Jaratılıs 19 bob
1 Kesh bolg'anda, eki perishte Sodomg'a keldi. Lut qala da'rwazasının' janında otırg'an edi. Lut olardı ko'rgende, ku'tip alıw ushın ornınan turdı da, man'layı jerge tiygenshe iyilip, ta'jim etti ha'm olarg'a:
2 – Mırzalar, qulın'ızdın' u'yine kirin'ler. Ayaqların'ızdı juwın'lar ha'm bizikinde qonıp qalın'lar. Son'ınan erte azanda turıp, jolın'ızdı dawam etersiz, – dedi. Olar: – Yaq, bizler tu'ndi qala maydanında o'tkizemiz, – dedi.
3 Biraq Lut jalınıp qoymag'anlıqtan, olar Lutqa erip, onın' u'yine keldi. Lut olar ushın awqat tayarladı ha'm ashıtqısız nan pisirdi. Olar awqatlandı.
4 Olar ele jatıp u'lgermey atırıp, Sodom qalasının' ha'mme ta'repinen barlıq erkekler, jaslardan baslap g'arrılarg'a shekem Luttın' u'yin qorshap aldı.
5 Olar Luttı shaqırıp: – Bu'gin keshte sag'an kelgen adamlar qay jerde? Olardı bizlerge shıg'arıp ber, olar menen jatayıq, – dedi.
6 Lut sırtqa shıg'ıp, arqasınan qapını japtı da,
7 olarg'a bılay dedi: – Tuwısqanlar, bunday zulımlıqtı islemen'ler!
8 Minekey, menin' erkek qolı tiymegen eki qızım bar. Men olardı sizlerge shıg'arıp bereyin. Olarg'a qa'legenin'izdi islen'ler. Tek bul adamlarg'a qol tiygizben'ler, o'ytkeni olar u'yimnen baspana tapqan qonag'ım-g'o!
9 Sonda olar: – Ha'y, joldı bosat! O'zin' kelgindi bolıp, qazılıq ta qılmaqshımısan'. Bizler endi sag'an beterin ko'rsetemiz, – dedi de, Luttı bar ku'shi menen iyterip, qapını sındırmaqshı boldı.
10 Biraq ishtegi adamlar qolların sozıp, Luttı u'ydin' ishine kirgizdi de, qapını jawıp tasladı.
11 Al esik aldında turg'an adamlardın' u'lkeni-kishisin soqır etip tasladı. Olar esikti de taba almay qaldı.
12 Son'ınan ishtegi eki adam Lutqa bılay dedi: – Bul jerde basqa kimin' bar? Ku'yew balaların', ulların', qızların' ha'm qalada o'zin'e derek kim bolsa da, ha'mmesin bul jerden alıp shıq.
13 Sebebi bizler bul jerdi joq etpekshimiz. Bul xalıq u'stinen Jaratqan İyege jetip barg'an shag'ımlar ju'da' ko'p. Ol bizlerdi qalanı joq qılıw ushın jiberdi.
14 Lut sırtqa shıqtı da, bolajaq ku'yew balalarına barıp: – Da'rhal bul jerden ketin'ler! O'ytkeni Jaratqan İye bul qalanı joq etpekshi, – dedi. Degen menen, olar Luttı ha'zillesip atır dep oyladı.
15 Tan' atqanda, perishteler Luttı asıqtırıp: – Hayalın'dı ha'm eki qızın'dı al da, tez bul jerden ket! Bolmasa, qala jazalang'anda, sen de birge o'lip ketesen'! – dedi.
16 Al Lut ele ekilenip turg'an edi. Lutqa Jaratqan İyenin' miyrimi tu'skenlikten, perishtelerdin' o'zleri Luttın', onın' hayalının' ha'm qızlarının' qollarınan uslap, qaladan shıg'ardı.
17 Olardı sırtqa shıg'arıwdan-aq, perishtelerdin' biri Lutqa: – Keynin'e burılıp qarama. Bul tegisliklerdin' hesh bir jerinde irkilmey tawg'a qash, bolmasa o'lesen', – dedi.
18 Biraq Lut olarg'a: – Yaq, mırzalar!
19 Mine, qulın'ız bolg'an men sizlerdin' miyrimin'izge eristim ha'm janımdı qutqarıp, u'lken jaqsılıq qıldın'ız. Biraq men tawg'a jete almayman, sebebi apatqa ushırap, o'lip qalaman.
20 A'ne, qashıp jete alg'anday, kishkene bir qala bar eken. Ol kishkene qala-g'o! Men janımdı saqlap qalıwım ushın, sol qalag'a qashıp bara qoyayın, – dep o'tindi.
21 Olardın' biri Lutqa: – Yaqshı, senin' bul tilegin'di de qabıl etemen. Sen aytqan sol qalanı qıyratpayman.
22 Tez sol jerge qashıp bar! O'ytkeni sen sol jerge barıp jetpegenin'she, Men hesh na'rse isley almayman, – dedi. Sol sebepten bul qala Soar dep ataladı.
23 Lut Soarg'a jetip kelgende, a'lle qashan quyash shıqqan edi.
24 Jaratqan İye Sodom ha'm Gomora u'stine aspannan otlı ku'kirt jawdırdı.
25 Ol bul qalalardı, pu'tkil tegislikti, ol jerde jasawshılardın' ha'mmesin ha'm jerdegi barlıq o'simliklerdi joq etti.
26 Biraq Luttın' hayalı artına burılıp qarap, duzg'a aylanıp qatıp qaldı.
27 İbrayım azanda erte turıp, burın o'zi Jaratqan İyenin' aldında turg'an jerge keldi.
28 Ol Sodom menen Gomorag'a ha'm pu'tkil tegislikke qarap, jerdin' pesh sıyaqlı tu'tep turg'anın ko'rdi.
29 Solay etip, Quday tegisliktegi qalalardı qıyratqan waqıtta İbrayımdı eske aldı ha'm Lut jasag'an qalalardı qıyratqanda, Luttı aman saqlap qaldı.
30 Lut Soarda qalıwdan qorqqanlıqtan, eki qızı menen birge qaladan shıg'ıp, tawg'a ketti. Ol eki qızı menen birge bir u'n'girde jasay basladı.
31 Bir ku'ni u'lken qızı kishkenesine bılay dedi: – A'kemiz qartayıp qaldı. Bul du'nyanın' a'deti boyınsha, bizlerge u'ylenetug'ın bul do'gerekte birde bir erkek joq.
32 Kel, a'kemizge sharap ishkizip, onın' menen jatayıq ha'm a'kemiz arqalı na'silimizdi jalg'astırayıq.
33 Olar sol ku'ni tu'nde a'kesine sharap ishkizdi ha'm u'lken qızı a'kesinin' janına kirip, onın' menen jattı. Biraq a'kesi qızının' qashan jatıp, qashan turg'anın bilmedi.
34 Kelesi ku'ni u'lken qızı kishkenesine: – O'tken tu'nde men a'kem menen jattım. Og'an bu'gin tu'nde de sharap ishkizeyik ha'm sen barıp, a'kemiz benen jat. Solay etip, a'kemiz arqalı na'silimizdi jalg'astırayıq, – dedi.
35 Sol ku'ni tu'nde olar a'kesine ja'ne sharap ishkizdi ha'm kishkene qızı a'kesinin' janına kirip, onın' menen jattı. Biraq a'kesi qızının' qashan jatıp, qashan turg'anın bilmedi.
36 Solay etip, Luttın' eki qızı da a'kesinen ha'miledar boldı.
37 U'lken qızı ul tuwıp, og'an Moab dep at qoydı. Ol – ha'zirgi moab xalqının' babası.
38 Kishkene qızı da ul tuwıp, og'an Ben-Ammiy dep at qoydı. Ol – ha'zirgi ammon xalqının' babası.
