Jaratılıs 23 bob
1 Sara bir ju'z jigirma jeti jıl o'mir su'rdi.
2 Ol Qanan jerindegi Kiryat-Arbada, yag'nıy ha'zirgi Xebronda qaytıs boldı. İbrayım Sara ushın jılap, aza tuttı.
3 Son'ınan ol hayalının' denesinin' qasınan shıg'ıp, xetlerge:
4 – Men aran'ızda kelgindi ha'm jat adamman. O'z marhumımdı jerlep, mazar qılıwım ushın, jerin'izden mag'an az-maz satın'lar, – dedi.
5 Xetler İbrayımg'a bılay dep juwap berdi:
6 – Mırza, bizlerdi tın'lan'ız. Sen bizlerdin' aramızdag'ı ku'shli bir to'resiz. Marhumın'ızdı qa'birlerimizdin' en' jaqsısına aparıp qoyın'ız. Marhumın'ızdı qoyıwın'ız ushın, bizlerdin' hesh birimiz de qa'birimizdi ayamaymız.
7 Sonda İbrayım sol eldin' xalqı bolg'an xetlerge ta'jim etip
8 bılay dedi: – Eger sizler menin' o'z marhumımdı jerlewime qayıl bolsan'ız, onda meni tın'lap, men ushın Soxardın' ulı Efronnan o'tinish etin'ler.
9 Ol o'z atızının' shetindegi Maxpela u'n'girin mag'an satsın. Sol u'n'girdi mazarg'a aylandırıwım ushın, men sizlerdin' aldın'ızda u'n'girdin' qunın tolıq to'leymen.
10 Xet xalqınan bolg'an Efron o'z xalqının' arasında otırg'an edi. Ol qala da'rwazasının' aldına jıynalg'an barlıq xetlerge esittirip, İbrayımg'a:
11 Yaq, mırzam, meni tın'lan'. Men u'n'girge qosa atızdı da beremen. Men o'z xalqımnın' aldında onı sizge beremen. Marhumın'ızdı jerley berin', – dep juwap berdi.
12 İbrayım sol jerdin' xalqının' aldında ta'jim etti ha'm
13 ha'mmege esittirip, Efrong'a: – O'tinish, meni tın'lan'ız, atız ushın aqsha to'leyin. Onı qabıl etin'. Men marhum hayalımdı sol jerge jerleyin, – dedi.
14 Sonda Efron İbrayımg'a:
15 – Yaqshı, mırzam, meni tın'lan'. Jerdin' bahası to'rt ju'z shekel gu'mis. To'rt ju'z shekel gu'mis turatug'ın bir bo'lek jer bizlerdin' aramızda ne bolıptı? Marhumın'ızdı jerley berin', – dep juwap berdi
16 brayım ırazı bolıp, Efron xetlerdin' aldında esittirip aytqan to'rt ju'z shekel gu'misti sawdada qollanılatug'ın o'lshem boyınsha ta'rezige salıp, o'lshep berdi.
17 Solay etip, Mamrege jaqın jerdegi Maxpelada ornalasqan Efronnın' atızı, ondag'ı u'n'gir ha'm ol jerde o'sip turg'an barlıq terekler
18 İbrayımnın' menshigine aylandı. Bug'an qala da'rwazasının' aldına jıynalg'an barlıq xetler gu'wa boldı.
19 Sonnan keyin, İbrayım hayalı Saranı Qanan jerindegi Mamrege, yag'nıy Xebrong'a jaqın jerdegi Maxpela atızındag'ı u'n'girge qoydı.
20 Solay etip, xetlerden alıng'an atız ha'm ondag'ı u'n'gir mazar sıpatında İbrayımnın' mu'lkine aylandı.
