Jaratılıs 31 bob
1 Yaqıp Labannın' ullarının': «Yaqıp a'kemizdin' barlıq zatların o'zlestirip, pu'tkil baylıg'ın a'kemizge tiyisli bolg'an mal-mu'likten arttırdı», – dep aytıp ju'rgenin esitti.
2 Ja'ne de, Labannın' da o'zine burıng'ıday qarım-qatnasta emes ekenin bayqadı.
3 Sonda Jaratqan İye Yaqıpqa: «Ata-babaların'nın' jerine, ag'ayintuwg'anların'a qayt! Men senin' menen birge bolaman», – dedi.
4 Solay etip, Yaqıp adam jiberip, Rahila menen Leanı o'z su'riwleri ju'rgen jaylawg'a shaqırtıp,
5 olarg'a bılay dedi: – A'ken'izdin' mag'an degen qarım-qatnasının' burıng'ıday emes ekenligin ko'rip turman. Biraq a'kemnin' Qudayı menin' menen birge boldı.
6 Menin' a'ken'izge bar ku'shim menen xızmet etkenimdi o'zlerin'iz bilesiz.
7 Degen menen, a'ken'iz mag'an pa'nt berip, xızmet haqımdı on ma'rtelep o'zgertti. Sog'an qaramastan, Quday onın' mag'an jamanlıq etiwine jol qoymadı.
8 Ol: «Jag'al mallar senin' xızmet haqın' boladı», – degende, barlıq su'riw jag'al tuwatug'ın edi. Al ol: «Ala-shubar mallar senin' xızmet haqın' boladı», – degende, barlıq su'riw ala-shubar tuwatug'ın edi.
9 Solay etip, Qudaydın' O'zi a'ken'izdin' malların alıp qoyıp, olardı mag'an berdi.
10 Mallardın' shag'ılısıw ma'wsiminde, bir ku'ni tu's ko'rdim. Tu'simde su'riwdegi urg'ashı mallar menen shag'ılısqan erkek mallardın' ala-shubar ha'm jag'al ekenin ko'rdim.
11 Qudaydın' perishtesi tu'simde mag'an: «Yaqıp!», – dedi. «La'bba'y!», – dedim men.
12 Ol: «Qara, urg'ashı mallar menen shag'ılısqan erkek mallardın' barlıg'ı ala-shubar ha'm jag'al. O'ytkeni Labannın' sag'an ne islep atırg'anının' ha'mmesin ko'rdim.
13 Men sag'an Beyt-Elde ko'ringen Qudayman. Sen ol jerde estelik tasın ornatqan edin' ha'm onın' u'stine za'ytu'n mayın quyıp, Mag'an wa'de bergen edin'. Endi bul jerden ketip, o'zin'nin' tuwılg'an elin'e qayt», – dedi.
14 Sonda Rahila menen Lea Yaqıpqa: – Endi a'kemizdin' u'yinde bizler ushın u'les te, miyras ta qalıp pa edi?
15 Ol ushın bizler jat adamlar sıyaqlı emespiz be? Sebebi ol bizlerdi satıp g'ana qoymastan, bizlerge tiyisli aqshanı da jep qoydı.
16 Sonlıqtan a'kemizden Quday alıp qoyg'an baylıqlardın' ha'mmesi bizlerge ha'm balalarımızg'a tiyisli. Endi Quday sag'an ne aytqan bolsa, sonı isle, – dep juwap berdi.
17 Solay etip, Yaqıp ulları menen hayalların tu'yelerge mindirdi.
18 Ol o'zinin' barlıq malların aldına salıp, Paddan-Aramda arttırg'an barlıq malmu'lkin aldı da, Qanan jerine, a'kesi Isaqqa barıw ushın jolg'a shıqtı.
19 Laban qoylarının' ju'nlerin qırqıwg'a ketkende, Rahila a'kesinin' butlarının' mu'sinlerin urlap aldı.
20 Onın' u'stine, Yaqıp ta o'zinin' ketetug'ının aytpay, aramlı Labandı aldap ketti.
21 Solay etip, ol o'zinin' ha'mme na'rsesin alıp, qashıp ketti ha'm Evfrat da'ryasınan o'tip, tawlı Gilad u'lkesine qaray jol aldı.
22 U'shinshi ku'ni Laban Yaqıptın' qashıp ketkenligi tuwralı xabar taptı.
23 Ol ag'ayin-tuwg'anların janına alıp, onı quwıp ketti. Jeti ku'nnen son', tawlı Gilad u'lkesinde onı quwıp jetti.
24 4Biraq sol ku'ni tu'nde Quday aramlı Labannın' tu'sine enip, og'an: «Abaylı bol, Yaqıpqa jaqsı da, jaman da, hesh na'rse aytpa!» – dedi.
25 Laban Yaqıptı quwıp jetkende, Yaqıp tawlı Gilad u'lkesinde shatırın tigip qoyg'an edi. Laban da o'zinin' ag'ayin-tuwg'anları menen birge sol jerge shatır tikti.
26 Sonda Laban Yaqıpqa bılay dedi: – Bul ne qılg'anın'? Meni aldap, qızlarımdı urısta qolg'a tu'sken tutqın sıyaqlı alıp ketipsen'-g'o.
27 Nege meni aldap, jasırın tu'rde qashıp kettin'? Mag'an nege aytpadın'? Men seni da'p qaqtırıp, lira sherttirip, qosıqlar ayttırıp, oyın-ku'lki menen shıg'arıp salar edim-g'o.
28 Sen, ha'tte, aqlıqlarımdı ha'm qızlarımdı su'yip, xoshlasıwg'a da mu'mkinshilik bermedin'. Sen aqmaqlarsha is tuttın'!
29 Sizlerge jamanlıq islewge ku'shim jetedi. Biraq o'tken tu'nde a'ken'izdin' Qudayı mag'an: «Abaylı bol, Yaqıpqa jaqsı da, jaman da, hesh na'rse aytpa», – dedi.
30 Tu'sinemen, a'ken'nin' u'yin qattı sag'ıng'anın' ushın ketip qalg'ansan'. Biraq nege sen qudaylarımnın' mu'sinlerin urlap kettin'?
31 Yaqıp Labang'a bılay dep juwap berdi: – Men sizdi qızların ku'sh penen tartıp aladı dep qorqtım.
32 Biraq eger qudayların'ızdın' mu'sinlerin kimnen tapsan'ız, ol tiri qalmasın! Ag'ayintuwg'anlarımızdın' ko'z aldında o'zin'iz tekserip ko'rin'. Eger mennen sizin' bir na'rsen'iz tabılsa, alıp ketin'! Yaqıp Rahilanın' butlardın' mu'sinlerin urlag'anın bilmeytug'ın edi.
33 Laban Yaqıptın', Leanın' ha'm eki shorının' shatırların qarap shıqtı, biraq mu'sinlerdi taba almadı. Ol Leanın' shatırınan shıg'ıp, Rahilanın' shatırına kirdi.
34 Rahila butlardın' mu'sinlerin alıp, tu'yenin' erinin' astına qoyıp, onın' u'stine otırıp alg'an edi. Laban shatırdı tolıq tekserip shıqsa da, mu'sinlerdi taba almadı.
35 Rahila a'kesine: – Mırzam, siz kelgenin'izde turıp, ku'tip almag'anım ushın ashıwın'ız kelmesin. O'ytkeni ha'zir hayal-qızlarg'a ta'n jag'daydaman, – dedi. Solay etip, Laban qansha izlese de, mu'sinlerdi taba almadı.
36 Yaqıp ashıwg'a minip, Labang'a baqırınıp so'ylep bılay dedi: – Ayıbım ne? Bu'ytip izimnen quwg'anday, men ne gu'na isledim?
37 Siz menin' barlıq zatlarımdı tintip shıqtın'ız, biraq o'zin'izge tiyisli bir na'rse taptın'ız ba? Eger tapqan bolsan'ız, onı mına jerge, ag'ayintuwg'anlarımızdın' aldına qoyın'. Olar ekewimizge to'relik qılsın
38 Men jigirma jıl sizikinde jasadım. Qoy-eshkilerin'iz hesh qashan ish taslamadı. Sizin' su'riwin'izden bir qoshqar da jemedim.
39 Jabayı haywanlar bawızlap taslag'anların sizin' aldın'ızg'a a'kelmey, za'lelin o'z moynıma alatug'ın edim. Al siz bolsan'ız, malın'ızdın' ku'ndiz yamasa tu'nde urlanıwına qaramastan, mennen ha'r bir malın'ızdın' qunın talap eter edin'iz.
40 Ku'ndiz ıssıdan, tu'nde suwıqtan azap shegetug'ın edim. Ko'zlerimnen uyqı qashatug'ın edi.
41 Menin' sizin' u'yin'izdegi jigirma jıllıq o'mirim usılay o'tti. Men sizge on to'rt jıl eki qızın'ız ushın, altı jıl su'riwin'iz ushın xızmet ettim. Al siz xızmet haqımdı on ret o'zgerttin'iz.
42 Eger de a'kemnin' ha'm babam İbrayımnın' Qudayı, yag'nıy Isaq qorqqan Quday menin' menen birge bolmag'anda, siz meni qurı qol qaytarg'an bolar edin'iz. Biraq Quday menin' shekken azabımdı ha'm islegen awır miynetimdi ko'rip, keshe tu'nde meni jaqlap, to'relik etti.
43 Laban Yaqıpqa bılay dep juwap berdi: – Mına qızlar – menin' qızlarım, bul balalar – menin' aqlıqlarım. Bul su'riwler – menin' su'riwlerim. Sen ko'rip turg'an na'rselerdin' ha'mmesi – meniki. Biraq endi men o'z qızlarıma ha'm olardan tuwılg'an aqlıqlarıma ne isley alaman?
44 Kel, endi aramızda gu'walıq bolatug'ın kelisim du'zeyik.
45 Sonda Yaqıp bir tastı alıp, onı estelik qılıp qoydı.
46 Son' ag'ayintuwg'anlarına: «Tas jıynap kelin'ler», – dedi. Olar taslardı jıynap a'kelip, bir u'yinshik isledi ha'm sol u'yinshiktin' janında otırıp awqat jedi.
47 Laban u'yinshikti Egar-Sahaduta, Yaqıp Gal-Ed dep atadı
48 Laban: «Bu'gin bul u'yinshik bizin' aramızda gu'walıq bolsın», – degenlikten, ol jer Gal-Ed dep ataldı.
49 Sonday-aq u'yinshik Mispa* dep te atalg'an. Sebebi Laban: «Bizler bir-birimizden uzaqlasıp ketkenimizden keyin, Jaratqan İye bizlerdi gu'zetip tursın.
50 Eger sen qızlarıma jaman qatnasta bolsan' yamasa olardın' u'stine hayal alsan', bug'an gu'wa bolatug'ın adam bolmasa da, bilip qoy, Qudaydın' O'zi gu'wa boladı», – degen edi.
51 Laban Yaqıpqa ja'ne bılay dedi: – Minekey, mınaw u'yinshik ha'm ekewimizdin' aramızda men ornatqan estelik.
52 ular menin' sag'an jamanlıq islew ushın usı u'yinshikten arı o'tpeytug'ınıma ha'm senin' de mag'an jamanlıq islew ushın bul u'yinshik ha'm estelikten beri o'tpeytug'ının'a gu'walıq bolsın.
53 İbrayım ha'm Naxordın' Qudayı, olardın' ata-babalarının' Qudayı bizlerge to'relik etsin. Sonda Yaqıp a'kesi Isaq qorqqan Qudaydın' atı menen ant ishti.
54 Son'ınan ol sol tawda qurbanlıq shalıp, ag'ayin-tuwg'anların awqatqa shaqırdı. Olar awqatlanıp bolıp, tawda tu'nep qaldı.
55 Erten'ine Laban tan' azanda turıp, aqlıqların ha'm qızların su'yip, olarg'a pa'tiyasın berdi. Son'ınan ol u'yine qaytıp ketti.
