Jaratılıs 3 bob
1 Quday İye jaratqan jabayı haywanlardın' ishindegi en' hiylekeri jılan edi. Jılan hayaldan: – Haqıyqattanda da, Quday bag'dag'ı hesh bir terektin' miywesinen jemen' dedi me? – dep soradı.
2 Hayal jılang'a bılay dep juwap berdi: – Bizler bag'dag'ı tereklerdin' miywelerinen jey alamız.
3 Biraq Quday: «Bag'dın' ortasındag'ı terektin' miywesinen jemen', og'an qol tiygizben', bolmasa o'lip qalasız», – degen edi.
4 Jılan hayalg'a: – Yaq, hasla o'lmeysiz!
5 Sebebi sol terektin' miywesinen jegenin'izde ko'zlerin'iz ashılıp, jaqsılıq penen jamanlıqtı biletug'ının'ızdı ha'm Quday sıyaqlı bolatug'ının'ızdı Quday biledi, – dedi.
6 Hayal terektin' miywesinin' jewge jaqsı ha'm ko'zge ısıq ekenin ko'rip, onnan bilim alıwg'a bolatug'ının bilgenlikten, ha'wesi keldi. Sonlıqtan ol miyweni u'zip alıp jedi ha'm janındag'ı ku'yewine de berdi. Ku'yewi de jedi.
7 Sol waqıtta-aq ekewinin' de ko'zleri ashılıp, o'zlerinin' jalan'ash ekenin bildi. Olar a'njir ag'ashlarının' japıraqların bir-birine tigip, o'zleri ushın japqıshlar isledi.
8 Olar ku'nnin' ıssılıg'ı qaytqan waqıtta, bag'dın' ishinde Quday İyenin' ju'rgenin esitti ha'm Onnan tasalanıp, bag'dag'ı tereklerdin' arasına jasırındı.
9 Biraq Quday İye adamdı dawıslap shaqırıp: – Qay jerdesen'? – dedi.
10 Sonda adam: – Bag'da ju'rgenin'di esitkenimde qorqıp kettim. O'ytkeni jalan'ash edim, sonlıqtan jasırındım, – dedi.
11 Quday İye adamnan: – Jalan'ash ekenligin'di sag'an kim ayttı? Ya bolmasa, Men jeme dep buyırg'an terektin' miywesinen jedin' be? – dep soradı.
12 Adam: – Sen mag'an bergen hayal terektin' miywesinen berdi, men de jedim, – dep juwap berdi.
13 Quday İye hayalg'a: – Bul ne qılg'anın'? – dedi. Hayal: – Jılan meni aldadı, sonlıqtan men jedim, – dedi.
14 Sonda Quday İye jılang'a bılay dedi: – Sen bul isin' ushın barlıq mallar ha'm jabayı haywanlar arasınan shetletilip, na'letiy bolasan'. O'mirin' boyı jer bawırlap, topıraq jeysen'.
15 Men senin' menen hayaldı, onın' urpag'ı menen senin' urpag'ın'dı birbirine dushpan etip qoyaman. Onın' urpag'ı senin' basın'dı ezedi, al sen onın' tabanın shag'asan'.
16 Son'ınan Quday İye hayalg'a: – Ha'miledarlıq waqtın'da awır azap shektiremen, qıynalıp tuwatug'ın bolasan'. Sen ku'yewin'e qushtar bolasan', ol seni basqaratug'ın boladı, – dedi.
17 Al adamg'a bılay dedi: – Hayalın'nın' so'zin tın'lap, Men jeme dep buyırg'an terektin' miywesinen jegenin' ushın, jer sen sebepli na'letlenedi. O'mirin' boyı awır miynet etip, jerden azıg'ın'dı tawıp jeytug'ın bolasan'.
18 Sen dala sho'plerin awqat etesen', jer sen ushın shen'gel ha'm oshag'an o'siredi.
19 Jerge qaytqanın'sha, nanın'dı man'lay terin'di to'gip tabatug'ın bolasan'. O'ytkeni sen topıraqsan', topıraqtan jaratılg'anın' sebepli ja'ne topıraqqa aylanasan'.
20 Adam o'zinin' hayalın Hawa dep atadı, sebebi ol pu'tkil adamzattın' tu'p anası boldı.
21 Quday İye Adam ha'm onın' hayalı ushın teriden kiyim islep, olardı kiyindirdi.
22 Son'ınan Quday İye bılay dedi: «Mine, adam jamanlıq penen jaqsılıqtı bilip, Bizlerdin' birimiz sıyaqlı boldı. Endi ol o'mir teregine qolın sozıp, onın' miywesin alıp jemesin ha'm ma'n'gilik o'mir su'rmesin».
23 Solay etip, o'z denesi jaratılg'an topıraqtı ta'rbiyalaw ushın, Quday İye adamdı Eden bag'ınan shıg'arıp jiberdi.
24 Ol adamdı quwıp shıg'arıp jiberdi ha'm o'mir teregine baratug'ın joldı qorg'aw ushın Eden bag'ının' shıg'ıs ta'repine kerublardı ha'm ha'r ta'repke aylanıp turatug'ın otlı qılıshtı qoydı.
