Jaratılıs 33 bob
1 Yaqıp qarap, Esawdın' to'rt ju'z adam menen kiyatırg'anın ko'rdi. Sonda Yaqıp balalardı Leag'a, Rahilag'a ha'm eki shorısına bo'lip tapsırdı.
2 Ol eki shorısı menen olardın' balaların aldına, Leanı ha'm onın' balaların ortag'a, Rahila menen Yusupti en' son'ına qoydı.
3 Yaqıptın' o'zi ha'mmesinin' aldına shıg'ıp, a'jag'asının' janına jetkenshe, jerge deyin iyilip, jeti ret ta'jim etti.
4 Biraq Esaw Yaqıptı qarsı alıw ushın juwırıp bardı da, onı moynınan qushaqlap su'ydi ha'm olar ekewi de jılap jiberdi.
5 Son'ınan Esaw qarap, hayallar menen balalardı ko'rdi ha'm Yaqıptan: – Janın'dag'ı bul adamlar kimler? – dep soradı. Yaqıp og'an: – Bular Qudaydın' sizin' qulın'ızg'a sıylag'an balaları, – dep juwap berdi.
6 Sonda shorılar ha'm olardın' balaları jaqınlap kelip, ta'jim etti.
7 Keyin Lea ha'm onın' balaları, en' aqırında Yusup ha'm Rahila kelip, og'an ta'jim etti.
8 Esaw Yaqıptan: – Jolda men ushıratqan adamlar menen padalardı ne ma'niste jiberdin'? – dep soradı. Yaqıp og'an: – Mırzamnın' kewlin tabıw ushın jiberdim, – dep juwap berdi.
9 Biraq Esaw Yaqıpqa: – İnim, menin' du'nya-malım ko'p, o'zin'diki o'zin'e buyırsın, – dedi.
10 Yaqıp: – Yaq, eger mag'an kewlin'iz tolg'an bolsa, sawg'amdı qabıl etin'. Sizin' ju'zin'izdi ko'rip, Qudaydın' ju'zin ko'rgendey boldım. O'ytkeni siz meni jıllı ju'zlilik penen qarsı aldın'ız.
11 O'tinish, sizge jibergen sawg'alarımdı qabıl etin'. Sebebi Quday mag'an jaqsılıq islegenlikten, mende ha'mme na'rse bar, – dedi. Yaqıp jalınıp qoymag'anlıqtan, Esaw sawg'alardı qabıl etti.
12 Son'ınan Esaw: – Ju'rin'ler keteyik. Men senin' aldın'da ju'remen, – dedi.
13 Biraq Yaqıp og'an: – Mırzam, o'zin'iz bilesiz, balalarım jas, qoy ha'm sıyırlarım da to'llegen. Eger mallardı bir ku'n qattı aydasaq, ha'mmesi o'lip qaladı.
14 Mırzam, qulın'ızdan aldın kete berin'. Men mallarımnın' ha'm balalarımnın' ju'risine qarap, a'ste-aqırın bara beremen. Solay etip, Seirde mırzama jetip alaman, – dedi.
15 Esaw og'an: – Janımdag'ı adamlardın' bir neshesin sag'an qaldırıp keteyin, – dedi. Biraq Yaqıp: – Bunın' ha'jeti joq. Mırzamnın' mag'an kewli tolg'anının' o'zi jetkilikli, – dedi.
16 Solay etip, Esaw sol ku'ni Seirge qaytıp ketti.
17 Al Yaqıp Sukkotqa ketip, sol jerde o'zi ushın u'y, malları ushın qoralar qurdı. Sonlıqtan sol jer Sukkot dep ataldı.
18 Son'ınan Yaqıp Paddan-Aramnan Qanan jerinin' Shexem qalasına aman-esen qaytıp kelip, qalanın' sırtına shatırların tikti.
19 l shatırların tikken usı jerdi Shexemnin' a'kesi Xamordın' ullarınan ju'z kesita gu'miske satıp aldı.
20 Yaqıp ol jerde qurbanlıq orın qurıp, onı El-Eloheİzrail dep atadı.
