Jaratılıs 32 bob
1 Yaqıp jolın dawam etip baratırg'anda, og'an Qudaydın' perishteleri dus keldi.
2 Yaqıp olardı ko'rgende: «Bul Quday la'shkerlerinin' ordası eken-g'o!» – dep, ol jerdi Maxanayım dep atadı.
3 Yaqıp Edom jerinde, yag'nıy Seir jerinde jasaytug'ın a'jag'ası Esawg'a o'zinen aldın xabarshılar jiberdi.
4 Yaqıp olarg'a buyırıp: – Mırzam Esawg'a qulı Yaqıptın' usı waqıtqa shekem Labandikinde bolıp, sol jerde jasag'anın,
5 qara mallar, eshekler, qoy-eshkiler, qul ha'm shorılarg'a iye bolg'anın, endi ol mırzasının' kewlin tabıw ushın, bul xabardı jollap atırg'anın aytın'lar, – dedi.Xabarshılar qaytıp kelip, Yaqıpqa: – Bizler a'jag'an'ız Esawg'a bardıq. Ol to'rt ju'z adam menen birge sizdi qarsı alıwg'a kiyatır, – dedi.
6 Xabarshılar qaytıp kelip, Yaqıpqa: – Bizler a'jag'an'ız Esawg'a bardıq. Ol to'rt ju'z adam menen birge sizdi qarsı alıwg'a kiyatır, – dedi.
7 Sonda Yaqıp qattı qorqıp, albırap qaldı. Ol adamların, qoy-eshkilerin, qara malların ha'm tu'yelerin eki toparg'a bo'ldi.
8 Yaqıp: «Eger Esaw kelip, bir topardı qırıp taslasa, ekinshi topar qutılıp qalıwı mu'mkin», – dep oyladı.
9 Son'ınan Yaqıp bılay dep duwa etti: «Atam İbrayımnın' ha'm a'kem Isaqtın' Quday İyesi! Sen mag'an: „O'z elin'e ha'm tuwg'an-tuwısqanların'a qayt, Men sag'an jaqsılıq qılaman“, – degen edin'.
10 Mendey qulın'a ko'rsetken barlıq jaqsılıg'ın'a ha'm sadıqlıg'ın'a ılayıqlı emespen. Men İordan da'ryasın kesip o'tkenimde, tayag'ımnan basqa hesh na'rsem joq edi. Endi bolsa, eki topar bolıp qayttım.
11 Jalbarınaman, meni a'jag'am Esawdan qorg'a! O'ytkeni men onın' kelip, meni ha'm menin' balalarımdı anaları menen birge o'ltiriwinen qorqaman.
12 Sen mag'an: „Sag'an jaqsılıq qılaman, urpag'ın'dı ten'izdin' qumınday sansız etip ko'beytemen“, – degen edin'».
13 Yaqıp tu'ndi sol jerde o'tkizdi. Ol o'zinde bar zatlardan ag'ası Esawg'a sawg'a etiw ushın ajırattı.
14 Olar: eki ju'z bas eshki, jigirma bas teke, eki ju'z bas qoy, jigirma bas qoshqar,
15 otız bas botalı tu'ye, qırıq bas sıyır, on bas bug'a, jigirma urg'ashı ha'm on erkek eshek edi.
16 Yaqıp olardı padalarg'a bo'lip, qullarına tapsırdı ha'm olarg'a: – Menin' aldımda ju'rin'ler, ha'r padanın' arasında aralıq bolsın, – dedi.
17 Ol birinshi bolıp ju'retug'ın qulg'a bılay dep buyrıq berdi: – A'jag'am Esaw seni ushıratıp, sennen: «Kimnin' qulısan'? Qayaqqa baratırsan'? Aldın'dag'ı mına pada kimdiki?» – dep sorasa,
18 og'an: «Bular qulın'ız Yaqıptiki. Olar mırzam Esawg'a jiberilgen sawg'a. Mine, onın' o'zi de bizin' izimizden kiyatır», – dep ayt.
19 Yaqıp ekinshi, u'shinshi bolıp kiyatırg'an qullarg'a ha'm padalardı aydap kiyatırg'anlardın' ha'mmesine de buyırıp: – Esaw menen ushırasqanın'ızda, sizler de solay aytın'lar.
20 «Qulın'ız Yaqıp izimizde kiyatır», – den'ler, – dedi. Sebebi Yaqıp: «O'zimnen burın jibergen sawg'alarım menen onın' ju'regin jibitkenimnen son' g'ana, onın' ko'zine ko'rineyin, mu'mkin, sonda ol meni qabıl eter», – dep oyladı.
21 Solay etip, Yaqıptın' sawg'aları o'zinen aldın jiberildi, al o'zi qonıslag'an jerinde tu'nep qaldı.
22 Sol ku'ni tu'nde Yaqıp ornınan turıp, eki hayalın, eki shorısın ha'm on bir ulın janına alıp, Yabboq da'ryasının' o'tkelinen o'tti.
23 Olardı da'ryadan o'tkizgennen son', o'zinin' barlıq zatların da o'tkizdi.
24 Keyin Yaqıp jalg'ız o'zi qaldı. Sonda bir adam onın' menen tan' atqansha gu'resti.
25 Ol Yaqıptı jen'e almaytug'ının bilgende, Yaqıptın' jambasına urıp jiberdi ha'm onın' jambas su'yegi shıg'ıp ketti.
26 Sonda Ol adam: – Meni jiber, tan' atıp kiyatır, – dedi. Biraq Yaqıp Og'an: – Mag'an pa'tiyan'dı bermegenin'she, Seni jibermeymen! – dedi.
27 Ol adam Yaqıptan: – Atın' kim? – dep soradı. Ol: – Yaqıp, – dep juwap berdi.
28 Sonda Ol adam: – Bunnan bılay, sen Yaqıp emes, al İzrail dep atalasan'. O'ytkeni sen Quday ha'm adamlar menen gu'resip, jen'ip shıqtın', – dedi.
29 Yaqıp Og'an: – O'tinish, atın'ızdı aytın'ız? – dedi. Biraq Ol adam: – Ne ushın Menin' atımdı sorap atırsan'? – dedi. Son'ınan Ol sol jerde Yaqıpqa pa'tiyasın berdi.
30 Yaqıp: «Men Qudaydı ju'zbe-ju'z ko'rdim, biraq tiri qaldım», – dep sol jerdi Penuel dep atadı.
31 Ol Penuelden ketip baratırg'anda, ku'n shıqtı. Jambası awırg'anlıqtan, ol aqsan'lap ju'rdi.
32 Yaqıptın' jambas su'yegindegi sin'iri zaqım ko'rgenlikten, izraillılar usı ku'nge deyin jambas su'yektin' sin'irin jemeydi.
