Jaratılıs 27 bob
1 Isaq qartayıp, ko'zi ko'rmey qaldı. Ol u'lken ulı Esawdı shaqırıp alıp, og'an: – Ulım! – dedi. – La'bba'y! – dep juwap berdi Esaw.
2 Isaq og'an bılay dedi: – Mine, men qartayıp qaldım, qashan o'letug'ınımdı bilmeymen.
3 Endi sen quralların'dı: sadaq ha'm oqların'dı al da, du'zge ketip, men ushın bir an' awlap kel.
4 Keyin men jaqsı ko'retug'ın mazalı awqat tayarlap, mag'an alıp kel. Men onı jep, o'lmesimnen burın sag'an pa'tiya bereyin.
5 Isaq ulı Esawg'a bul so'zlerdi aytıp atırg'anda, bunı Rebekka esitip turg'an edi. Esaw an' awlap a'keliw ushın du'zge ketkende,
6 Rebekka ulı Yaqıpqa bılay dedi: – Men a'ken'nin' a'jag'an' Esawg'a aytqan ga'pin esitip qaldım. A'ken' og'an:
7 «Mag'an bir an' awlap a'kelip, mazalı awqat tayarla. Men onı jep, o'lmesimnen burın sag'an Jaratqan İye aldında pa'tiya bereyin», – dedi.
8 Ulım, endi meni dıqqat penen tın'lap alıp, aytqanlarımdı isle:
9 su'riwge barıp, ol jerden mag'an eki ılaqtı saylap a'kel. Men olardan a'ken' jaqsı ko'retug'ın mazalı awqat tayarlayın.
10 Son'ınan sen onı jewi ushın a'ken'e aparasan'. Sonda a'ken' o'lmesinen burın sag'an pa'tiyasın beredi.
11 Yaqıp anası Rebekkag'a: – Biraq a'jag'am Esawdın' denesin ju'n basqan, al menin' denemde ju'n joq.
12 Eger a'kem meni sıypalap ko'rse ne qılaman? Onı aldap atırg'anımdı bilip qoysa, pa'tiya ornına g'arg'ıs alaman-g'o, – dedi.
13 Anası og'an: – Balam, sag'an keletug'ın g'arg'ıs mag'an kelsin. Sen menin' ga'pime kirip, ılaqlardı alıp kel! – dedi.
14 Sonda Yaqıp barıp, ılaqlardı anasına a'kelip berdi. Anası olardan Isaq jaqsı ko'retug'ın mazalı awqat tayarladı.
15 Son'ınan Rebekka u'lken ulı Esawdın' u'ydegi en' jaqsı kiyimlerin alıp, kishi ulı Yaqıpqa kiygizdi.
16 Onın' qolların ha'm moynının' ju'nsiz jerlerin ılaqlardın' terisi menen oradı.
17 Keyin o'zi tayarlag'an mazalı awqat penen nandı ulı Yaqıptın' qolına berdi.
18 Solay etip, Yaqıp a'kesinin' janına kelip: – Ag'a! – dedi. A'kesi og'an: – La'bba'y, ulımnın' qaysı birisen'? – dedi.
19 Yaqıp a'kesine: – Men senin' tun'g'ısh ulın' Esawman. Men senin' aytqanın'dı isledim. Tikeyip otırıp, men a'kelgen an'nın' go'shinen je. Solay etip, mag'an pa'tiyan'dı ber, – dedi.
20 Isaq ulınan: – Qalayınsha bunsha tez taptın', ulım? – dep soradı. Yaqıp a'kesine: – Senin' Qudayın' bolg'an Jaratqan İye menin' jolımdı berdi, – dep juwap berdi.
21 Sonda Isaq Yaqıpqa: – Jaqınıraq kel, ulım. Sen ırasında da, ulım Esawsan' ba yamasa ol emessen' be, sonı biliw ushın seni bir sıypalap ko'reyin, – dedi.
22 Yaqıp a'kesi Isaqqa jaqınladı. A'kesi onı sıypalap ko'rip: «Dawısı – Yaqıptın' dawısı, biraq qolları – Esawdın' qolları», – dep so'ylendi.
23 Yaqıptın' qolları a'jag'ası Esawdın' qollarınday ju'nli bolg'anlıg'ı sebepli, Isaq onı tanımadı. Sonlıqtan ol pa'tiyasın bermekshi bolıp atırıp,
24 ja'ne onnan: – Sen ırasında da, ulım Esawmısan'? – dep soradı. – Awa, Esawman, – dep juwap berdi Yaqıp.
25 Sonda Isaq og'an: – Ulım o'zin' a'kelgen an'nın' go'shin alıp kel. Men onı jep, sag'an pa'tiyamdı bereyin, – dedi. Yaqıp da'slep awqattı, keyin sharaptı a'kelip, a'kesine berdi. A'kesi awqattan jep, sharaptan ishti.
26 Son'ınan Isaq og'an: – Jaqınıraq kelip, meni su'y, ulım! – dedi.
27 Yaqıp jaqınıraq barıp, a'kesin su'ydi. Isaq onın' kiyimlerinen Esawdın' iyisin sezdi ha'm Yaqıpqa pa'tiyasın berip, bılay dedi: «Mine, ulımnın' iyisi, Megzer Jaratqan İye jarılqag'an dala iyisine.
28 Bersin Quday sag'an aspan shıg'ın, Ha'm jerdin' o'nimdar topırag'ın, Mol g'a'lle ha'm ju'zim suwın.
29 Xalıqlar sag'an xızmet etsin, Milletler aldın'da bas iysin. Biylik et tuwısqanların'nın' u'stinen, Qanalasların' aldın'da bas iysin. Seni g'arg'aytug'ınlar g'arg'ısqa ushırasın, Seni jarılqaytug'ınlar jarılqansın».
30 Yaqıp Isaqtın' pa'tiyasın ala sala, onın' aldınan shıg'ıp baratırg'an waqıtta-aq, a'jag'ası Esaw an'nan qaytıp keldi.
31 Esaw da mazalı awqat tayarlap, a'kesine a'keldi. Son'ınan ol a'kesine: – Ag'a! Tikeyip otırıp, men a'kelgen an'nın' go'shinen je. Solay etip, mag'an pa'tiyan'dı ber, – dedi.
32 A'kesi onnan: – Sen kimsen'! – dep soradı. – Men – senin' tun'g'ısh ulın' Esawman, – dep juwap berdi ol.
33 Sonda Isaq qattı shorshıp, dirildep ketip: – Haw, olay bolsa, mag'an an' awlap a'kelgen kim edi? Sen kelmesten burın, men tap jan'a g'ana awqattı jep, og'an pa'tiyamdı bergen edim. Endi pa'tiya alg'an ol boladı, – dedi.
34 Esaw a'kesinin' so'zlerin esitkende, ashshı dawıs penen baqırıp jılap: – Mag'an da pa'tiyan'dı ber, ag'a! – dedi.
35 Biraq a'kesi og'an: – İnin' hiylekerlik penen kelip, sag'an tiyisli pa'tiyanı alıp ketti, – dedi.
36 Sonda Esaw a'kesine: – Ol biykarg'a Yaqıp dep atalmag'an shıg'ar! Ol meni eki ret aldadı-g'o: da'slep tun'g'ıshlıg'ımdı aldı, al endi mag'an tiyisli pa'tiyanı da alıp ketti, – dedi. Son'ınan ol ja'ne: – Men ushın hesh qanday pa'tiya qaldırmadın' ba? – dep soradı.
37 Isaq og'an bılay dep juwap berdi: – Men inin'di seni biyleytug'ın qıldım, barlıq tuwısqanların og'an xızmetshi ettim. Onı g'a'lle ha'm jan'a sharap penen ta'miyinledim. Endi men sen ushın ne isley alaman, ulım?
38 Esaw a'kesine: – Ag'a! Sende pa'tiya tek birew me? Mag'an da pa'tiyan'dı ber, ag'a! – dep dad salıp jılay basladı.
39 Sonda Isaq ulına bılay dep juwap berdi: «Senin' ma'kanın' o'nimdar topıraqtan, Aspan shıg'ınan jıraq boladı.
40 Qılıshın'nın' ku'shi menen jasap, İnin'e xızmet etesen'. Biraq og'an qarsı bas ko'tergenin'de, Ol salg'an moyıntırıqtı ılaqtırıp taslaysan'».
41 A'kesi pa'tiyasın Yaqıpqa bergeni ushın, Esaw inisi Yaqıptı jek ko'rip qaldı. Esaw: «A'kemnin' o'limi shamalastı. Onı azalaw ku'nleri o'tkennen keyin, inim Yaqıptı o'ltiremen», – dep oylap ju'rdi.
42 Biraq Rebekka u'lken ulı Esawdın' oyınan xabardar bolg'anda, kishi ulı Yaqıptı shaqırtıp alıp, og'an bılay dedi: – Mine, a'jag'an' Esaw seni o'ltiriwdi oylap, o'zin jubatıp ju'ripti.
43 Endi ulım, menin' so'zime qulaq sal: ha'zir-aq Xarang'a, a'jag'am Labannın' janına qashıp ket.
44 A'jag'an'nın' ashıwı basılaman degenshe, bir qansha waqıt Labannın' janında qal.
45 A'jag'an'nın' ashıwı basılıp, og'an islegen isin' esinen shıqqannan son', men birewdi jiberip, ol jerden seni aldıraman. Bolmasa, men bir ku'nde ekewin'izden de ayırılıp qalaman-g'o.
46 Keyin Rebekka Isaqqa: – Mına xet kelinlerimiz meni janımnan toydırdı. Eger Yaqıp ta bul jerdin' qızlarına, xet qızlarg'a u'ylense, onda mag'an jasawdın' nege keregi bar? – dedi.
