Jaratılıs 24 bob
1 İbrayım qartayıp, biraz jasqa barıp qalg'an edi. Jaratqan İye onı ha'r ta'repleme jarılqap qoyg'an edi.
2 İbrayım u'yindegi ha'mme na'rseni basqaratug'ın bas xızmetshisine bılay dedi: – Qolın'dı sanımnın' astına qoyıp,
3 aspan ha'm jerdin' Qudayı bolg'an Jaratqan İye haqı ant ishiwin'di qa'leymen: men aralarında jasap atırg'an qanan xalqınan ulıma qız alma.
4 Al ulım Isaqqa qız alıw ushın menin' elime, ag'ayin-tuwg'anlarıma bar.
5 Xızmetshi İbrayımnan: – Eger qız menin' menen birge bul elge keliwdi qa'lemese she? Onda ulın'ızdı o'zin'iz shıg'ıp ketken elge aparıwım kerek pe? – dep soradı.
6 İbrayım og'an bılay dedi: – Yaq, ulımdı hasla ol jerge apara go'rme!
7 Meni o'z a'kemnin' u'yinen, tuwılg'an elimnen alıp shıg'ıp: «Bul jerdi senin' urpaqların'a beremen», – dep ant ishken aspannın' Qudayı Jaratqan İye senin' aldın'nan O'z perishtesin jiberedi ha'm sen sol jerden ulıma qız alıp kelesen'.
8 Eger qız senin' menen birge keliwdi qa'lemese, onda sen mag'an bergen bul antın'nan azat bolasan'. Tek ulımdı ol jerge apara go'rme!
9 Solay etip, xızmetshi xojayını İbrayımnın' sanının' astına qolın qoyıp, aytılg'andı islewge ant ishti.
10 Son'ınan xızmetshi xojayınının' tu'yelerinen onın ha'm ha'r qıylı qımbat bahalı zatlarınan alıp, ju'rip ketti. Ol Aram-Naharayımdag'ı Naxor jasaytug'ın qalag'a jetip keldi.
11 Xızmetshi tu'yelerin qala sırtındag'ı qudıqtın' qasına sho'ktirdi. Bul hayal-qızlar suw alıw ushın shıg'atug'ın keshki payıt edi.
12 Sonda xızmetshi bılay dep duwa etti: «Jaratqan İye, xojayınım İbrayımnın' Qudayı! Bu'gin mag'an a'wmet berip, xojayınım İbrayımg'a jaqsılıq isley go'r!
13 Mine, men qudıq basında turman, qalanın' qızları suw alıwg'a kiyatır.
14 Men qaysı qızg'a: „Gu'zen'di en'keyt, men suw iship alayın“, – degenimde, ol: „İshin'iz, men tu'yelerin'izdi de suwg'araman“, – dese, onda sol qız Senin' qulın' Isaq ushın tan'lag'an qızın' bolsın. Xojayınıma jaqsılıq islegenin'di sonnan bileyin».
15 Xızmetshi ele duwasın tamamlamay atırıp-aq, iynine gu'zesin ko'tergen Rebekka kelip qaldı. Ol İbrayımnın' inisi Naxor menen hayalı Milkanın' ulı Betueldin' qızı edi.
16 Rebekka og'ada sulıw, erkek qolı tiymegen qız edi. Ol qudıqqa qaray to'men tu'sti de, gu'zesin suwg'a toltırıp, joqarı shıqtı.
17 İbrayımnın' xızmetshisi qızdın' aldına juwırıp shıg'ıp: – O'tinish, gu'zen'nen mag'an az-maz suw ber, – dedi.
18 – İshin'iz, mırza, – dep qız da'rhal gu'zesin iyninen tu'sirdi de, og'an ishiwge suw berdi.
19 Qız og'an ishkizip bolıp: – Men tu'yelerin'izdi de sho'li qang'ansha suwg'arıp bereyin, – dedi.
20 Son'ınan qız gu'zesindegi qalg'an suwdı nawag'a quyıp bosattı da, ja'ne suw tartıp shıg'arıw ushın qudıqqa qaray juwırıp ketti. Solay etip, ol xızmetshinin' barlıq tu'yelerin suwg'ardı.
21 Al xızmetshi bolsa, Jaratqan İyenin' jolın a'wmetli qılg'an yamasa qılmag'anın biliw ushın, qızg'a dıqqat qoyıp, u'nsiz qarap turdı.
22 Tu'yeleri suw iship bolg'annan son', ol qızg'a awırlıg'ı yarım shekel shıg'atug'ın altın a'rebek ha'm on shekel shıg'atug'ın eki altın bilezik berdi.
23 Son'ınan ol qızdan: – Aytshı, kimnin' qızısan'? Bizlerdin' tu'nep shıg'ıwımız ushın a'ken'nin' u'yinen orın tabıla ma? – dep soradı.
24 Son'ınan ol qızdan: – Aytshı, kimnin' qızısan'? Bizlerdin' tu'nep shıg'ıwımız ushın a'ken'nin' u'yinen orın tabıla ma? – dep soradı.
25 Bizde saban da, jem de ko'p, tu'new ushın orın da bar, – dep juwap berdi.
26 Sonda xızmetshi ta'jim etip, Jaratqan İyege sıyındı da:
27 «O'z miyrimsha'pa'a'tin ha'm sadıqlıg'ın xojayınımnan ayamag'an İbrayımnın' Qudayı – Jaratqan İyege alg'ıslar bolsın. Ol meni tuwrı xojayınımnın' ag'ayintuwg'anlarının' u'yine baslap keldi», – dedi.
28 Qız anasının' u'yine juwırıp barıp, bolg'an waqıya haqqında aytıp berdi.
29 Rebekkanın' Laban degen a'jag'ası bar edi. Ol qudıq basında turg'an adamg'a qaray juwırıp ketti.
30 Laban qarındasının' murnındag'ı a'rebekti, qollarındag'ı bileziklerdi ko'rip, Rebekkadan ol adamnın' o'zine ne aytqanın esitkende, da'rhal sol adamnın' janına ketken edi. Al sol adam qudıq basında, tu'yelerdin' janında turg'an edi.
31 Laban og'an: – U'yge ju'rin', Jaratqan İye jarılqag'an bende! Nege sırtta turıpsız? Men o'zin'iz ushın bo'lme, tu'yelerin'iz ushın orın tayarlap qoydım, – dedi.
32 Solay etip, xızmetshi u'yge kirdi. Laban tu'yelerdin' ju'klerin tu'sirtip, aldına saban ha'm jem saldırdı. Xızmetshinin' ha'm onın' janındag'ılardın' ayaqların juwıw ushın suw a'keldirdi.
33 Aldılarına awqat qoyılg'anda, xızmetshi: – Men ne ushın kelgenimdi aytpay turıp, awqat jemeymen, – dedi. – Meyli, aytın', – dedi olar.
34 Sonda xızmetshi bılay dedi: – Men İbrayımnın' xızmetshisimen.
35 Jaratqan İye xojayınımdı molmol etip jarılqap, onı bayıttı. Og'an qoy ha'm sıyırlar, gu'mis ha'm altınlar, qul ha'm shorılar, tu'ye ha'm eshekler berdi.
36 Xojayınımnın' hayalı Sara qartayg'an shag'ında og'an ul tuwıp berdi. Xojayınım o'zinin' barlıq malmu'lkin ulına tapsırdı.
37 Xojayınım mag'an ant ishtirip: «Ulıma men jerinde jasap atırg'an qanan xalqının' qızlarınan emes,
38 al menin' ata jurtıma, ag'ayin-tuwg'anlarıma barıp, sol jerden qız alıp beresen'», – dedi.
39 Men xojayınımnan: «Eger ol qız menin' menen keliwdi qa'lemese she?» – dep soradım.
40 Sonda ol mag'an: «Men Jaratqan İyenin' jolı menen ju'rmen. Ol O'z perishtesin senin' menen birge jiberip, jolın'dı beredi. Sen ag'ayin-tuwg'anlarımnan, ata jurtımnan ulıma qız alıp kel.
41 Eger sen ag'ayin-tuwg'anlarıma barg'anın'da, olar sag'an qızın bermese, onda sen ishken antın'nan azat bolasan', awa, sen usınday jag'dayda ishken antın'nan azat bolasan'», – dedi.
42 Solay etip, men bu'gin qudıq basına kelgenimde: «Jaratqan İye, xojayınım İbrayımnın' Qudayı! O'tinemen, jolımdı bere go'r!
43 Ha'zir men qudıq basında turman. Eger men suw alıwg'a kelgen qızlardın' birine: „O'tinish, gu'zen'nen mag'an az-maz suw ber“, – desem,
44 ol mag'an: „İshin'iz, men tu'yelerin'izdi de suwg'araman“, – dep aytsa, Jaratqan İyenin' xojayınımnın' ulı ushın tan'lag'an qızı sol bolsın», – dep duwa ettim.
45 Men ele ishimnen duwa etip turg'anımda, iynine gu'zesin ko'terip, Rebekka sırtqa shıqtı. Ol to'men tu'sip, qudıqtan suw aldı. Men og'an: «O'tinish, mag'an ishiwge suw ber», – dedim.
46 Rebekka da'rhal iyninen gu'zesin tu'sirip: «İshin'iz, men tu'yelerin'izdi de suwg'araman», – dedi. Solay etip, men suw ishtim, ol tu'yelerimdi suwg'ardı.
47 Men onnan: «Kimnin' qızısan'?» – dep soradım. Ol mag'an: «Men Milkanın' Naxorg'a tuwıp bergen ulı Betueldin' qızıman», – dedi. Sonda men onın' murnına a'rebek, qollarına bilezik taqtım.
48 Son' ta'jim etip, Jaratqan İyege sıyındım. Xojayınımnın' ulına inisinin' aqlıq qızın alıw ushın mag'an tuwrı joldı ko'rsetken xojayınım İbrayımnın' Qudayı – Jaratqan İyege alg'ıslar ayttım.
49 Endi sizler xojayınıma jaqsılıq islep, sadıqlıq ko'rsetpekshi bolsan'ız, mag'an aytın'lar, eger qa'lemesen'iz, onı da aytın'lar, men ne isleytug'ınımdı shesheyin.
50 Laban menen Betuel bılay dep juwap berdi: – Bul – Jaratqan İyenin' isi. Bizler sag'an jaqsı-jaman, hesh na'rse ayta almaymız.
51 Mine, Rebekka, onı alıp kete ber. Jaratqan İyenin' aytqanınday, ol senin' xojayının'nın' ulına hayal bolsın.
52 İbrayımnın' xızmetshisi bunı esitkende, jerge deyin iyilip, Jaratqan İyege sıyındı.
53 Son'ınan xızmetshi gu'mis ha'm altın zatlardı, kiyimlerdi shıg'arıp, Rebekkag'a berdi, ja'ne de, onın' a'jag'ası menen anasına da qımbat bahalı sawg'alar berdi.
54 Son'ınan xızmetshi ha'm onın' janındag'ılar iship-jedi ha'm sol jerde qonıp qaldı. Erten'ine azanda olar uyqıdan turg'anda, xızmetshi: – Endi ruxsat bolsa, xojayınıma qaytaman, – dedi.
55 Biraq Rebekkanın' a'jag'ası ha'm anası: – Qız onlag'an ku'n bizler menen bolsın, keyin jolg'a shıg'arsızlar, – dedi.
56 Al xızmetshi bug'an: – Jaratqan İye jolımdı berip tur eken, meni irikpen'ler. Mag'an xojayınıma qaytıwg'a ruxsat berin'ler, – dedi.
57 Sonda olar: – Qızdı shaqırıp sorayıq, o'zi ne der eken? – dedi.
58 Solay etip, olar Rebekkanı shaqırıp, onnan: – Mına adam menen ketesen' be? – dep soradı. – Ketemen, – dedi ol.
59 Solay etip, olar Rebekkanı, onın' ta'rbiyashısın, İbrayımnın' xızmetshisi menen onın' adamların shıg'arıp saldı.
60 Olar Rebekkag'a pa'tiya berip bılay dedi: «Qarındasım, anası bol mın'-mın'lag'an perzentlerdin', U'rim-putaqların' iyelesin dushpan qalaların».
61 Son'ınan Rebekka ha'm onın' jas shorıları tayarlanıp, tu'yelerge mindi ha'm İbrayımnın' xızmetshisinin' izine erdi. Solay etip, xızmetshi Rebekkanı alıp, jolg'a shıqtı.
62 Sol arada Negeb jerinde jasap atırg'an Isaq Beer-Laxay-Roiyden qaytıp kelgen edi.
63 Keshte Isaq oylanıw ushın atızg'a shıqtı ha'm ol basın ko'terip qarag'anda, jaqınlap kiyatırg'an tu'yelerdi ko'rdi.
64 Rebekka Isaqtı ko'rip, tu'yeden tu'sti ha'm
65 xızmetshiden: – Bizlerge qaray atız boylap kiyatırg'an ana adam kim? – dep soradı. – Bul – menin' xojayınım, – dep juwap berdi xızmetshi. Sonda Rebekka jawlıg'ın alıp, ju'zin japtı.
66 Xızmetshi Isaqqa islegen islerinin' ha'mmesin aytıp berdi.
67 Isaq Rebekkanı anasının' shatırına alıp keldi ha'm og'an u'ylendi. Solay etip, Rebekka Isaqtın' hayalı boldı. Isaq Rebekkanı su'yip qaldı. Usı ta'rizde ol anası qaytıs bolg'annan keyingi qayg'ısına jubanısh taptı.
