen kelisimim, yag'nıy sizler orınlawın'ız kerek bolg'an kelisim mınaw: sizlerdin' aran'ızdag'ı ha'r bir er adam su'nnet etiliwi tiyis.
11 Sizler su'nnet etiliwin'iz sha'rt. Su'nnet aramızdag'ı kelisimnin' belgisi boladı.
12 Ha'r bir er bala, sonın' ishinde u'yin'izde tuwılg'an yamasa urpag'ın'ızdan bolmay, qanday da bir shet elli adamnan satıp alıng'an qullar segiz ku'nliginde su'nnet etilsin. Bul a'wladlar boyı dawam etsin.
13 Olar u'yin'de tuwılg'an bolsa da, satıp alıng'an bolsa da, su'nnet etiliwi sha'rt. Denen'izdegi bul belgi Menin' ma'n'gilik kelisimimnin' belgisi boladı.
14 Su'nnet etilmegen ha'r bir erkek o'z xalqı arasınan shıg'arılıp jiberilsin. O'ytkeni ol kelisimdi buzg'an boladı.
15 Quday İbrayımg'a ja'ne bılay dedi: – Endigiden bılay, hayalın'dı Saray dep emes, al Sara dep shaqır.
16 Men onı jarılqayman ha'm ol arqalı sag'an bir ul beremen. Men onı jarılqayman ha'm ol xalıqlardın' anası boladı. Onnan xalıqlardın' patshaları kelip shıg'adı.
17 İbrayım et betinen jıg'ıldı. Ol: «Ju'z jasar g'arrıdan bala tuwıla ma? Toqsan jasar Sara bala tuwa ma?» – dep oylap, ku'lip qoydı.
18 Son' ol Qudayg'a: – Hesh bolmasa, İsmayıl aldın'da aman ju'rgey, – dedi.
19 Sonda Quday og'an bılay dedi: – Yaq, hayalın' Sara sag'an ul tuwıp beredi. Sen onın' atın Isaq dep qoyasan'. Men onın' menen ha'm onın' urpaqları menen ma'n'gilik kelisimimdi du'zemen.
20 Al İsmayılg'a kelsek, senin' ol tuwralı aytqanların'dı esittim. Men onı jarılqap, o'sip-o'ndiremen ha'm urpaqların esap-sansız qılıp ko'beytemen. İsmayıldan on eki ko'sem kelip shıg'adı. Men onnan ullı xalıq do'retemen.
21 Biraq Men O'z kelisimimdi kelesi jılı usınday waqıtta Saranın' tuwatug'ın ulı Isaq penen du'zemen.
22 Quday İbrayım menen so'ylesip bolg'annan keyin, joqarıg'a ko'terilip ketti.
23 İbrayım Qudaydın' aytqanınday, sol ku'ni-aq u'yindegi barlıq erkeklerdi: ulı İsmayıldı, u'yinde tuwılg'an ha'm satıp alıng'an er adamlardın' ha'mmesin su'nnet ettirdi.
24 İbrayım o'zi su'nnet etilgende, toqsan tog'ız jasta,
25 al ulı İsmayıl on u'sh jasta edi.
26 İbrayım ha'm onın' ulı İsmayıl da sol ku'ni-aq su'nnet etildi.
27 Olar menen birlikte İbrayımnın' u'yindegi barlıq erkekler: sol u'yde tuwılg'anlar ha'm shet elli adamlardan satıp alıng'an qullar da su'nnet etildi.
