2 Patshalar 11 bob
1 Kelesi jılı ba'ha'rde, patshalar urısqa shıg'atug'ın waqıtta, Dawıt o'z a'skerbasıların ha'm pu'tkil İzrail a'skerlerin İoabtın' basshılıg'ında urısqa jiberdi. Olar ammonlardı qırıp taslap, Rabba qalasın qamal qıldı. Biraq Dawıttın' o'zi Erusalimde qalg'an edi.
2 Bir ku'ni keshke qaray Dawıt to'seginen turdı da, saraydın' u'shegine shıg'ıp, arman-berman ju're basladı. Ol sol jerden qarap, shomılıp atırg'an bir hayaldı ko'rdi. Hayal ju'da' sulıw edi.
3 Dawıt hayaldın' kim ekenin bilip keliw ushın, adam jiberdi. Sol adam qaytıp kelip, hayaldın' Eliamnın' qızı, xett xalqınan bolg'an Uriyanın' hayalı Bat-Sheba ekenligin ayttı.
4 Dawıt hayaldı alıp keliw ushın xızmetshilerin jiberdi. Hayal Dawıttın' aldına keldi. Dawıt etek kirinen endi tazalang'an hayal menen jattı. Son'ınan hayal u'yine qayttı.
5 Hayal ha'miledar bolıp qalg'an edi. Sonlıqtan ol Dawıtqa: «Men ha'miledarman», – dep xabar jiberdi.
6 Sonda Dawıt İoabqa: «Xett xalqınan bolg'an Uriyanı mag'an jiber», – degen xabar jolladı. İoab Uriyanı Dawıttın' aldına jiberdi.
7 Uriya aldına kelgende, Dawıt onnan İoab penen a'skerlerdin' jag'dayı ha'm urıstın' barısı haqqında soradı.
8 Son'ınan Uriyag'a: «U'yin'e barıp, dem al», – dedi. Uriya saraydan shıqqannan son', patsha onın' izinen sıy jiberdi.
9 Degen menen, Uriya u'yine qaytpay, patshanın' barlıq xızmetshileri menen birge saray da'rwazası aldında uyıqladı.
10 Dawıtqa Uriyanın' u'yine qaytpag'anı haqqında xabar jetkende, Dawıt Uriyanı shaqırtıp: – Sen uzaq waqıt sırtta boldın'-g'o, nege u'yin'e qaytpadın'? – dep soradı.
11 Uriya Dawıtqa: – Qudaydın' sandıg'ı da, İzrail ha'm Yahuda a'skerleri de ordada qaldı. Sa'rka'rdam İoab penen sizin' adamların'ız bolsa, qır dalada tu'nep atır. Solay eken, iship-jep, hayalım menen jatıw ushın, men u'yime bara alaman ba? Aldın'ızda ant iship aytaman: men hasla bulay islemeymen, – dep juwap berdi.
12 Sonda Dawıt Uriyag'a: – Bu'gin de usı jerde qal, erten' seni qaytarıp jiberemen, – dedi. Uriya sol ku'ni Erusalimde qaldı. Erten'ine
13 Dawıt Uriyanı shaqırıp alıp, ishkizip-jegizdi ha'm onı ma's qıldı. Biraq keshte Uriya ja'ne u'yine barmay, patshanın' xızmetshileri menen birge uyıqlaw ushın burıng'ı jatqan ornına bardı.
14 Sonlıqtan kelesi ku'ni azanda Dawıt İoabqa bir xat jazıp, onı Uriyanın' qolına berip jiberdi.
15 Ol xatta bılay dep jazg'an edi: «Uriyanın' jaradar bolıp o'liwi ushın, onı sawashtın' en' qızg'an jerine qoyıp, bir o'zin qaldır».
16 Solay etip, İoab qalanı qorshap alg'anda, dushpanlardın' ma'rt a'skerlerinin' qay jerde turatug'ının bilgenlikten, Uriyanı sol jerge qoydı.
17 Qala xalqı shıg'ıp, İoabtın' a'skerleri menen sawashqa tu'sti. Sawashta Dawıttın' a'skerlerinen ayırımları qaza taptı. Qazalang'anlar arasında xett xalqınan bolg'an Uriya da bar edi.
18 Sawashtın' barısı haqqında xabarlaw ushın, İoab Dawıtqa adam jiberdi.
19 Ol xabarshıg'a bılay dep buyırdı: «Sen sawashtın' barısı haqqında patshag'a jetkergenin'de,
20 patsha g'a'zeplenip, sag'an: „Olar menen urısıw ushın qalag'a nege bunshelli jaqınlastın'ız? Olardın' qala diywalınan oq atatug'ının bilmeytug'ın ba edin'iz?
21 Erubbeshettin' ulı Abimelexti qalay o'ltirgenin bilmeytug'ın ba edin'iz? Tebeste bir hayal diywaldan Abimelextin' u'stine digirman tasın taslap jiberip, onı o'ltirgeni esin'izde joq pa edi? Solay eken, nege diywalg'a bunshelli jaqın bardın'lar?“ – degende, sen og'an: „Xett xalqınan bolg'an qulın'ız Uriya da o'ldi“, – dep aytarsan'».
22 Xabarshı jolg'a shıqtı. Ol Dawıtqa barg'anda, İoabtın' o'zine aytqanlarının' ha'mmesin og'an jetkizip bılay dedi:
23 – Dushpan bizlerden u'stin shıqtı. Olar qaladan shıg'ıp, bizler menen qır dalada urıstı. Biraq bizler olardı qala da'rwazasına shekem quwıp bardıq.
24 Sonda mergenler sizin' adamların'ızg'a qaray diywaldan oq attı. Patshanın' adamlarının' ayırımları qaza taptı, xett xalqınan bolg'an qulın'ız Uriya da qaza taptı.
25 Dawıt xabarshıg'a: – İoabqa bılay dep ayt: «Bolg'an waqıyag'a qapa bolma. Sawashta kimnin' o'letug'ının bilip bolmaydı. Qalag'a qarsı hu'jimdi ku'sheytip, onı jer menen jeksen qılın'lar». Usı so'zlerdi aytıp, og'an jiger ber, – dedi.
26 Uriyanın' hayalı ku'yewinin' qaza tapqanın esitip, ol ushın aza tuttı.
27 Aza tutıw waqtı tamam bolg'anda, Dawıt hayaldı sarayg'a aldırdı. Hayal Dawıtqa turmısqa shıg'ıp, og'an bir ul tuwıp berdi. Biraq Dawıttın' bul isi Jaratqan İyege unamadı.
