Jaratılıs 43 bob
1 Qanan jerindegi ashlıq ku'shli edi.
2 Mısırdan alıp kelingen g'a'lle tawısılg'annan keyin, Yaqıp ullarına: – Ja'ne barıp, az-maz azıq-awqat satıp a'kelin'ler, – dedi.
3 Yahuda a'kesine bılay dedi: – Ol adam bizlerge: «Eger inin'iz sizler menen birge kelmese, ko'zime ko'rinben'ler», – dep qatan' aytqan edi.
4 Eger inimizdi bizler menen birge jibersen', barıp, sag'an azıq-awqat alıp kelemiz.
5 Eger jibermesen', bizler bara almaymız, sebebi ol adam: «İnin'iz sizler menen birge kelmese, ko'zime ko'rinben'», – degen edi.
6 İzrail: – Ne ushın sizler ol adamg'a ja'ne bir inin'izdin' bar ekenin aytıp, menin' basımdı ba'lege qoydın'ız? – dedi.
7 Olar a'kesine: – Ol adam bizlerden o'zlerimiz ha'm tuwısqanlarımız haqqında shuqlap sorap: «A'ken'iz ele tiri me? Basqa tuwısqanın'ız bar ma?» – degende, bizler onın' sorawlarına juwap berdik. Onın' bizlerge: «İnin'izdi alıp kelin'», – dep aytatug'ının qayaqtan bilippiz? – dedi.
8 Yahuda a'kesi İzrailg'a: – Balanı menin' menen jiber, keteyik. Sonda sen de, bizler de, balalarımız da o'lmey, tiri qalamız.
9 Men bala ushın basım menen juwap beremen, onı mennen talap etesen'. Eger men onı aldın'a qaytarıp a'kelmesem, onda bir o'mir senin' aldın'da ayıpker bolaman.
10 Eger waqıttı soza bermegenimizde, ha'zirge deyin eki ret barıp kelgen bolar edik, – dedi.
11 Aqırında İzrail ullarına bılay dedi: – Meyli, onda bılay islen': o'zlerin'iz benen birge bul jerdin' en' jaqsı o'nimlerinen alıp, ol adamg'a sawg'ag'a az-maz balzam, az-maz pal ha'm xosh iyisli shayır, ladan, piste, badam alıp barın'lar.
12 Qapların'ızdın' awzında qaytıp kelgen gu'mislerdi qaytarıp beriwin'iz ushın, eki ese gu'mis alıp ketin'ler. Mu'mkin, aljasıq bolg'an shıg'ar.
13 İnin'izdi alıp, sol adamg'a qaytıp barın'lar.
14 Qu'direti ku'shli Quday ol adamnın' ju'regine sizlerge degen rehim bersin, ol sizlerdin' sol tuwısqanın'ız benen Benyamindi sizlerge qaytarıp bersin. Al mag'an kelsek, eger men balasız qalatug'ın bolsam, meyli, balasız qala qoyayın.
15 Solay etip, tuwısqanlar sawg'alardı, eki ese gu'misti ha'm Benyamindi alıp, Mısırg'a qaray jolg'a shıqtı ha'm Yusuptin' aldına keldi.
16 Yusup olardın' janındag'ı Benyamindi ko'rgende, o'zinin' u'y basqarıwshısına: – Bul adamlardı menin' u'yime alıp bar da, mal soyıp, awqat tayarla. O'ytkeni olar tu'ski awqattı menin' menen birge jeydi, – dedi.
17 U'y basqarıwshısı Yusuptin' aytqanınday islep, olardı Yusuptin' u'yine alıp bardı.
18 Tuwısqanlar o'zlerinin' Yusuptin' u'yine aparılg'anın ko'rgende qorqıp ketip, bir-birine: «Burın qaplarımızg'a qaytarıp salıng'an gu'misti sıltawlap, ol bizlerdi usı jerge alıp kelgen shıg'ar. Ol bizlerge topılıp, o'zlerimizdi qul etpekshi ha'm esheklerimizdi tartıp almaqshı shıg'ar», – desti.
19 Olar qapının' kirer awzında Yusuptin' u'y basqarıwshısına jaqınlap barıp:
20 – Mırzamız, bizler bunnan aldın azıq-awqat satıp alıw ushın bul jerge kelgen edik.
21 Qaytarsın tu'negen jerimizde qaplarımızdı ashıp qarag'anımızda, ha'r birimiz gu'misimizdin' bası buzılmay, qaptın' awzında turg'anın ko'rip, hayran qaldıq. Bizler onı qaytarıp alıp keldik.
22 Bunnan tısqarı, bizler azıq-awqat satıp alıw ushın qosımsha gu'mis alıp keldik. Al sol gu'misimizdi qaplarımızg'a kim salıp qoyg'anın bizler bilmeymiz, – dedi.
23 U'y basqarıwshısı: – Qa'weterlenben'ler ha'm qorqpan'lar. Qapların'ızdag'ı bul g'a'ziyneni sizlerdin' ha'm a'ken'izdin' Qudayı qapların'ızg'a salıp ketipti. Men gu'misin'izdi aldım, – dedi. Son'ınan ol Shimondı olardın' aldına alıp keldi.
24 U'y basqarıwshı olardı Yusuptin' u'yine alıp kelip, ayaqların juwıw ushın suw ha'm esheklerine jem berdi.
25 Tuwısqanlar tu'ske, Yusuptin' keliwine sawg'aların tayarlap qoydı. Sebebi o'zlerinin' sol jerde awqatlanatug'ının esitken edi.
26 Yusup u'yge kelgende, olar sawg'aların ishke a'kelip, Yusupke berdi ha'm onın' aldında jerge deyin iyilip, ta'jim etti.
27 Yusup olardan halawhal sorap bolg'annan keyin: – O'zlerin'iz aytqan g'arrı a'ken'iz aman-saw ju'r me? Ol ele tiri me? – dedi.
28 – Sizin' qulın'ız bolg'an a'kemiz aman-saw ju'r, ol ele tiri, – dep olar hu'rmet penen iyilip, ta'jim etti.
29 Yusup ko'z taslap, o'zi menen bir anadan tuwılg'an inisi Benyamindi ko'rgende: – Bul mag'an aytqan genje inin'iz be? – dep soradı ha'm Benyaminge: – Quday sag'an miyrimin tu'sirsin, ulım, – dedi de,
30 da'rhal sol jerden shıg'ıp ketti. O'ytkeni tuwısqanın ko'rgende, onın' ju'regi eljirep ketken edi. Yusup bo'lmesine kirip, sol jerde jılap aldı.
31 Ol betin juwg'annan keyin sırtqa shıqtı da, o'zin qolg'a alıp: – Awqat a'kelinsin! – dep buyırdı.
32 Yusupke bo'lek, ag'a-inilerine bo'lek ha'm Yusup penen awqatlanıp otırg'an mısırlılarg'a bo'lek dasturxan jayıldı. Sebebi mısırlılar evreyler menen birge awqat jemeytug'ın edi, bul olar ushın ma'kiriw esaplanatug'ın edi.
33 Tuwısqanları Yusuptin' qarsı aldında u'lkeninen kishisine deyin, jası boyınsha otırdı. Olar tan' qalısıp, bir-birine qaradı.
34 Yusuptin' dasturxanınan olarg'a awqat jiberildi. Sonda Benyaminnin' payı basqalarg'a qarag'anda bes ese artıq boldı. Olar Yusup penen birge iship, kewil ko'terip otırdı.
