Jaratılıs 29 bob
1 Yaqıp jolın dawam etip, shıg'ıs xalıqlarının' jerlerine jetip keldi.
2 Ol sol jerdegi dalada bir qudıqtı ha'm qudıqtın' janında jatırg'an u'sh su'riw qoydı ko'rdi. O'ytkeni qoylar sol qudıqtan suwg'arılatug'ın edi. Qudıqtın' awzında u'lken tas bar edi.
3 Barlıq su'riwler ol jerge jıynalg'anda, shopanlar qudıqtın' awzınan tastı alıp qoyıp, qoylardı suwg'aratug'ın edi. Son'ınan olar tastı ja'ne o'z ornına, qudıqtın' awzına qoyatug'ın edi.
4 Yaqıp shopanlardan: – Ha'y, tuwısqanlarım, qay jerdensizler? – dep soradı. Shopanlar og'an: – Bizler Xarannanbız, – dep juwap berdi.
5 Yaqıp olardan: – Naxordın' aqlıg'ı Labandı tanıysızlar ma? – dep soradı. – Awa, tanıymız, – dep juwap berdi olar.
6 Yaqıp olardan ja'ne: – Onın' hal-jag'dayı jaqsı ma? – dep soradı. Olar: – Jaqsı, a'ne, onın' qızı Rahila qoyların aydap kiyatır, – dedi.
7 Yaqıp olarg'a: – Ku'n batıwg'a ele ko'p waqıt bar, ha'zir su'riwdi jıynaytug'ın waqıt emes-g'o. Qoyların'ızdı suwg'arıp bolıp, ja'ne otlatıp qaytqanın'ız jaqsı emes pe? – dedi.
8 Shopanlar: – Barlıq su'riwlerdi jıynap, qudıqtın' awzındag'ı tastı alıp taslag'anımızdan keyin g'ana, bizler qoylardı suwg'ara alamız, – dedi.
9 Yaqıp shopanlar menen so'ylesip turg'anda, Rahila a'kesinin' qoyları menen kelip qaldı. Sebebi ol qoy bag'atug'ın edi.
10 Yaqıp dayısı Labannın' qızı Rahilanı ha'm onın' qoyların ko'rgende qudıqqa barıp, onın' awzındag'ı tastı alıp tasladı da, dayısı Labannın' qoyların suwg'ardı.
11 Son'ınan Yaqıp Rahilanı su'yip, o'kirip jılap jiberdi.
12 Ol Rahilag'a a'kesinin' jiyeni, Rebekkanın' ulı ekenin ayttı. Sonda Rahila juwırıp barıp, a'kesine xabar berdi.
13 Laban jiyeni Yaqıptın' kelgenin esitiwden-aq, onı qarsı alıw ushın juwırıp shıqtı. Onı qushaqlap su'ydi ha'm u'yine alıp keldi. Yaqıp og'an bolg'an waqıyalardın' ha'mmesin aytıp berdi.
14 Sonda Laban Yaqıpqa: – Awa, shınında da sen menin' qanlas tuwısqanım ekensen'! – dedi.Yaqıp Labandikinde bir ayday jasag'annan keyin,
15 Laban Yaqıpqa: – Ag'ayinim bolg'anın' ushın, mag'an teginge xızmet etiwin' kerek pe? Mag'an ayt, xızmet haqın'a qansha to'leyin? – dedi.
16 Labannın' eki qızı bolıp, olardın' u'lkeninin' atı Lea, kishkenesinin' atı Rahila edi.
17 Leanın' ko'zleri mu'la'yim, al Rahila qa'ddi-qa'wmeti kelisken, shıraylı edi.
18 Yaqıp Rahilanı su'yip qaldı. Ol Labang'a: – Kishkene qızın'ız Rahila ushın, men sizge jeti jıl xızmet etemen, – dedi.
19 Laban og'an: – Basqa birewge bergennen go're, onı sag'an bergenim jaqsı. Menikinde jasay ber, – dedi.
20 Solay etip, Yaqıp Rahila ushın jeti jıl xızmet etti. Yaqıp Rahilanı su'ygenlikten, bul jeti jıl ol ushın bir neshe ku'ndey bolıp ko'rindi.
21 Sonda Yaqıp Labang'a: «Kelisilgen waqıt keldi, endi qızın'ızdı berin', men og'an u'yleneyin», – dedi.
22 Solay etip, Laban ol jerdin' barlıq xalqın jıynap, toy berdi.
23 Biraq tu'nde ol qızı Leanı a'kelip, Yaqıpqa berdi ha'm Yaqıp onın' menen jattı.
24 Laban shorısı Zilpanı qızı Leag'a xızmetshi etip berdi.
25 Yaqıp azanda turıp qarasa, janında Lea jatırg'anın ko'rdi. Ol Labang'a: – Bul ne qılg'anın'ız? Men sizge Rahila ushın xızmet etkenim joq pa edim? Meni nege aldadın'ız? – dedi.
26 Laban og'an: – Bizlerdin' da'stu'rimiz boyınsha, u'lken qızınan burın kishkene qızın uzatpaydı.
27 Bul toylaw ha'ptesi tamam bolsın, son'ınan sag'an Rahilanı da beremiz. Biraq onın' ushın ja'ne jeti jıl xızmet qılasan', – dedi.
28 Yaqıp bug'an kelisim berip, sol bir ha'pteni Lea menen birge o'tkizdi. Son'ınan Laban og'an qızı Rahilanı da hayallıqqa berdi.
29 Laban o'z shorısı Bilhanı qızı Rahilag'a xızmetshi etip berdi.
30 Yaqıp Rahila menen de jattı ha'm ol Rahilanı Leadan go're ko'birek jaqsı ko'rdi. Solay etip, Yaqıp Labang'a ja'ne jeti jıl xızmet etti.
31 Jaratqan İye Yaqıptın' Leada kewli joq ekenin ko'rgende, onı tuwatug'ın qıldı. Al Rahila biyperzent edi.
32 Lea ha'miledar bolıp, bir ul tuwdı. Ol: «Jaratqan İye menin' baxıtsızlıg'ımdı ko'rdi. Endi ku'yewim meni jaqsı ko'retug'ın boladı», – dep, ulına Ruben dep at qoydı.
33 Ol ja'ne ha'miledar bolıp, ul tuwg'anda: «Jaratqan İye ku'yewimnin' mende kewli joq ekenin esitti ha'm mag'an bul uldı da berdi», – dep, ulına Shimon dep at qoydı.
34 Ol ja'ne ha'miledar bolıp, tag'ı bir ul tuwg'anda: «Endi ku'yewim mag'an baylanadı, o'ytkeni men og'an u'sh ul tuwıp berdim», – dep, ulına Lebiy dep at qoydı.
35 Keyin ol ja'ne ha'miledar bolıp, tag'ı bir ul tuwg'anda: «Bul ret men Jaratqan İyeni alg'ıslayman», – dedi ha'm ulına Yahuda dep at qoydı. Son' ol bir qansha mu'ddet bala ko'termedi.
