Jaratılıs 42 bob
1 Yaqıp Mısırda g'a'lle bar ekenin bilgende, ullarına: – Nege bir-birin'izge qarap otırsızlar?
2 Men Mısırda g'a'lle bar ekenin esittim. O'lmey tiri qalıwımız ushın, sizler ol jaqqa barıp, g'a'lle satıp alıp kelin'ler, – dedi.
3 Solay etip, Yusuptin' on a'jag'ası g'a'lle satıp alıw ushın, Mısırg'a ketti.
4 Biraq Yaqıp Yusuptin' inisi Benyamindi olar menen birge jibermedi. Sebebi ol ulının' bir ba'lege jolıg'ıwınan qorqatug'ın edi.
5 Solay etip, g'a'lle satıp alıwg'a kelgenler menen birge İzraildın' ulları da Mısırg'a keldi. O'ytkeni Qanan jerinde de ashlıq bolıp atırg'an edi.
6 Yusup Mısır elinin' basshısı bolıp, eldegi pu'tkil xalıqqa g'a'lle satatug'ın edi. Sonda Yusuptin' ag'aları kelip, onın' aldında man'layları jerge tiygenshe iyilip, ta'jim etti.
7 Yusup ag'aların ko'rip, olardı tanıdı. Biraq o'zin olardı tanımaytug'ınday qılıp ko'rsetip, qatal so'yledi ha'm olardan: – Qayaqtan keldin'ler? – dep soradı. Olar Yusupke: – Bizler azıq-awqat satıp alıw ushın, Qanan jerinen keldik, – dep juwap berdi.
8 Yusup ag'aların tanısa da, ag'aları onı tanımadı.
9 Yusup olar haqqında ko'rgen tu'slerin eslep, olarg'a: – Sizler jansızlarsız! Bul eldin' ha'lsiz jerlerin biliw ushın kelgensizler, – dedi.
10 Olar Yusupke: – Yaq, mırzamız! Sizin' qulların'ız bolg'an bizler azıq-awqat satıp alıw ushın keldik.
11 Bizler ha'mmemiz bir a'kenin' ullarımız. Sizin' qulların'ız bolg'an bizler hadal adamlarmız, jansız emespiz, – dedi.
12 Yusup olarg'a ja'ne: – Yaq, sizler eldin' ha'lsiz jerlerin biliw ushın kelgensizler, – dedi.
13 Olar: – Sizin' qulların'ız bolg'an bizler on eki tuwısqanbız. Ha'mmemiz Qanan jerinde jasaytug'ın bir a'kenin' ullarımız. En' kishkenemiz ha'zir a'kemizdin' janında, al basqa birewi joytılıp ketti, – dedi.
14 Yusup olarg'a bılay dedi: – A'ne, aytqanımday, sizler jansızlarsız.
15 Endi sizler sınawdan o'tesiz. Eger genje inin'iz bul jerge kelmese, faraonnın' bası menen ant ishemen, sizler bul jerden ketpeysizler.
16 Aran'ızdan birin'izdi jiberin', ol barıp, inin'izdi alıp kelsin. Al qalg'anların'ız qamaqta turasızlar. So'zlerin'izdin' haqıyqat yamasa jalg'an ekenligin tekserip ko'remiz. Eger so'zlerin'iz jalg'an bolsa, faraonnın' bası menen ant ishemen, sizler jansızlarsız.
17 Solay etip, Yusup ag'aların u'sh ku'nge qamatıp qoydı.
18 U'shinshi ku'ni olarg'a: – Men Qudaydan qorqatug'ın adamman. Eger sizler bılay islesen'iz, bir qasıq qanın'ızdan keshemen:
19 o'zlerin'izdin' hadal adamlar ekenligin'izdi da'lillewin'iz ushın, aran'ızdag'ı birin'iz qamaqta qalsın, al qalg'anların'ız ash qalg'an xojalıqların'ız ushın g'a'lle alıp ketin'ler.
20 Son'ınan kishkene inin'izdi mag'an alıp kelin'ler. Sonda so'zlerin'izdin' haqıyqıy ekenligi da'lillenip, o'limnen aman qalasızlar, – dedi. Olar bug'an kelisim berdi.
21 Olar bir-birine: «Shınında da, bizler inimizge islegen isimiz ushın jazalanıp atırmız. Ol bizlerge jalbarıng'anda, onın' qalay qıynalg'anın ko'rsek te, onı tın'lamadıq. Sol sebepten bizlerdin' basımızg'a da usı qıyınshılıq tu'sti», – desti.
22 Ruben olarg'a: – «Balag'a jamanlıq islemen'ler», – dep sizlerge eskertpegen be edim? Biraq sizler tın'lamadın'lar. Mine, ha'zir onın' qanının' qunı bizlerden talap etilip atır, – dedi.
23 Yusuptin' o'zlerin tu'sinetug'ının ag'aları bilmedi, sebebi Yusup olar menen dilmash arqalı so'ylesken edi.
24 Yusup ag'alarının' janınan ketip, jılap jiberdi. Son'ınan qaytıp kelip, olar menen so'ylesti ha'm aralarınan Shimondı tutqıng'a alıp, basqalarının' ko'z aldında baylatıp qoydı.
25 Yusup ag'alarının' qapların g'a'llege toltırıwdı, gu'mislerin ha'r birinin' qabına qaytarıp salıwdı ha'm jol azıg'ın beriwdi buyırdı. Aytılg'an so'z orınlandı.
26 Yusuptin' ag'aları g'a'llelerin esheklerine artıp, jolg'a tu'sti.
27 Tu'negen jerinde olardın' birewi eshegine jem bereyin dep qaptın' awzın ashtı ha'm o'zinin' gu'misinin' qaptın' awzında turg'anın ko'rdi.
28 Ol tuwısqanlarına: – Gu'misimdi qaytarıp beripti. Mine, ol qabımnın' ishinde eken, – dedi. Sonda olardın' ju'rekleri suwlap, qaltırasıp, bir-birine: – Qudaydın' bizlerge bul ne qılg'anı? – dedi.
29 Olar Qanang'a, a'kesi Yaqıpqa qaytıp kelip, baslarınan keshirgenlerinin' ha'mmesin aytıp berip, bılay dedi:
30 – Sol eldin' basshısı bizler menen qatal so'ylesip, bizlerdi elge kelgen jansızlar dep esapladı.
31 Bizler og'an: «Bizler hadal adamlarmız, jansızlar emespiz.
32 Bizler on eki tuwısqan bolıp, bir a'kenin' ullarımız. Bir inimiz joytılıp ketti, al kishkene inimiz ha'zir Qananda, a'kemizdin' janında qaldı», – dedik.
33 Sol eldin' basshısı bizlerge: «Sizlerdin' hadal adamlar ekenligin'izdi men mınadan bilemen: tuwısqanın'ızdın' birewin qasımda qaldırın' da, al qalg'anların'ız ash qalg'an xojalıqların'ız ushın g'a'lle alıp, kete berin'ler.
34 Al genje inin'izdi mag'an alıp kelesizler. Men sonda sizlerdin' jansız emes, al hadal adamlar ekenligin'izdi bilemen ha'm tuwısqanın'ızdı sizlerge qaytarıp beremen. Sonda sizler bul elde sawda isley alasızlar», – dedi.
35 Olar qapların bosatıp atırıp, ha'r qaysısı o'z qabının' ishinen tu'yiwli gu'misin tawıp aldı. Tu'yiwli gu'mislerin ko'rgende, olardın' o'zleri de, a'kesi de qorqıp ketti.
36 Sonda Yaqıp ullarına: – Sizler meni perzentlerimnen ayırdın'lar: Yusup joq, Shimon joq, endi Benyamindi de alıp ketpekshisizler. Man'layım bunshelli qara bolmasa! – dedi.
37 Ruben a'kesine: – Eger men Benyamindi qaytarıp a'kelmesem, menin' eki ulımdı o'ltire g'oy. Benyamindi mag'an tapsır, men onı sag'an qaytarıp a'kelemen, – dedi.
38 Biraq Yaqıp: – Ulımdı sizler menen jibermeymen, o'ytkeni ag'ası o'lip, ol jalg'ız qaldı. Eger ol jolda bir ba'lege jolıqsa, sizler menin' g'arrı basımdı sol qayg'ı menen o'liler ma'kanına jiberesizler, – dedi.
