Jaratılıs 6 bob
1 Jer betinde adamlar ko'beye basladı. Olardan qızlar da tuwıldı.
2 İla'hiy barlıqlar adamlardın' qızlarının' sulıw ekenin ko'rip, o'zleri unatqanların hayallıqqa aldı.
3 Sonda Jaratqan İye: «Menin' Ruwxım adamzatta ma'n'gi qalmaydı, o'ytkeni olar barı-jog'ı bir adam. Adamnın' o'miri bir ju'z jigirma jıl boladı», – dedi.
4 İla'hiy barlıqlar adamlardın' qızlarına u'ylenip, balalı bolg'an ku'nlerde ha'm sol ku'nlerden keyin de jer ju'zinde da'wler bar edi. Olar a'yyemgi zamannın' ataqlı qaharmanları ha'm ataqlı adamları boldı.
5 Jaratqan İye qarap, jer ju'zinde adamzattın' jaman islerinin' ko'p ekenin, olardın' kewlindegi oy-niyetlerinin' ba'rhama jawızlıqqa tolı ekenin ko'rdi.
6 Ol jer betinde adamzattı jaratqanına o'kinip, ju'regi g'amg'a toldı.
7 Sonda Jaratqan İye bılay dedi: «O'zim jaratqan adamzattı, haywanlardı, jer bawırlawshılardı ha'm quslardı jer betinen qırıp taslayman. Sebebi Men olardı jaratqanıma o'kinemen».
8 Biraq Nux Jaratqan İyenin' miyrimine eristi.
9 Nuxtın' o'mir tariyxı mınaday: Nux zamanlasları arasında haq ha'm minsiz adam bolıp, Quday menen tıg'ız baylanısta jasaytug'ın edi.
10 Ol Sam, Xam ha'm Yafet degen u'sh ullı boldı.
11 Qudaydın' ko'z aldında jer ju'zi buzılıp, jawızlıqqa tolg'an edi.
12 Quday jer ju'zine qarap, onın' sonshelli buzılg'anın ko'rdi. O'ytkeni adamlar joldan shıqqan edi.
13 Sonda Quday Nuxqa bılay dedi: «Men pu'tkil adamzattı joq etemen, o'ytkeni olar sebepli jer jawızlıqqa toldı. Men olarg'a qosıp, jer betin de joq etemen.
14 Sen o'zin'e gofer ag'ashınan bir keme soq. Onı bo'lmelerge bo'lip, ishi-sırtın qara may menen mayla.
15 Sen kemeni bılay sog'ıwın' kerek: onın' uzınlıg'ı 300 shıg'anaq, eni 50 shıg'anaq, biyikligi 30 shıg'anaq bolsın.
16 Al bastırmasın bir shıg'anaq joqarı qılıp isle. Qapısın qaptaldan qoy ha'm kemenin' to'mengi, ortang'ı ha'm joqarg'ı qabatları bolsın.
17 Minekey, Men jer ju'zine topan suwın jiberip, aspan astındag'ı ha'mme tiri jandı joq etemen. Jerdegi barlıq na'rse qırılıp qaladı.
18 Biraq Men senin' menen O'z kelisimimdi du'zemen: sen o'z ulların', hayalın' ha'm kelinlerin' menen birge kemege kir.
19 Aman qalıwı ushın, o'zin' menen birge kemege barlıq janıwarlardın' erkek ha'm urg'ashısınan jup-juptan alıp kir.
20 Aman qalıwı ushın, quslardın', haywanlardın' ha'm jer bawırlawshılardın' ha'r qıylı tu'rleri jup-juptan sag'an keledi.
21 O'zin'e ha'm olarg'a azıq bolatug'ın ha'r qıylı awqatlıq zatlardı jetkilikli etip jıynap qoy».
22 Nux Qudaydın' buyırg'anlarının' barlıg'ın orınladı
