Jaratılıs 7 bob
1 Jaratqan İye Nuxqa bılay dedi: «Pu'tkil xojalıg'ın' menen kemege kir. O'ytkeni Men zamanlasların' ishinde tek senin' g'ana Menin' aldımda haq ekenin'di ko'rdim.
2 O'zin' menen birge hadal dep esaplang'an haywanlardın' tu'rlerinen, erkek ha'm urg'ashısınan jeti juptan, haram dep esaplang'an haywanlardın' tu'rlerinen, erkek ha'm urg'ashısınan eki juptan al.
3 Ja'ne de, tuqımı jer betinde saqlanıp qalıwı ushın, quslardın' ha'r qıylı tu'rlerinen erkek ha'm urg'ashısınan jeti juptan al.
4 O'ytkeni Men jeti ku'nnen keyin jerge qırıq ku'n, qırıq tu'n jawın jawdıraman. O'zim jaratqan ha'r bir tiri jandı jer betinen qırıp taslayman».
5 Nux Jaratqan İyenin' buyırg'anlarının' barlıg'ın orınladı.
6 Jerdi topan suwı basqanda, Nux altı ju'z jasta edi.
7 Nux, onın' ulları, hayalı ha'm kelinleri topan suwınan qutılıw ushın kemege kirdi.
8 Qudaydın' Nuxqa buyırg'anınday,
9 hadal ha'm haram dep esaplang'an ha'r tu'rli haywanlar, quslar ha'm jer bawırlawshılardın' erkegi ha'm urg'ashısı jup-jup bolıp Nuxqa kelip, kemege kirdi.
10 Jeti ku'nnen son', jer betin topan suwı qaplay basladı,
11 Nux altı ju'z jasqa tolg'an jıldın' ekinshi ayının' on jetinshi ku'ninde teren' tun'g'ıyıqtın' barlıq bulaqlarınan suw atlıg'ıp, aspan qaqpaqları ashılıp ketti.
12 Jer ju'zine qırıq ku'n, qırıq tu'n jawın jawdı.
13 Tap sol ku'ni Nux, onın' ulları Sam, Xam, Yafet, Nuxtın' hayalı ha'm u'sh kelini kemege kirdi.
14 Barlıq jabayı haywanlardın', mallardın', jer bawırlawshılardın', barlıq quslardın' ha'm qanatlılardın' da ha'r qıylı tu'rleri olar menen birge kirdi.
15 Ha'r tu'rli janlı janıwarlar jup-juptan Nuxqa kelip, kemege kirdi.
16 Kemege kirgen haywanlar Quday Nuxqa buyırg'anınday erkek ha'm urg'ashı edi. Sonnan keyin, Jaratqan İye Nuxtın' izinen kemenin' qapısın japtı.
17 Topan suwı qırıq ku'n dawam etti ha'm suwlar tasıp, kemeni jerden joqarıg'a ko'terdi.
18 Suw jer betinde sonshelli ko'beyip joqarı ko'terilgenlikten, keme suw betinde ju'ze basladı.
19 Suwlardın' ko'terilgeni sonshelli, jer betindegi barlıq ba'lent tawlar suw astında qaldı.
20 Ko'terilgen suwlar tawlardın' u'stin on bes shıg'anaq joqarı qapladı.
21 Jer ju'zindegi barlıq tirishilik: quslar, mallar, jabayı haywanlar, jer bawırlawshılar ha'm barlıq adamlar qırılıp qaldı.
22 Qurg'aqlıqtag'ı tiri jannın' ha'mmesi o'lip qaldı.
23 Jer ju'zindegilerdin' ha'mmesi: adamlardan baslap mallarg'a deyin, jer bawırlawshılardan baslap quslarg'a deyin nabıt boldı. Tek Nux ha'm onın' menen birge kemede bolg'anlar g'ana aman qaldı.
24 Topan suwı jer ju'zin bir ju'z eliw ku'n qaplap turdı.
