2 Patshalar 16 bob
1 Dawıt tawdın' to'besinen arman qaray biraz tu'skende, Mefiboshettin' xızmetshisi Siba qosaqlang'an eki eshekke eki ju'z nan, keptirip nıg'ızlang'an kishmishten ju'z dana, taza pisken miyweden ju'z dana ha'm bir mes sharap ju'klep, Dawıttın' aldınan shıqtı.
2 Patsha Sibadan: – Bulardı ne ushın alıp keldin'? – dep soradı. Siba og'an: – Eshekler patsha xojalıg'ındag'ılardın' miniwi ushın, nan menen taza miyweler xızmetshilerin'izdin' jewi ushın, al sharap sho'lde haldan tayg'anlardın' ishiwi ushın, – dep juwap berdi.
3 Patsha onnan: – Mırzan' Shauldın' aqlıg'ı qayaqta? – dep soradı. Siba og'an: – Mefiboshet Erusalimde qaldı. Sebebi ol: «İzrail xalqı bu'gin atamnın' patshalıg'ın mag'an qaytarıp beredi», – dep aytıp atır, – dep juwap berdi.
4 Sonda patsha og'an: – Mefiboshettin' ha'mme na'rsesi seniki boladı, – dedi. Siba patshag'a ta'jim etip: – Qullıq, taqsır! Mag'an ba'rqulla kewlin'iz tolg'ay! – dedi.
5 Dawıt patsha Baxurimge jetip barg'anda, Shauldın' tiyresinen bolg'an Geranın' ulı Shimey g'arg'anıwı menen onın' aldınan shıqtı.
6 Pu'tkil a'skerleri ha'm ma'rt jawıngerleri Dawıt patshanın' on' ha'm shep jag'ında turg'anına qaramastan, Shimey Dawıtqa ha'm onın' xızmetshilerine tas ılaqtırdı.
7 Shimey bılay dep g'arg'andı: «Joq bol, ket. Ha'y, qanxor, on'bag'an adam!
8 Sen ornına patsha bolg'an Shauldın' u'y-ishinde to'gilgen qanlardın' qunın Jaratqan İye sennen o'ndirip atır. Ol patshalıqtı ulın' Abshalomg'a berdi. Sen qanxor bolg'anın' ushın, bul ba'lege jolıqtın'».
9 Seruya ulı Abishay patshag'a: – Bul o'li ko'pek nege taqsırımdı g'arg'aydı eken? Ruxsat berin', basın u'zip taslayın, – dedi.
10 Biraq patsha og'an: – Seruya ulları, bunın' menen sizlerdin' jumısın'ız bolmasın! Jaratqan İye og'an: «Dawıttı g'arg'a», – degeni ushın g'arg'ap atırg'an bolsa, kim onnan: «Nege bulay islep atırsan'?» – dep soray aladı? – dedi.
11 Keyin Dawıt Abishayg'a ha'm xızmetshilerine bılay dedi: «O'z ulım meni o'ltirmekshi bolıp turg'anda, mına benyaminli onnan beterin islemey me? Onı tınıshına qoyın'lar, g'arg'ay bersin. O'ytkeni bunı og'an Jaratqan İye aytqan.
12 Ba'lkim, Jaratqan İye menin' xorlanıp atırg'anımdı ko'rip, bu'gingi g'arg'ıslar ornına jaqsılıq qaytarar».
13 Dawıt adamları menen birge jolın dawam etti. Al Shimey Dawıttın' qaptalında, tawdın' janbawırında ju'riwi menen onı g'arg'ap, tas atıp, topıraq shashtı.
14 İordan da'ryasındag'ı o'tkelge sharshap jetken patsha ha'm onın' janındag'ı xalıq sol jerde dem aldı.
15 Sol arada Abshalom ha'm onın' izraillı pu'tkil ta'repdarları Erusalimge keldi. Axitofel de Abshalom menen birge edi.
16 Sonda Dawıttın' dostısı Ark tiyresinen bolg'an Xushay Abshalomnın' janına barıp: – Jasasın patsha! Jasasın patsha! – dep baqırdı.
17 Abshalom Xushaydan: – Dostın'a sadıqlıg'ın' usı ma? Ne ushın dostın' menen ketpedin'? – dep soradı.
18 Xushay og'an bılay dep juwap berdi: – Yaq, men Jaratqan İyenin', mına xalıqtın' ha'm pu'tkil izraillılardın' tan'lag'an adamı ta'repinde bolıp, onın' janında qalaman.
19 Endi men Dawıttın' ulı Abshalomnan basqa kimge xızmet qılaman? A'ken'izge qalay xızmet etken bolsam, sizge de solay xızmet etemen.
20 Sonda Abshalom Axitofelge qarap: – Ne isleyik, bizlerge ken'es ber, – dedi.
21 Axitofel Abshalomg'a: – Sarayg'a qarap turıwı ushın, a'ken'nin' taslap ketken toqalları menen jat. Sonda pu'tkil İzrail a'ken'izdin' sizdi jek ko'rip qalg'anın biledi ha'm sizdi qollawshılardın' ha'mmesi ja'ne de ku'shke minedi.
22 Solay etip, saraydın' u'shegine Abshalom ushın bir shatır qurıldı. Ol pu'tkil izraillılardın' ko'z aldında a'kesinin' toqalları menen jatıp shıqtı.
23 Sol waqıtları Axitofel bergen ken'esler Quday ta'repinen berilgen ken'esler dep sanalatug'ın edi. Axitofeldin' ha'r bir ken'esi Dawıt ushın da, Abshalom ushın da usınday edi.
