Jaratılıs 50 bob
1 Sonda Yusup o'zin a'kesinin' u'stine taslap, jılap turıp, onı su'ydi.
2 Ol o'z xızmetindegi shıpakerlerge a'kesinin' denesin mumiyalawdı buyırdı. Olar İzraildı mumiyaladı.
3 Bul is qırıq ku'nge sozıldı. Sebebi mumiyalawg'a sonsha waqıt kerek edi. Mısırlılar İzrail ushın jetpis ku'n aza tuttı.
4 Azalaw ku'nleri o'tkennen keyin, Yusup faraonnın' wa'zirlerine: – Eger mag'an kewlin'iz tolg'an bolsa, faraong'a mınalardı jetkizin'ler.
5 A'kem mag'an ant ishtirip: «Menin' o'limim jaqınlastı. Meni Qanan jerindegi o'zim ushın qazdırg'an qa'birge aparıp qoy», – degen edi. Endi faraon a'kemdi jerlep qaytıwıma ruxsat bersin, – dedi.
6 Sonda faraon Yusupke: – A'ken'e bergen antın'dı orınlap, onı jerlep qayt, – dedi.
7 Solay etip, Yusup a'kesin jerlewge ketti. Faraonnın' barlıq xızmetshileri, saraydın' ha'm Mısır elinin' basshıları onın' menen birge ketti.
8 Sonday-aq, Yusuptin' pu'tkil xojalıg'ı, tuwısqanları ha'm a'kesinin' u'y-ishi de onın' menen birge edi. Tek balalardı, mayda ha'm iri mallardı Goshen jerinde qaldırdı.
9 Sawash arbalar ha'm onın' u'stindegi a'skerler de olarg'a qosılıp, u'lken ko'shke aylandı
10 Olar İordan da'ryasının' shıg'ısındag'ı Atad qırmanına jetip barg'anda, way-waylap jılap, dawıs shıg'ardı. Yusup a'kesi ushın jeti ku'n aza tuttı.
11 Sol jerde jasaytug'ın qananlılar Atad qırmanındag'ı azalaw ma'resimin ko'rip: «Mısırlılar qanshelli awır aza tutıp atır!» – desti. Sol sebepli İordannın' shıg'ısındag'ı bul jerge Abel-Misrayım atı berildi.
12 Yaqıptın' ulları a'kesinin' wa'siyatın tolıq orınladı.
13 Onın' denesin Qanan jerine a'kelip, Mamrege jaqın jerdegi Maxpela atızındag'ı u'n'girge qoydı. Bul u'n'girdi İbrayım xet xalqınan bolg'an Efronnan mazar qılıw ushın atız benen birge satıp alg'an edi.
14 Yusup a'kesin jerlep bolg'annan son', onın' o'zi, tuwısqanları ha'm onın' menen birge a'kesin jerlewge barg'anlardın' ha'mmesi Mısırg'a qayttı.
15 A'kesi o'lgennen keyin, Yusuptin' ag'aları bir-birine: «Eger Yusup bizlerge ele de kek saqlap ju'rgen bolıp, og'an islegen jamanlıqlarımız ushın bizlerden o'sh almaqshı bolsa ne qılamız?» – desti.
16 Solay etip, olar Yusupke mınaday xabar jolladı: «A'kemiz o'lmesinen aldın wa'siyat etip,
17 sag'an: „Ag'aların'nın' sag'an islegen jamanlıg'ın, olardın' ayıp ha'm gu'nasın keshir“, – dep aytıwımızdı tapsırg'an edi. Endi sen a'ken'nin' Qudayının' qulları bolg'an bizlerdin' gu'namızdı keshir!» Yusup bul xabardı esitkende jılap jiberdi.
18 Sonnan keyin, ag'alarının' o'zleri Yusupke kelip, onın' aldında jerge jıg'ılıp: – Bizler senin' qulların'bız, – dedi.
19 Biraq Yusup olarg'a: – Qorqpan'lar! Men Quday emespen.
20 Sizler mag'an jamanlıq oylag'an edin'iz. Biraq Quday ko'p adamlardın' o'mirin saqlap qalıw ushın, ha'zir o'zlerin'iz ko'rip turg'anın'ızday, bul jamanlıqtı jaqsılıqqa aylandırdı.
21 Sonlıqtan qorqpan'lar, men sizlerdi de, balaların'ızdı da bag'aman, – dedi de, ag'alarının' ju'regine jag'atug'ın jıllı so'zler aytıp, olarg'a ta'selle berdi.
22 Solay etip, Yusup ha'm onın' a'kesinin' u'y-ishi Mısırda jasap qaldı. Yusup bir ju'z on jıl jasadı.
23 Yusup Efrayımnın' aqlıq-shawlıqların ko'rdi. Al Menashshenin' ulı Maxirdin' ulların asırap aldı.
24 Yusup tuwısqanlarına: – Menin' o'limim jaqınlastı. Biraq Quday sizlerge so'zsiz na'zer saladı. Ol sizlerdi bul jerden alıp shıg'ıp, O'zi İbrayımg'a, Isaqqa ha'm Yaqıpqa beremen dep ant ishken jerine aparadı, – dedi.
25 Son'ınan olarg'a ant ishtirip: – Quday sizlerge so'zsiz na'zer saladı. Sonda sizler menin' su'yegimdi bul jerden alıp ketin'ler, – dedi.
26 Yusup bir ju'z on jasqa shıg'ıp qaytıs boldı. Onın' denesin mumiyalap, Mısırda bir tabıtqa salıp qoydı.
