Jaratılıs 30 bob
1 Rahila Yaqıpqa bala tuwıp bere almag'anlıqtan, a'japasın qızg'ana basladı. Ol Yaqıpqa: – Mag'an perzent ber, bolmasa o'lemen! – dedi.
2 Yaqıptın' Rahilag'a g'a'zebi qaynap: – Men Quday ma edim, seni analıq baxtınan mahrum etken? – dedi.
3 Rahila: – Mınaw menin' shorım Bilha. Sen onın' menen jat. Sonda ol bala tuwıp, etegime saladı ha'm men de ol arqalı balalı bolaman, – dedi.
4 Solay etip, Rahila o'z shorısı Bilhanı ku'yewine hayallıqqa alıp berdi ha'm Yaqıp onın' menen jattı.
5 Bilha ha'miledar bolıp, Yaqıpqa bir ul tuwıp berdi.
6 Sonda Rahila: «Quday meni aqladı. Ol dadımdı esitip, mag'an bir ul berdi», – dedi ha'm ulına Dan dep at qoydı.
7 Rahilanın' shorısı Bilha ja'ne ha'miledar bolıp, Yaqıpqa ekinshi ulın tuwıp berdi.
8 Sonda Rahila: «Men a'japama qarsı ullı gu'reste onı jen'dim», – dedi ha'm ulına Naftaliy dep at qoydı.
9 Lea o'zinin' tuwmay qalg'anın ko'rgende, shorısı Zilpanı Yaqıpqa hayallıqqa berdi.
10 Leanın' shorısı Zilpa da Yaqıpqa bir ul tuwıp berdi.
11 Sonda Lea: «Bul qanday baxıt!» – dedi ha'm ulına Gad dep at qoydı.
12 Leanın' shorısı Zilpa Yaqıpqa ekinshi ulın tuwıp berdi.
13 Sonda Lea: «Men qanday baxıtlıman, endi hayallar meni baxıtlı dep ataydı», – dedi ha'm ulına Asher* dep at qoydı.
14 Ruben biyday orag'ı waqtında dalag'a bardı. Ol dalada ma'rgiya sho'plerdi tawıp, anası Leag'a a'kelip berdi. Sonda Rahila Leag'a: – Ulın'nın' ma'rgiya sho'plerinen mag'an da ber, – dedi.
15 Biraq Lea og'an: – Ku'yewimdi alg'anın' az bolg'anday, endi ulımnın' ma'rgiya sho'plerin de almaqshımısan'? – dedi. Rahila og'an: – Meyli, ulın'nın' ma'rgiya sho'pleri esabınan ku'yewim bul aqsham senin' menen jatsın, – dedi.
16 Keshqurın Yaqıp daladan kelgende, Lea onı qarsı alıwg'a shıqtı ha'm og'an: «Bu'gin menin' menen jatıwın' kerek, sebebi men seni ulım tawg'an ma'rgiya sho'plerge almastırdım», – dedi. Solay etip, Yaqıp sol tu'ni Lea menen jattı.
17 Quday Leanın' duwasın esitip, ol ha'miledar boldı ha'm Yaqıpqa besinshi ulın tuwıp berdi.
18 Sonda Lea: «Shorımdı ku'yewime bergenim ushın, Quday mag'an esesin qaytardı», – dedi ha'm ulına İssaxar* dep at qoydı.
19 Lea ja'ne ha'miledar bolıp, Yaqıpqa altınshı ulın tuwıp berdi.
20 Sonda Lea: «Quday mag'an jaqsı sıy berdi. Endigiden bılay, ku'yewim meni qa'dirleytug'ın boladı, o'ytkeni men og'an altı ul tuwıp berdim», – dedi ha'm ulına Zebulon dep at qoydı.
21 Bir qansha waqıttan son', ol qız tuwıp, atın Dina dep qoydı.
22 Aqırı Quday Rahilanı eske alıp, onın' duwasın esitti ha'm onı tuwatug'ın qıldı.
23 Rahila ha'miledar bolıp, bir ul tuwdı. Ol: «Quday meni shermendeligimnen qutqardı», – dedi.
24 Son'ınan ol tag'ı: «Jaratqan İye mag'an ja'ne bir ul bersin», – dep, ulına Yusup dep at qoydı.
25 Rahila Yusupti tuwg'annan keyin, Yaqıp Labang'a bılay dedi: – Mag'an juwap berin', men o'z u'yime, o'z jerime qaytayın.
26 Men hayallarım menen balalarımdı da birge alıp keteyin, sebebi men sizge olar ushın xızmet etken edim-g'o. Menin' sizge qanshelli xızmet etkenimdi o'zin'iz bilesiz.
27 Al Laban og'an: – Ah, eger senin' kewlin'di taba alg'anımda ma edi?! Jaratqan İyenin' meni sen sebepli jarılqag'anın pal ashıw arqalı bildim.
28 Mag'an xızmet haqın'dı ayt, sag'an to'leymen, – dedi.
29 Yaqıp og'an: – Sizge qalay xızmet etkenimdi ha'm menin' arqamda malların'ızdın' qanday bolg'anın bilesiz.
30 Men kelmesten burın bar bolg'an az g'ana malın'ız ju'da' ko'beyip ketti. Men keliwden Jaratqan İye sizdi jarılqap basladı. Biraq endi men o'z u'yim ushın qashan miynet etemen? – dedi.
31 Laban onnan: – Sag'an ne bereyin? – dep soradı. Yaqıp og'an: – Mag'an hesh na'rse bermen'. Eger siz mına sha'rtime ko'nsen'iz, men ja'ne sizin' su'riwlerin'izge qarap, olardı bag'a beremen:
32 bu'gin men barlıq su'riwlerin'izdi aralap shıg'ıp, qoy-eshkilerdin' ala ha'm jag'alların, yag'nıy qoylardın' qaraların, eshkilerdin' jag'al ha'm alaların ajıratıp qoyayın. Olar menin' xızmet haqım bolsın
33 Keyin ala siz menin' xızmet haqımdı tekseriw ushın kelgenin'izde, a'dil ekenimdi bilip alasız. Eshkilerimnen qaysı biri jag'al ha'm ala bolmasa, qoylarımnan qaysı biri qara bolmasa, urlıq dep esaplansın.
34 Laban og'an: – Meyli, sen aytqanday bolsın, – dedi.
35 Degen menen, Laban sol ku'ni-aq ala-shubar ha'm jag'al tekelerdi, u'stinde ag'ı bar jag'al eshkilerdi ha'm qara qoylardın' ha'mmesin su'riwden ayırıp, o'z ullarının' qarawına tapsırdı.
36 Ol o'zi menen Yaqıp arasındag'ı aralıqtı u'sh ku'nlik jol etip belgiledi. Al Yaqıp Labannın' qalg'an malların bag'a berdi.
37 Yaqıp o'zine aq terek, badam ha'm shınar tereklerinen jas shıbıqlardı kesip aldı. Olardın' ishindegi ag'ı ko'ringenshe, qabıqların ala-ala etip qırshıdı.
38 Son'ınan ol qırshılg'an shıbıqlardı qoy-eshkilerdin' aldına, olar suw ishetug'ın nawalardın' ishine salıp qoydı. Qoy-eshkiler suw ishiwge kelgende, sol jerde shag'ılısatug'ın edi.
39 Olar shıbıqlardın' aldında shag'ılısqannan keyin, olardan ala-shubar ha'm jag'al qozı-ılaqlar tuwılatug'ın edi.
40 Yaqıp qozılardı ayırıp, qoylardı Labannın' barlıq alashubar ha'm qara mallarına qaratıp qoydı. Solay etip, ol o'zi ushın su'riw payda etip, olardı Labannın' mallarına aralastırmadı.
41 Urg'ashılardın' ku'shlileri ku'yge kelgen waqıtta, olar shıbıqlardın' aldında shag'ılıssın dep, Yaqıp shıbıqlardı olardın' ko'z aldına, nawalardın' ishine qoyatug'ın edi.
42 Biraq a'zzi urg'ashılar ku'yge kelgen waqıtta, ol shıbıqlardı qoymaytug'ın edi. Solay etip, a'zzi mallardan tuwılg'anları Labang'a, ku'shlilerinen tuwılg'anları Yaqıpqa tiyisli boldı.
43 Usı jol menen Yaqıp ha'dden zıyat bayıp ketti. Onın' su'riw-su'riw qoy-eshkileri, shorıları ha'm qulları, tu'ye ha'm eshekleri boldı.
