Jaratılıs 8 bob
1 Biraq Quday Nuxtı ha'm onın' menen birge kemede bolg'an jabayı haywanlar menen mallardı esine tu'sirip, jer betine samal estirdi. Sonda suwlar azaya basladı.
2 Tun'g'ıyıqtın' bulaqları ha'm aspannın' qaqpaqları jabılıp, jawın tındı.
3 Suwlar a'ste-a'ste jer betinen qayta basladı ha'm bir ju'z eliw ku'nnen keyin azayıp qaldı.
4 Keme jetinshi aydın' on jetinshi ku'ni Ararat tawları u'stinde toqtadı.
5 Suwlar onınshı ayg'a shekem azayıp, onınshı aydın' birinshi ku'ninde tawlardın' to'beleri ko'rine basladı.
6 Qırıq ku'nnen son', Nux o'zi soqqan kemenin' a'ynegin ashtı.
7 Ol bir g'arg'anı ushırıp jiberdi. Jer betindegi suwlar qurıg'ang'a deyin g'arg'a ushıp kelip-ketip turdı.
8 Son'ınan Nux jer betindegi suwdın' qaytqanqaytpag'anın biliw ushın bir kepterdi ushırıp jiberdi.
9 Biraq kepter qonatug'ın jer taba almay, ja'ne Nuxqa, kemege qaytıp keldi. Sebebi ele jer betin suw qaplap tur edi. Nux qolın sozıp, kepterdi o'z janına, kemege kirgizip aldı.
10 Jeti ku'n ku'tip, Nux kepterdi kemeden ja'ne shıg'arıp jiberdi.
11 Kepter keshte qaytıp kelgende, onın' tumsıg'ında za'ytu'n ag'ashının' jan'a julıng'an bir japırag'ı bar edi. Sonda Nux jer betindegi suwdın' qaytqanın tu'sindi.
12 Nux ja'ne jeti ku'n ku'tkennen son', kepterdi qaytadan shıg'arıp jiberdi. Bul ret kepter qaytıp kelmedi.
13 Nux altı ju'z bir jasqa tolg'an jıldın' birinshi ayının' birinshi ku'ni jer betindegi suwlar qurg'adı. Nux kemenin' to'besin ashıp, jerdin' qurg'ag'anın ko'rdi.
14 Ekinshi aydın' jigirma jetinshi ku'ni jer tolıq qurg'adı.
15 Sonda Quday Nuxqa bılay dedi:
16 «Hayalın', ulların' ha'm kelinlerin' menen birge kemeden shıq.
17 O'zin' menen birge barlıq janıwarlardı: quslardı, haywanlardı ha'm jer bawırlawshılardı da shıg'ar. Olar jer ju'zine taralıp, jer betinde o'sip-o'nip, ko'beysin».
18 Nux hayalı, ulları ha'm kelinleri menen birge kemeden shıqtı.
19 Barlıq haywanlar, jer bawırlawshılar, quslar – jer betinde tirishilik etiwshilerdin' ha'mmesi tu'r-tu'ri boyınsha kemeden shıqtı.
20 Nux Jaratqan İyege arnap qurbanlıq orın qurdı. Sol jerde ol hadal dep esaplang'an haywanlardın' ha'm quslardın' ha'mmesinen alıp, olardı qurbanlıqqa shalıp, jag'ıp jiberdi.
21 Jaratqan İye jag'ımlı iyisti unatıp, O'z kewlinde bılay dedi: «Men endi jerdi adamlar sebepli na'letlemeymen. O'ytkeni adamnın' kewlindegi niyetler balalıg'ınan-aq jaman boladı. Men usı islegenimdey, endi hesh qashan pu'tkil tirishilikti joq qılıp jibermeymen.
22 Endigiden bılay, du'nya turg'ansha, egin egiw, onı orıw, ıssı ha'm suwıq, jaz ha'm qıs, ku'ndiz ha'm tu'n bola beredi».
