Jaratılıs 4 bob
1 Adam hayalı Hawa menen jaqınlasqannan son', hayalı ha'miledar bolıp, Kaindı tuwdı. Sonda Hawa: «Men Jaratqan İyenin' ja'rdemi menen adamdı du'nyag'a keltirdim», – dedi.
2 Son'ınan ol tag'ı da Kainnın' inisi Abıldı tuwdı. Abıl shopan, al Kain diyxan boldı.
3 Aradan bir neshe waqıt o'tkennen son', Kain jerdin' o'niminen Jaratqan İyege qurbanlıq berdi.
4 Abıl da o'zinin' su'riwindegi tun'g'ısh to'llerdin' bir neshesin a'kelip, olardın' maylı bo'leklerin qurbanlıqqa berdi. Jaratqan İye Abıldı ha'm onın' qurbanlıg'ın qabıl etti.
5 Biraq Kaindı ha'm onın' qurbanlıg'ın qabıl etpedi. Sonda Kain qattı ashıwlanıp, qabag'ı qarıs jawıldı.
6 Jaratqan İye Kaing'a: – Sen ne ushın ashıwlanasan'? Nege qabag'ın' qarıs jawıladı?
7 Eger niyetin' jaqsı bolsa, basın'dı ko'terip ju'rmes pe edin'? Biraq, eger niyetin' jaman bolsa, esik aldında gu'na jatır. Ol seni o'zine tartadı, biraq sen onnan u'stem bol, – dedi.
8 Kain inisi Abılg'a: – Ju'r, atızg'a barayıq! – dedi. Olar atızda bolg'an waqıtta Kain inisi Abılg'a topılıp, onı o'ltirdi.
9 Jaratqan İye Kainnan: – İnin' Abıl qay jerde? – dep soradı. Ol: – Bilmeymen, men ne inimnin' qarawılıman ba? – dep juwap berdi.
10 Sonda Jaratqan İye bılay dedi: – Sen ne islep qoydın'? İnin'nin' qanı Mag'an jerden nala etip atır.
11 Senin' o'z qolın' menen o'ltirgen inin'nin' qanın ishiw ushın awzın ashqan jerden endi sen quwıp jiberilip, na'letiy bolasan'.
12 Bunnan bılay, ta'rbiyalag'an jerin' o'nim bermeytug'ın boladı ha'm sen jer betinde turaqlay almay, gezendege aylanasan'.
13 Kain Jaratqan İyege: – Menin' jazam ko'tere almaytug'ın da'rejede awır.
14 Bu'gin Sen meni bul jerlerden quwıp atırsan', endi men Senin' ko'zin'nen tasa bolıp, bir jerde turaqlay almay, gezendege aylanaman. Meni dus kelgen adam o'ltirip ketiwi mu'mkin-g'o, – dedi.
15 Sonda Jaratqan İye og'an: – Yaq! Eger kim de kim seni o'ltirse, onnan jeti ese o'sh alınadı, – dedi. Solay etip, Kaing'a duslasqan hesh bir adam onı o'ltirmewi ushın, Jaratqan İye og'an bir belgi saldı.
16 Kain Jaratqan İyenin' janınan ketip, Edennin' shıg'ısındag'ı Nod* degen jerge ornalastı.
17 Kain hayalı menen jaqınlasqannan son', hayalı ha'miledar bolıp, Xanoxtı tuwdı. Sol waqıtta Kain bir qala salıp atır edi. Ol qalag'a ulı Xanoxtın' atın qoydı.
18 Xanoxtan İrad tuwıldı. İradtan Mexuyael, Mexuyaelden Metushael, Metushaelden Lamex tuwıldı.
19 Lamex eki hayal aldı: birinshisinin' atı – Ada, ekinshisinin' atı – Silla edi.
20 Ada Yabaldı tuwdı. Ol shatırlarda jasawshı sharwalardın' tu'p babası boldı.
21 İnisinin' atı Yubal edi. Ol barlıq lira ha'm sıbızg'ı shertetug'ınlardın' tu'p babası boldı.
22 Al Silla Tubal-Qayındı tuwdı. Ol barlıq qola ha'm temir quralların islewshi boldı. Tubal-Qayınnın' qarındası Naama edi.
23 Lamex hayallarına bılay dedi: «Ha'y, Ada ha'm Silla, meni tın'lan'lar! Lamextin' hayalları, So'zime qulaq salın'lar! Meni jaraqatlag'anı ushın bir er adamdı, Urg'anı ushın bir jas jigitti o'ltiremen.
24 Eger Kain ushın o'sh alınsa jeti ese, Lamex ushın o'sh alınar jetpis ese».
25 Adam hayalı menen tag'ı jaqınlasqannan son', hayalı bir ul tuwdı. Ol: «Quday Kain o'ltirgen Abıldın' ornına mag'an basqa perzent berdi», – dep, balag'a Shet dep at qoydı.
26 Shetten de bir ul tuwılıp, onın' atın Enosh dep qoydı. Adamlar sol waqıttan baslap Jaratqan İyenin' atın aytıp shaqıra basladı.
