Jaratılıs 20 bob
1 İbrayım Mamreden Negeb jerine ko'ship, Qadesh ha'm Shur aralıg'ında jasadı. Son'ınan bir qansha waqıt Gerarda qaldı.
2 Ol hayalı Saranı: «Ol menin' qarındasım», – dedi. Sonlıqtan Gerar patshası Abimelex adam jiberip, Saranı aldırttı.
3 Biraq Quday bir ku'ni tu'nde Abimelextin' tu'sine enip: – Sen bul hayaldı alg'anın' ushın o'lesen', sebebi onın' ku'yewi bar, – dedi.
4 Abimelex ele Sarag'a jaqınlag'an joq edi. Ol: – İyem! Sen ayıpsız adamlardı joq etpekshimisen'?
5 İbrayımnın' o'zi mag'an onı qarındasım dep ayttı-g'o. Hayalı da: «Ol menin' a'jag'am», – degen edi. Bul iste menin' hu'jdanım taza, qollarım da hadal, – dedi.
6 Sonda Quday tu'sinde og'an bılay dedi: «Awa, senin' hu'jdanın'nın' taza ekenin bilemen. Sonlıqtan seni Mag'an qarsı gu'na islewden saqlap, hayalg'a qol tiygiziwin'e jol qoymadım.
7 Al endi hayaldı ku'yewine qaytıp ber. O'ytkeni ol – payg'ambar. Ol sen ushın duwa etedi, sonda sen o'lmeysen'. Biraq bilip qoy: eger sen hayaldı ku'yewine qaytarıp bermesen', onda o'zin' de, barlıq adamların' da o'lesizler».
8 Abimelex azanda erte turdı da, o'zinin' barlıq xızmetkerlerin jıynap, olarg'a bolg'an waqıyanı aytıp berdi. Olar qattı qorqıp ketti.
9 Abimelex İbrayımdı shaqırtıp, og'an bılay dedi: – Sen nege bizlerge bulay isledin'? Meni ha'm menin' patshalıg'ımdı bunday u'lken gu'nag'a batırg'anday, men sag'an ne jamanlıq qılg'an edim? Sen mag'an islewge bolmaytug'ın islerdi isledin', – dedi.
10 Son'ınan ol İbrayımnan: – Bul isti qanday maqsette isledin'? – dep soradı.
11 İbrayım bılay dep juwap berdi: – Men bul jerlerde adamlar hesh Qudaydan qorqpaydı ha'm hayalım ushın meni o'ltiriwi mu'mkin dep oyladım.
12 Haqıyqatında da, ol – menin' qarındasım. Bizlerdin' a'kemiz bir, analarımız basqa bolg'anlıqtan, men og'an u'ylengen edim.
13 Quday mag'an a'kemnin' u'yin qaldırıp, ellerdi geziwdi buyırg'anda, men o'z hayalıma: «Mag'an jaqsılıq isle: qay jerge barsaq ta, meni a'jag'am dep ayt», – dep aytqan edim.
14 Sonda Abimelex İbrayımg'a qoy, sıyır, qul ha'm shorılardı sawg'ag'a berdi. Ol Saranı da qaytarıp berdi ha'm
15 İbrayımg'a bılay dedi: – Menin' jerlerim senin' ko'z aldın'da: qay jerdi qa'lesen', sol jerde jasa.
16 Al Sarag'a bılay dedi: – Minekey, men a'jag'an'a mın' shekel gu'mis berip atırman. Bul janın'dag'ı adamlar aldında senin' namısın'nın' taza ekenin ko'rsetetug'ın da'lil boladı. Ha'mme senin' ayıpsız ekenin'di bilsin.
17 Sonda İbrayım Qudayg'a duwa etti ha'm Quday Abimelexke, onın' hayalına ha'm shorılarına shıpa berdi. Olar ja'ne tuwatug'ın boldı.
18 Sebebi İbrayımnın' hayalı Sara sebepli Jaratqan İye Abimelextin' u'yindegi barlıq hayallardı bala tuwmaytug'ın etip taslag'an edi.
