Jaratılıs 38 bob
1 Sol waqıtları Yahuda tuwısqanlarınan bo'linip, adullamlı Xira degen adamnın' qasına barıp ornalastı.
2 Yahuda sol jerde Shua degen qananlı bir adamnın' qızın ushıratıp, og'an u'ylendi.
3 Hayal ha'miledar bolıp, ul tuwdı. Yahuda og'an Er dep at qoydı.
4 Hayalı ja'ne ha'miledar bolıp, ul tuwdı ha'm og'an Onan dep at qoydı.
5 Ol tag'ı bir ul tuwıp, onın' atın Shela dep qoydı. Ol tuwılg'anda, Yahuda Kezibte edi.
6 Yahuda tun'g'ıshı Erdi bir qızg'a u'ylendirdi. Qızdın' atı Tamara edi.
7 Yahudanın' tun'g'ıshı Er Jaratqan İyenin' na'zerinde nahaq adam bolg'anlıqtan, Jaratqan İye onın' janın aldı.
8 Sonda Yahuda Onang'a: – Qa'yinlik wazıypan'dı orınlap, jen'gen'e u'ylen ha'm a'jag'an'nın' urpag'ın dawam ettir, – dedi.
9 Biraq Onan Tamaradan tuwılg'an balalardın' o'ziniki bolmaytug'ının biletug'ın edi. Sonlıqtan ol a'jag'asının' hayalı menen jatqanda, a'jag'asınan urpaq qalmasın dep, urıg'ın jerge to'gip jiberetug'ın edi.
10 Onın' bul isi Jaratqan İyenin' na'zerinde nahaqlıq bolg'anlıqtan, Jaratqan İye onın' da janın aldı.
11 Sonda Yahuda kelini Tamarag'a: – A'ken'nin' u'yine qaytıp, ulım Shela erjetkenshe, sol jerde jesir bolıp jasay tur, – dedi. Sebebi Yahuda: «Shela da a'jag'aları sıyaqlı o'lip qalar», – dep oylaytug'ın edi. Solay etip, Tamara a'kesinin' u'yine qayttı.
12 Aradan ko'p waqıt o'tkennen son', Shuanın' qızı, yag'nıy Yahudanın' hayalı qaytıs boldı. Azalaw mu'ddeti tamam bolg'annan son', Yahuda dostı adullamlı Xira menen birge Timnag'a, o'zinin' qoyların qırqıp atırg'an adamlarg'a ketti.
13 Tamarag'a: «Qa'yin atan' qoyların qırıqtırıw ushın Timnag'a ketip baratır», – degen xabar jetti.
14 Shela erjetse de, Yahuda Tamaranı Shelag'a hayallıqqa alıp bermegen edi. Sonlıqtan Tamara u'stindegi jesirlik kiyimlerin sheship, ju'zin jawlıq penen jawdı da, Timnag'a baratug'ın jol boyındag'ı Enayım da'rwazasının' aldına barıp otırdı.
15 Yahuda Tamaranı ko'rgende, onı buzıq hayal dep oyladı. O'ytkeni onın' ju'zi jabıq edi.
16 Yahuda joldan hayal ta'repke burılıp keldi de, onın' o'zinin' kelini ekenin bilmey, og'an: – Senin' menen jatayın, – dedi. Hayal og'an: – Menin' menen jatsan'ız, mag'an ne beresiz, – dep soradı.
17 Yahuda: – Su'riwimnen sag'an bir ılaq berip jiberemen, – dedi. – Ilag'ın'ızdı jibergenin'izshe, kepillikke bir na'rse beresiz be? – dedi hayal.
18 Yahuda onnan: – Kepillikke ne bereyin? – dep soradı. Tamara og'an: – Mo'rin'izdi jibi menen ha'm qolın'ızdag'ı hasan'ızdı berin', – dedi. Yahuda sol na'rselerdi berip, onın' menen jattı. Tamara onnan ha'miledar boldı.
19 Tamara u'yine qaytıp kelip, ju'zindegi jawlıg'ın sheship tasladı da, ja'ne jesirlik kiyimlerin kiyip aldı.
20 Sol arada Yahuda kepillikke qaldırg'an na'rselerin qaytarıp alıw ushın, adullamlı dostı arqalı hayalg'a bir ılaq jiberdi. Degen menen, dostısı hayaldı taba almadı.
21 Sonda dostısı sol jerdin' adamlarınan: – Enayımda, jol shetinde bir buzıq hayal bar edi, ol qayaqta? – dep soradı. Olar: – Bul jerde onday hayal joq, – dep juwap berdi.
22 Dostısı Yahudanın' janına qaytıp kelip: – Hayaldı taba almadım. Sol jerdin' adamları da ol jerde hesh qanday buzıq hayaldın' bolmag'anın ayttı, – dedi.
23 Yahuda: – Meyli, sol zatlar hayalda qala bersin. Tek hesh kimge masqara bolmasaq bolg'anı. Men ılaqtı jibergen edim, biraq sen hayaldı taba almadın', – dedi.
24 Shama menen u'sh ayday waqıt o'tkende, Yahudag'a: «Kelinin' Tamara buzıqshılıq islepti, ol ha'zir ha'miledar», – degen xabar jetti. Sonda Yahuda: – Onı dalag'a alıp shıg'ıp, jag'ıp jiberin'ler, – dedi.
25 Tamaranı dalag'a alıp shıqqanda, ol qa'yin atasına: «Men mına zatlardın' iyesinen ha'miledar boldım. Anıqlap qaran', bul mo'r, onın' jibi ha'm hasa kimdiki?» – dep xabar jiberdi.
26 Yahuda zatlardı tanıp: «Haqıyqatlıq ol ta'repte, sebebi men onı ulım Shelag'a alıp bermedim», – dedi. Sonnan keyin, Yahuda Tamara menen qaytıp jaqınlasqan joq.
27 Tamaranın' tuwıw waqtı kelgende, qarnında egiz bala barlıg'ı ma'lim boldı.
28 Ol bosanıp atırg'an waqıtta, egizlerdin' biri qolın sırtqa shıg'ardı. Kindik sheshesi balanın' qolın uslap: – Bul birinshi bolıp tuwıldı, – dep onın' bilegine qırmızı jip baylap qoydı.
29 Biraq ol qolın ishke tartıp aldı ha'm sol waqıtta onın' sın'arı tuwıldı. Sonda kindik sheshesi: – Sen qalayınsha tosqınlıqtı buzıp o'ttin'? – dedi. Sonlıqtan og'an Peres dep at qoyıldı.
30 Son'ınan bilegine qırmızı jip baylang'an onın' sın'arı tuwıldı. Og'an Zerax dep at qoydı.
