Jaratılıs 18 bob
1 Ku'nnin' ja'ziyrama ıssı waqtında, İbrayım shatırdın' kirer awzında otırg'an edi. Sonda og'an Mamre terebinf terekligi qasında Jaratqan İye ko'rindi.
2 İbrayım basın ko'terip qarag'anda, qarsı aldında u'sh adamnın' turg'anın ko'rdi. Ol da'rhal otırg'an ornınan ushıp turdı da, olardı qarsı alıwg'a asıqtı ha'm jerge deyin iyilip, ta'jim etti.
3 Son'ınan İbrayım bılay dedi: – Mırzam, eger men miyrimin'izge erisken bolsam, mendey qulın'ızdı shetlep o'tpen'.
4 Ayaqların'ızdı juwıwın'ız ushın az-maz suw aldırayın. Mına terektin' astında dem alın'lar.
5 Mendey qulın'ız ta'repke jolın'ız tu'sken eken, ha'llenip alıwın'ız ushın jeytug'ın bir na'rseler a'keleyin. Son' jolın'ızdı dawam etersiz. Olar: – Yaqshı, o'zin' aytqanın'day qıla ber, – dedi.
6 İbrayım asıg'ıslıq penen shatırg'a, Saranın' qasına kelip, og'an: – Tez sapalı unnan u'sh tabaq qamır iylep, pa'tir pisir, – dedi.
7 Son'ınan İbrayım padag'a juwırıp bardı da, bir jas ha'm jaqsı baspaqtı alıp, onı xızmetshi jigitke berdi. Jigit onı tez tayarlawg'a kiristi.
8 İbrayım qatıq, su't ha'm pisirilgen baspaq go'shin a'kelip, qonaqlardın' aldına qoydı. Olar awqatlanıp otırg'anda, İbrayım olardın' qasında, terektin' astında turdı.
9 Olar İbrayımnan: – Hayalın' Sara qayaqta? – dep soradı. – Usı jerde, shatırda, – dep juwap berdi İbrayım.
10 Sonda olardın' biri og'an: – Kelesi jılı usınday waqıtta Men senin' janın'a so'zsiz qaytıp kelemen, sol waqıtta Sara ullı boladı, – dedi. Al Sara Onın' art betinde, shatırdın' kirer awzında tın'lap turg'an edi.
11 İbrayımnın' da, Saranın' da a'lle qashan jası o'tip, qartayıp qalg'an edi. Sara bala tuwıw jasınan o'tken edi.
12 Sonlıqtan Sara ishinen ku'lip: «Qartayıp qalg'an bolsam, bunday ha'zlikke bo'lene alar ma ekenmen? Onın' u'stine mırzam da qartayg'an», – dep oyladı.
13 Sonda Jaratqan İye İbrayımg'a: – Sara ne ushın: «Men haqıyqattan da, qartayg'anda bala tuwa alaman ba?» – dep ku'ldi.
14 Jaratqan İye ushın mu'mkin emes na'rse bar ma? Men belgilengen waqıtta, kelesi jılı usınday waqıtta janın'a qaytqanımda, Sara ullı boladı, – dedi.
15 Sara qorqıp ketip: – Ku'lgenim joq, – dep o'tirik so'yledi. Biraq Ol: – Yaq, ku'ldin', – dedi.
16 Adamlar sol jerden shıg'ıp, to'menge, Sodomg'a qaray ketti. İbrayım da olardı shıg'arıp salıw ushın birge ju'rdi.
17 Sonda Jaratqan İye bılay dedi: «Men isleyjaq isimdi İbrayımnan jasıraman ba?
18 İbrayımnan ullı ha'm ku'shli xalıq kelip shıg'ıp, jer ju'zindegi barlıq xalıqlar ol arqalı jarılqanatug'ını so'zsiz-g'o.
19 Tuwrı ha'm a'dil islerdi islep, jolım menen ju'riwdi balalarına ha'm urpaqlarına buyırsın dep, Men İbrayımdı tan'ladım. Solay etip, Men og'an bergen so'zimdi orınlayman».
20 Son'ınan Jaratqan İye ja'ne bılay dedi: «Sodom ha'm Gomora sebepli shegilgen nalalar og'ada ko'p ha'm olardın' gu'naları da ju'da' awır.
21 Endi Men to'menge tu'sip, olardın' islegen islerinin' Men esitkendey da'rejede jaman ba ekenligin ko'reyin. Eger olay bolmasa, onı da bileyin».
22 Eki adam burılıp, Sodomg'a qaray ketti. Biraq İbrayım Jaratqan İyenin' aldında turıp qaldı.
23 Son'ınan ol Jaratqan İyege jaqınıraq kelip bılay dedi: – Sen haq adamdı nahaq adam menen birge qırıp taslamaqshımısan'?
24 Mu'mkin, bul qalada eliw haq adam bar shıg'ar? Sen haqıyqattan da, sol jerdi ishindegi eliw haq adam ushın keshirmey, qırıp taslayjaqsan' ba?
25 Bulay islewden awlaq bola go'r! Haq adam menen nahaq adamnın' ta'g'dirin birdey qılıp, haq adamdı nahaq adamg'a qosıp o'ltiriwden awlaq bolg'aysan'! Pu'tkil du'nyanı Hu'kim etiwshi a'dil bolıwı kerek emes pe?
26 Jaratqan İye og'an: – Eger Men Sodomnan eliw haq adam tapsam, olar ushın sol jerdi keshiremen, – dep juwap berdi.
27 Sonda İbrayım dawam etip: – Men topıraq ha'm ku'l sıyaqlı birew bolsam da, ju'rek etip, O İyem, Sag'an so'ylep atırman:
28 eger haq adam eliw bolıwı ushın besewi jetpese, sol besewi ushın Sen pu'tkil qalanı joq etesen' be? – dedi. – Yaq, eger ol jerden qırıq bes haq adam tapsam, onı joq etpeymen, – dedi Quday.
29 İbrayım ja'ne: – Eger ol jerden qırıq haq adam tabılsa she? – dedi. Ol: – Eger qırıq haq adam tabılsa da, olay islemeymen, – dedi.
30 Sonda İbrayım: – O, İyem, aytatug'ın so'zime ashıwlanba, biraq eger ol jerden otız haq adam tabılsa she? – dedi. Quday İbrayımg'a:– Eger ol jerden otız haq adam tabılsa da, olay islemeymen, – dedi.
31 İbrayım tag'ı: – O, İyem, men Sag'an so'ylewge ju'rek ettim: al eger ol jerde tek jigirma haq adam tabılsa she? – dedi. Ol İbrayımg'a: – Jigirması ushın da qalanı joq etpeymen, – dedi.
32 Son'ınan İbrayım bılay dedi: – O, İyem, men ja'ne bir ma'rtebe so'ylesem ashıwlanba: eger ol jerden tek g'ana on adam tabılsa she? Ol: – On adam ushın da qalanı joq etpeymen, – dep juwap berdi.
33 Jaratqan İye İbrayım menen so'ylesip bolg'annan keyin, sol jerden ketti. İbrayım da o'z u'yine qayttı.
