Jaratılıs 37 bob
1 Yaqıp a'kesi kelgindi bolıp jasag'an Qanan jerinde jasay berdi.
2 Yaqıptın' urpaqlarının' tariyxı to'mendegishe: Yusup on jeti jasar waqtında a'jag'alarına, yag'nıy a'kesinin' hayalları Bilha menen Zilpanın' ullarına qoy-eshkilerdi bag'ısatug'ın edi. Ol a'kesine a'jag'alarının' jaman isleri haqqında jetkizip turatug'ın edi.
3 İzrail Yusupti basqa barlıq ullarınan go're ko'birek jaqsı ko'rdi, o'ytkeni ol İzraildın' qartayg'an shag'ında ko'rgen ulı edi. A'kesi Yusupke nag'ıslı shapan tikkizip berdi.
4 Yusuptin' a'jag'aları a'kesinin' onı o'zlerinen go're ko'birek jaqsı ko'retug'ının bilgende, onı jek ko'rip qaldı ha'm endi onın' menen jıllı so'ylese almaytug'ın boldı.
5 Bir ku'ni Yusup tu's ko'rdi. Ol o'z tu'sin a'jag'alarına aytıp bergende, olar Yusupti burıng'ıdan da beter jek ko'rip qaldı.
6 Yusup a'jag'alarına: – Men ko'rgen tu'simdi aytıp bereyin, tın'lan'lar!
7 Tu'simde bizler atızda da'stelerdi bawlap atırg'an ekenbiz. Birden menin' bawlag'an bawım jerden ko'terilip, tik turdı. Al sizlerdin' bawların'ız menin' bawımdı do'gereklep, og'an ta'jim etti, – dedi.
8 Yusuptin' a'jag'aları og'an: – Sen ele bizlerdin' u'stimizden patsha bolıp, bizlerdi basqarmaqshımısan'? – dedi. Ko'rgen tu'sin aytqanı sebepli a'jag'aları onı burıng'ıdan da beter jek ko'rip qaldı.
9 Keyin Yusup tag'ı bir tu's ko'rdi ha'm onı da a'jag'alarına aytıp berip bılay dedi: – Tın'lan'lar, men ja'ne bir tu's ko'rdim. Tu'simde quyash, ay ha'm on bir juldız mag'an ta'jim etip atırg'an eken.
10 Yusup bul tu'sin a'kesine de aytıp bergende, a'kesi og'an keyip: – Sen qanday tu's ko'rdin' o'zi? Sonda ne men, anan' ha'm a'jag'aların' aldın'a kelip, jerge deyin iyilip, ta'jim etemiz be? – dedi.
11 A'jag'aları Yusupke qızg'anısh penen qarawdı dawam etti, biraq a'kesi onın' so'zlerin esinde saqlap qaldı.
12 Bir ku'ni Yusuptin' a'jag'aları a'kesinin' qoy-eshkilerin bag'ıw ushın Shexemge ketti.
13 İzrail Yusupke: – A'jag'aların'nın' Shexemde qoy-eshkilerdi bag'ıp atırg'anın bilesen'. Bar, men seni olarg'a jibereyin, – dedi. – Yaqshı, – dedi Yusup.
14 A'kesi og'an: – Barıp, a'jag'aların'nın' ha'm su'riwdin' jag'dayın bilip qayt, – dep onı Xebron oypatlıg'ınan Shexemge jiberdi. Yusup Shexemge jetip barıp,
15 dalada adasıp ju'rgende, bir adam onı ko'rip: – Ne izlep ju'rsen'? – dep soradı.
16 Yusup og'an: – Men a'jag'alarımdı izlep ju'rmen. Olardın' qoy-eshkilerdi qay jerde bag'ıp ju'rgenin bilmeysiz be? – dedi.
17 Ol adam Yusupke: – Olar bul jerden ketip qaldı. «Dotang'a baramız», degenin esitip qaldım, – dedi. Solay etip, Yusup a'jag'alarının' izinen ketip, olardı Dotannan taptı.
18 A'jag'aları Yusupti uzaqtan ko'rdi ha'm ol ele qaslarına jetip kelmesten burın, onı o'ltiriwge til biriktire basladı.
19 Olar bir-birine: – A'ne, tu's ko'rgish kiyatır!
20 Kelin'ler, onı o'ltirip, bir suw saqlanatug'ın shuqırg'a taslayıq. Son'ınan onı jırtqısh haywan jep ketipti, dep aytamız. Sonda onın' ko'rgen tu'slerinin' ne bolatug'ının ko'remiz! – dedi.
21 Ruben bunı esitkende, Yusupti olardın' qolınan qutqarmaqshı bolıp, olarg'a: – Onı o'ltirmeyik.
22 Qan to'kpeyik, onı usı sho'ldegi bir suw saqlanatug'ın shuqırg'a taslayıq, biraq o'zine tiymeyik, – dedi. Onın' niyeti Yusupti qutqarıp, a'kesine qaytarıw edi.
23 Yusup a'jag'alarının' janına kelgende, olar onın' u'stindegi nag'ıslı shapandı sheship alıp,
24 o'zin bir suwsız, bos shuqırg'a taslap jiberdi.
25 A'jag'aları awqatlanıw ushın jayg'asıp otırg'anda, Gilad ta'repten kiyatırg'an ismayıllılardın' ka'rwanın ko'rdi. Olar tu'yelerine ha'r tu'rli xosh iyisli shayırlardı ju'klep, Mısırg'a ketip baratır edi.
26 Yahuda ag'ainilerine: – İnimizdi o'ltirip, onın' qanın jasırg'anımızdan ne payda?
27 Jaqsısı, onı ismayıllılarg'a satayıq, sonda qolımız onın' qanına bılg'anbaydı. Sebebi ol bizler menen qanı bir tuwısqanımız-g'o, – dedi. Tuwısqanlar bug'an ırazı boldı.
28 Midyanlı sawdagerler, yag'nıy ismayıllılar sol jerden o'tip baratırg'anda, a'jag'aları Yusupti shuqırdan shıg'arıp aldı da, onı sol sawdagerlerge jigirma shekel gu'miske satıp jiberdi. Olar Yusupti Mısırg'a alıp ketti.
29 Ruben shuqırg'a qaytıp kelgende, Yusuptin' shuqırdın' ishinde joq ekenin ko'rip, qayg'ıdan kiyimlerin jırttı.
30 Ol inilerinin' janına qaytıp barıp, olarg'a: – Bala ol jerde joq, endi men ne qılaman, – dedi.
31 Sonda olar bir tekeni soyıp, Yusuptin' nag'ıslı shapanın alıp, onı tekenin' qanına bılg'adı.
32 Son'ınan shapandı a'kesine jiberip: – Bizler mınanı tawıp aldıq. Qara, bul ulın'nın' shapanı emes pe? – dep sorattı.
33 Yaqıp shapandı tanıp: – Awa, bul – ulımnın' shapanı! Onı jırtqısh haywan jep ketip, Yusup tilkim-tilkim bolg'an eken-g'o, – dedi.
34 Yaqıp qayg'ıdan kiyimin jırtıp, aza kiyimin kiyip aldı ha'm ulı ushın uzaq waqıt aza tuttı.
35 Barlıq ul-qızları og'an ta'selle berse de, ol jubang'ısı kelmey: «Men ulımnın' janına, o'liler ma'kanına usı qayg'ım menen ketemen», – dep ulın joqlawdı dawam etti.
36 Sol arada midyanlılar Yusupti Mısırda faraonnın' saray xızmetshisi Potifarg'a satıp jiberdi. Ol saqshılardın' basshısı edi.
