Jaratılıs 28 bob
1 Isaq Yaqıptı shaqırıp alıp, og'an pa'tiyasın berdi ha'm bılay dep buyırdı: «Qananlı qızlarg'a u'ylenbe.
2 Da'rhal bul jerden ketip, Paddan-Aramg'a, anan'nın' a'kesi Betueldin' u'yine bar. Ol jerde dayın' Labannın' qızlarının' birewine u'ylen.
3 Qu'direti ku'shli Quday seni jarılqasın, o'sip-o'ndirip, ko'beytsin ha'm urpag'ın'nan ko'plegen xalıqlar taratsın.
4 Ol İbrayımg'a bergen jarılqawın sag'an ha'm senin' urpaqların'a da bersin. Solay etip, sen ha'zir kelgindi bolıp ju'rgen jerdi, Qudaydın' İbrayımg'a bergen jerin menshik etip iyelegeysen'».
5 Son'ınan Isaq Yaqıptı jolg'a atlandırdı. Yaqıp Paddan-Aramg'a, o'zinin' ha'm Esawdın' anası Rebekkanın' a'jag'ası, aramlı Betueldin' ulı Labannın' u'yine ketti.
6 Isaq Yaqıpqa pa'tiya berip, u'yleniwi ushın onı Paddan-Aramg'a jibergenin, og'an pa'tiya berip atırıp: «Qananlı qızlarg'a u'ylenbe», – dep buyırg'anın ha'm
7 Yaqıp ata-anasının' so'zine qulaq salıp, Paddan-Aramg'a ketkenin Esaw bildi.
8 Solay etip, Esaw qananlı qızlardın' a'kesine unamaytug'ının tu'sindi.
9 Sonlıqtan ol İbrayımnın' ulı İsmayıldın' aldına bardı ha'm hayallarının' u'stine İsmayıldın' qızı, Nebayottın' qarındası Maxalattı hayallıqqa aldı.
10 Yaqıp Beer-Shebadan shıg'ıp, Xarang'a qaray jol ju'rdi.
11 Ol bir jerge jetip kelgende, tu'new ushın toqtadı. Sebebi quyash batıp qalg'an edi. Ol sol jerden bir tastı alıp, onı basının' astına qoydı da, uyıqlaw ushın jattı.
12 Yaqıp tu'sinde jer u'stinde tik turg'an teksheni ko'rdi. Tekshenin' usha bası aspang'a tiyip turg'an bolıp, Qudaydın' perishteleri onın' u'stinde minip-tu'sip ju'rgen edi.
13 Tekshenin' basında Jaratqan İye turg'an bolıp, Ol Yaqıpqa bılay dedi: «Men – İbrayımnın' ha'm Isaqtın' Qudayı, Jaratqan İyemen. Sen jatqan jerdi Men sag'an ha'm urpaqların'a beremen.
14 Senin' urpaqların' jerdin' qumınday ko'p bolıp, batısqa ha'm shıg'ısqa, arqag'a ha'm qublag'a jayıladı. Jer ju'zindegi barlıq xalıqlar sen ha'm senin' urpag'ın' arqalı jarılqanadı.
15 Men senin' menen birgemen. Qay jerge barsan' da, Men seni qorg'ayman ha'm seni ja'ne usı jerge qaytaraman. Sag'an bergen wa'demdi orınlamag'anımsha, seni taslap ketpeymen».
16 Yaqıp oyanıp: «Haqıyqattan da, Jaratqan İye usı jerde eken-g'o, biraq men bilmeppen!» – dep oyladı.
17 Ol qorqıp ketip: «Bul jer qanshelli qorqınıshlı! Bul Qudaydın' U'yinen basqa hesh na'rse emes, bul aspan da'rwazası!» – dedi.
18 Yaqıp azanda erte turıp, basının' astına qoyg'an tastı aldı da, onı estelik qılıp tiklep, u'stine za'ytu'n mayın quydı.
19 İlgeri Luz dep atalg'an bul qalag'a Beyt-El dep at qoydı.
20 Yaqıp wa'de berip, bılay dedi: «Eger Quday menin' menen birge bolıp, baratırg'an usı jolımda meni qorg'asa, mag'an jewge nan, kiyiwge kiyim berse,
21 so'ytip meni a'kemnin' u'yine aman-esen qaytarsa, onda Jaratqan İye menin' Qudayım boladı.
22 Men estelik qılıp tiklegen mına tas Qudaydın' U'yi boladı. Senin' mag'an beretug'ının'nın' ha'mmesinen Sag'an onnan birin beremen».
