Jaratılıs 25 bob
1 İbrayım ja'ne Qatura degen hayalg'a u'ylendi.
2 Ol İbrayımg'a Zimran, İoqshan, Medan, Midyan, İshbaq ha'm Shuax atlı balalardı tuwıp berdi.
3 İoqshannan Sheba menen Dedan tuwıldı. Dedannın' urpaqlarınan ashshur, letush ha'm leum xalıqları kelip shıqtı.
4 Midyannın' ulları: Efa, Efer, Xanox, Abida ha'm Eldaa. Bulardın' ha'mmesi Qaturadan tarag'an urpaqlar edi.
5 İbrayım o'zinin' barlıq mal-mu'lkin Isaqqa qaldırdı.
6 Al toqallarının' balalarına ko'zinin' tiri waqtında sawg'alar berip, olardı Isaqtan uzaqlastırıp, shıg'ıstag'ı jerlerge jiberdi.
7 İbrayım barlıg'ı bolıp bir ju'z jetpis bes jıl o'mir su'rdi.
8 Ol g'arrılıq da'wranın su'rip, uzaq jasadı, qartayg'an shag'ında demi tawısılıp, qaytıs boldı ha'm o'z ata-babalarına qosıldı.
9 Ulları Isaq ha'm İsmayıl onı Mamrege jaqın jerdegi, xet xalqınan bolg'an Soxardın' ulı Efronnın' atızındag'ı Maxpela u'n'girine qoydı.
10 İbrayım bul atızdı xetlerden satıp alg'an edi. Solay etip, İbrayım ha'm onın' hayalı Sara sol jerge qoyıldı.
11 İbrayımnın' o'liminen son', Quday onın' ulı Isaqtı jarılqadı. Isaq Beer-Laxay-Roiydin' janında jasaytug'ın edi.
12 Saranın' shorısı, mısırlı Ajardan tuwılg'an İbrayımnın' ulı İsmayıldın' shejiresi mınaday:
13 İsmayıldın' ullarının' tuwılıw ta'rtibi boyınsha atları mınaday: tun'g'ısh ulı Nebayot, son' Kedar, Adbeel, Mibsam.
14 Mishma, Duma, Massa,
15 Xadad, Tema, Etur, Nafish ha'm Kedma.
16 İsmayıldın' ulları bolg'an bular – on eki urıwdın' ko'semi boldı. Usı on eki urıw ha'm olardın' awılları menen ma'kan basqan jerleri olardın' atları menen ataldı.
17 İsmayıl bir ju'z otız jeti jasında demi tawısılıp, qaytıs boldı ha'm o'z atababalarına qosıldı.
18 İsmayıldın' urpaqları Xawila ha'm Shur aralıg'ındag'ı jerlerge ma'kan basqan edi. Shur Ashshurg'a baratug'ın jolda, Mısırg'a jaqın jaylasqan edi. Olar barlıq tuwısqanları menen jawlasıp o'mir su'rdi.
19 İbrayımnın' ulı Isaqtın' o'mir tariyxı mınaday: İbrayımnan Isaq tuwıldı.
20 Isaq Rebekkag'a u'ylengende qırıq jasta edi. Rebekka PaddanAramnan bolg'an aramlı Betueldin' qızı, aramlı Labannın' qarındası edi.
21 Isaq hayalı ushın Jaratqan İyege duwa etti, o'ytkeni hayalı perzentsiz edi. Jaratqan İye Isaqtın' duwasına juwap berdi ha'm Rebekka ha'miledar boldı.
22 Onın' qursag'ındag'ı balalar bir-biri menen to'belese basladı. Sonda Rebekka: «Nege bunday bolıp atır?» – dep Jaratqan İyeden soradı.
23 Jaratqan İye og'an bılay dedi: «Senin' qursag'ın'da eki xalıq bar, Sennen eki tu'rli xalıq bo'linip shıg'ar, Biri ekinshisinen ku'shlirek bolıp, U'lkeni kishkenesine bag'ınıshlı bolar».
24 Rebekkanın' tuwıw waqtı kelgende, qursag'ında egiz ullardın' bar ekeni ma'lim boldı.
25 Birinshi tuwılg'an ulının' denesi qızıl, terisi ton sıyaqlı ju'nli edi. Sonlıqtan onın' atın Esaw dep qoydı.
26 Keyin onın' sın'arı tuwıldı. Ol Esawdın' tabanın qolı menen uslap shıqqan edi. Sonlıqtan onı Yaqıp dep atadı. Olar tuwılg'anda, Isaq alpıs jasta edi.
27 Balalar o'sip, erjetti. Esaw du'zdi su'yetug'ın sheber an'shı, al Yaqıp u'yden shıqpaytug'ın tınısh adam boldı.
28 Isaq Esawdı jaqsı ko'retug'ın edi, sebebi onın' awlap a'kelgen an'larının' go'shin jewdi unatatug'ın edi. Al Rebekka Yaqıptı jaqsı ko'retug'ın edi.
29 Bir ku'ni Yaqıp awqat pisirip atırg'anda, Esaw du'zden sharshap, ash bolıp keldi.
30 Ol Yaqıpqa: – Mag'an mına qızıl awqatın'nan ber, men ash bolıp turman, – dedi. Sol sebepli ol Edom dep te ataldı.
31 Yaqıp og'an: – Da'slep mag'an tun'g'ıshlıg'ın'dı sat! – dedi.
32 Esaw og'an: – Ashtan o'leyin dep turg'anımda, tun'g'ıshlıqtan mag'an ne payda? – dedi.
33 Yaqıp: – Da'slep mag'an ant ber! – dedi. Sonda Esaw Yaqıpqa ant berip, o'z tun'g'ıshlıg'ın og'an sattı.
34 Sonnan keyin, Yaqıp Esawg'a nan ha'm qızıl lobiya sorpa berdi. Esaw iship-jep bolıp, ornınan turıp ketti. Solay etip, Esaw o'z tun'g'ıshlıg'ın pisent etpedi.
