Jaratılıs 9 bob

Qudaydın' Nux penen du'zgen kelisimi (1-17),Nuxtın' ulları (18-29).

¹ Quday Nuxtı ha'm onın' ulların jarılqap bılay dedi: «O'sip-o'nip, ko'beyin'ler ha'm jer ju'zin toltırın'lar.

² Jerdegi haywanlardın', aspandag'ı quslardın', jer ju'zindegi tiri janlardın' ha'm ten'izdegi balıqlardın' ha'mmesi sizlerden qorqıp, u'rketug'ın bolsın. Olar sizlerdin' biyligin'izge berilgen.

³ Barlıq tiri janıwarlar sizlerge awqat boladı. O'simliklerdi bergenim sıyaqlı, Men sizlerge ha'mmesin berip atırman.

⁴ Biraq olardın' qanın shıg'armay turıp, go'shin jemen'. Sebebi jan qannan ibarat.

⁵ Eger sizlerdin' de qanın'ız to'gilse, haqın'ızdı so'zsiz talap etemen. Adam janın qıyg'an ha'r qanday adam ha'm haywannan Men esap talap etemen.

⁶ Kim adamnın' qanın to'kse, onın' o'zinin' qanı da basqa adam ta'repinen to'giledi. Sebebi Quday adamdı O'zine uqsatıp jarattı.

⁷ Al sizler o'sip-o'nip, ko'beyin'ler ha'm jer betine tarqalıp, artıp barın'lar».

⁸ Quday Nuxqa ha'm onın' ullarına bılay dedi:

⁹ «Men sizler menen, sizlerdin' keleshek urpag'ın'ız benen kelisim du'zemen.

¹⁰ Ja'ne de, sizler menen birge bolg'an barlıq janlı janıwarlar: quslar, mallar, jabayı haywanlar ha'm sizler menen kemeden shıqqan jer betindegi barlıq haywanlar menen kelisim du'zemen.

¹¹ Sizler menen du'zetug'ın kelisimim mınadan ibarat: endigiden bılay, pu'tkil tirishilik topan suwı menen joq etilmeydi ha'm jer ju'zin joq etetug'ın topan suwı endi qaytıp bolmaydı».

¹² Quday so'zin dawam etip bılay dedi: «Menin' sizler ha'm ha'r bir janlı janıwar menen barlıq keleshek urpaqlar ushın ma'n'gige du'zip atırg'an kelisimimnin' belgisi mınaw

¹³ Men O'z ayqulag'ımdı bultlarg'a jaylastıraman ha'm ol Menin' menen jerde jasawshılardın' arasındag'ı du'zgen kelisimimnin' belgisi boladı.

¹⁴ Men jer u'stine bult jibergenimde, bultlarda ayqulaq payda boladı.

¹⁵ Sonda Men sizler menen ha'm ha'r bir tiri jan menen du'zgen kelisimimdi eske alaman. Pu'tkil tirishilikti joq etiwshi topan suwı endi qaytıp bolmaydı

¹⁶ Qashan bultlarda ayqulaq payda bolsa, Men onı ko'rip, jerde jasawshılardın' ha'mmesi menen O'zim du'zgen ma'n'gilik kelisimimdi eske alaman».

¹⁷ Son'ınan Quday Nuxqa: «Menin' jerde jasawshı ha'r bir tiri jan menen du'zgen kelisimimnin' belgisi – usı», – dedi.

¹⁸ Nuxtın' kemeden shıqqan ulları – Sam, Xam ha'm Yafet edi. Xam Qanannın' a'kesi edi.

¹⁹ Bular Nuxtın' u'sh ulı edi. Jer ju'zindegi barlıq xalıqlar olardan tarqadı.

²⁰ Nux jerdi ta'rbiyalap, ju'zim egiwge kiristi.

²¹ Ol sharap iship, ma's bolıp qaldı ha'm o'zinin' shatırında jalan'ash jattı.

²² Qanannın' a'kesi bolg'an Xam a'kesinin' jalan'ash jatırg'anın ko'rdi ha'm sırtqa shıg'ıp, bul haqqında eki tuwısqanına aytıp berdi.

²³ Sonda Sam menen Yafet bir shapandı iyinlerine tasladı da, teris qarap ju'riwi menen ishke kirip, a'kesinin' jalan'ash denesin shapan menen japtı. Olar a'kesinin' jalan'ash ekenin ko'rmew ushın ju'zlerin basqa ta'repke burdı.

²⁴ Ma'sligi tarqag'annan son', Nux kishkene ulının' ne islegenin bilip,

²⁵ bılay dedi: «Qanang'a na'let jawsın! Ol tuwısqanlarının' qullarının' qulı bolsın!»

²⁶ Ol ja'ne bılay dedi: «Samnın' Quday İyesine alg'ıslar bolsın! Al Qanan Samnın' qulı bolsın!

²⁷ Quday Yafettin' jerlerin ken'eytsin! Ol Samnın' shatırlarında jasasın! Al Qanan Yafettin' qulı bolsın!»

²⁸ Nux topan suwınan son' ja'ne u'sh ju'z eliw jıl o'mir su'rdi.

²⁹ Ol barlıg'ı bolıp tog'ız ju'z eliw jıl jasag'annan son', qaytıs boldı.