Jaratılıs 49 bob
1 Yaqıp ulların janına shaqırıp alıp, bılay dedi: – Janıma jıynalın'lar, men keleshekte sizlerge ne bolatug'ının bildireyin.
2 Jıynalıp qulaq salın'lar, Ha'y, Yaqıp ulları, Tın'lan'ız a'ken'iz İzraildı!
3 Ha'y sen, Ruben, menin' tun'g'ıshım, Erkeklik ku'shimnin' da'slepki jemisi, Sen hu'rmet ha'm ku'sh jag'ınan en' u'stinsen'.
4 Biraq tasqanın' ushın suw sıyaqlı, U'stem bolmaysan' hesh qashan endi. O'ytkeni kirdin' sen a'ken'nin' to'segine, To'segime kirip, haramladın' onı.
5 Ag'ayinli Shimon ha'm Lebiy, Qılıshları – jawızlıq quralı.
6 Olardın' jasırın jobasına sherik bolmayın, Jıyınına da qatnaspayın men. Sebebi olar ashıwg'a minip, adam o'ltirdi, Kewli ku'segenin qılıp, Kesti bug'alardın' ayaq sin'irin.
7 Na'let jawsın olardın' rehimsiz ashıwına, Na'let jawsın olardın' jawız g'a'zebine! Olardı bo'lip jiberip, Yaqıp xalqının' arasına, Tarqataman İzrail xalqının' arasına.
8 Ha'y Yahuda, tuwısqanların' seni maqtaydı. Qolın' jawın'nın' jelkesinen tu'speydi, Tuwısqanların' aldın'da bas iyedi.
9 Yahuda, sen jas arıslansan', Ulım menin'! An' awlap qayttın', Jatasan' arıslan sıyaqlı shirenip, Mazan'dı alıwg'a kimnin' batılı jeter?
10 Haqıyqıy iyesi kelgenge deyin, Patshalıq hasası alınbas sennen. Biylik ba'rqulla seniki bolıp, Xalıqlar sag'an boysınar+.
11 Baylarsan' eshegin'di ju'zim ag'ashına, Gu'rren'di miyweli shaqasına. Juwarsan' kiyimlerin'di sharapqa, Shapanın'dı ju'zimnin' qanına.
12 Sharaptan nurlı bolar ko'zlerin', Su'tten aq bolar senin' tislerin'.
13 Zebulon jasaydı ten'iz boyında, Kemelerge jag'ıs bolar ol, Ma'kanlag'an jeri bolar Sidong'a shekem.
14 Ju'kler arasında jatırg'an, İssaxar – bir ku'shli eshek.
15 Ol qashan dem alatug'ın jaqsı jer, Unaytug'ın bir el ko'rse, Ju'kti ko'teriw ushın ıyıg'ın tutıp, Erksiz xızmetshige aylanar.
16 Dan da İzraildın' bir urıwı bolıp, O'z xalqına qazılıq eter.
17 Dan – jol shetindegi jılan, Ol – soqpaqta jatırg'an bir uwlı jılan. Ol attın' tabanınan shaqqanda, Atlını shalqasına jıg'ıltar.
18 Senin' qutqarıwın'dı ku'tpektemen, Jaratqan İye!
19 Gad basqınshılar hu'jimine ushırar, Biraq olardın' izinen quwıp, shabıwıl jasar.
20 Asherdin' azıq-awqatı toyımlı keler, Ol patshag'a say la'zzetli tag'am jetistirer.
21 Naftaliy – bir azat suwın, Onnan a'jayıp balalar tuwılar.
22 Yusup – miyweli ag'ash, Ol – bulaq basındag'ı jemisli terek. Shaqaları diywaldan asıp o'ter,
23 Og'an sadaqshılar rehimsiz hu'jim etti, Dushpanlarsha u'stine oqlar jawdırdı.
24 Biraq İzraildın' Qorg'awshı jartası ha'm Shopanı bolg'an, Yaqıptın' Ku'shli Qudayının' ja'rdeminde, Qolları onın' qarıwlı ha'm shaqqan boldı, Sonlıqtan ol sadag'ın bekkem usladı.
25 A'ken'nin' Qudayı seni qollap turar, Joqarıdag'ı aspannın' bereketi menen, Jerdegi teren' bulaqlardın' bereketi menen, Ko'kirek su'ti ha'm ana qursag'ının' bereketi menen, Qu'direti ku'shli Quday seni jarılqar.
26 A'ken'nin' bergen pa'tiyaları, Ullıraq bolar a'yyemgi tawlardın' bereketlerinen, Eski to'beshikler molshılıg'ınan da. Pa'tiyalarım tuwısqanları ishinen tan'lang'an Yusupke qonsın!
27 Benyamin – ash qasqır, Ol awlag'an an'ın azanda jep, Keshte oljanı bo'liser.
28 İzraildın' on eki urıwı usılar. A'kesi olarg'a bul so'zlerdi aytıp, ha'r birine mina'sip bolg'an pa'tiyanı bergen edi.
29 Bunnan keyin, Yaqıp ullarına bılay dep wa'siyat etti: – Men o'lip, ata-babalarıma qosılajaqpan. Meni ata-babalarımnın' janına, xet xalqınan bolg'an Efronnın' atızındag'ı u'n'girge aparıp qoyın'lar.
30 Bul u'n'gir Qanan jerinde, Mamrege jaqın jerdegi Maxpela atızında jaylasqan. Onı İbrayım xet xalqınan bolg'an Efronnan mazar qılıw ushın satıp alg'an edi.
31 Ol jerge İbrayım ha'm onın' hayalı Sara, Isaq ha'm onın' hayalı Rebekka qoyılg'an. Men Leanı da sol jerge qoydım.
32 Bul atız ha'm ondag'ı u'n'gir xetlerden satıp alıng'an edi.
33 Yaqıp ullarına bul wa'siyat so'zlerin aytıp bolg'annan son', to'seginde ayaqların jıynap jattı da, demi tawısılıp, o'z ata-babalarına qosıldı.
