2 Patshalar 17 bob
1 Axitofel Abshalomg'a ja'ne bılay dedi: «Ruxsat bersen'iz, on eki mın' adamdı saylap alıp, bu'gin tu'nde ketip, Dawıttın' izine tu'seyin.
2 Ha'zir Dawıt sharshap, haldan tayg'an waqıtta, og'an hu'jim etip, ko'zin qorqıtsam, qasındag'ılar qashıp ketedi. Sonda men Dawıt patshanın' bir o'zin o'ltiremen.
3 Son'ınan pu'tkil xalıqtı sizge qaytarıp alıp kelemen. Xalıqtın' sizge qaytıwı siz o'ltirmekshi bolıp atırg'an adamnın' o'limine baylanıslı. Solay etip, pu'tkil xalıq zıyan ko'rmeydi».
4 Bul ken'es Abshalomg'a da, pu'tkil İzrail aqsaqallarına da unap qaldı.
5 Biraq Abshalom: «Ark tiyresinen bolg'an Xushaydı da shaqırın'. Ol ne der eken, esiteyik», – dedi.
6 Xushay kelgende, Abshalom og'an Axitofeldin' qanday ken'es bergeni tuwralı aytıp berdi. Son'ınan ol Xushaydan: – Onın' ken'esi boyınsha is tutayın ba? Bolmasa, sen ken'es ber, – dep soradı.
7 Xushay Abshalomg'a bılay juwap berdi: – Axitofeldin' bul rette bergen ken'esi jaqsı emes.
8 A'ken'izdin' ha'm onın' adamlarının' ma'rt jawıngerler ekenin bilesiz. Olar dalada balalarınan ayırılg'an ayıw sıyaqlı g'a'zepli. Bunın' u'stine, a'ken'iz ta'jiriybeli jawınger, ol tu'ndi a'skerler janında o'tkermeydi.
9 Bul waqıtta ol u'n'girlerdin' birinde yamasa bir jerde jasırınıp ju'rgen bolsa kerek. Eger ol a'skerlerimizge birinshi bolıp hu'jim jasasa, ol haqqında esitken ha'r bir adam: «Abshalomg'a ergenler qırg'ıng'a ushıraptı», – dep aytadı.
10 Sonda ju'rekleri arıslannın' ju'regindey bolg'an ma'rtlerdin' de qorqınıshtan ruwxları tu'sedi. Sebebi a'ken'izdin' batırlıg'ın ha'm onın' qasındag'ılardın' ma'rtligin pu'tkil İzrail biledi.
11 Sonlıqtan sizge aytatug'ın ken'esim mınaw: Dannan Beer-Shebag'a shekemgi, ten'iz jag'asındag'ı qum sıyaqlı san-sanaqsız bolg'an pu'tkil izraillılardı a'tirapın'ızg'a toplan'. Siz o'zin'iz de sawashqa shıg'ın'.
12 Sonda bizler jasırıng'an jerlerinin' birinde Dawıtqa hu'jim qılıp, jer betine tu'sken shıq kibi u'stine bastırıp baramız. Dawıttı da, onın' janındag'ılardın' hesh birin de tiri qaldırmaymız.
13 Eger ol bir qalanı panalasa, onda pu'tkil izraillılar sol qalag'a arqanlar alıp baradı. Qalanı bir tası qalmag'ansha, oypatlıqqa qaray tartıp qulatıp, joq qılamız.
14 Abshalom ha'm pu'tkil izraillılar: «Xushaydın' ken'esi Axitofeldin' ken'esinen jaqsıraq», – dedi. Sebebi Jaratqan İye Abshalomdı apatqa ushıratıw ushın, Axitofeldin' jaqsı ken'esin joqqa shıg'arıwdı sheship qoyg'an edi.
15 Xushay ruwxaniyler Sadoq penen Abiyatarg'a Axitofeldin' Abshalom menen İzrail aqsaqallarına bergen ken'esi ha'm o'zinin' olarg'a bergen ken'esi tuwralı aytıp berdi.
16 Son'ınan olarg'a: «Sizler mına xabardı Dawıtqa tez jetkizin': bul tu'ndi İordan tegisliginde, da'ryanın' o'tkelinde o'tkizbesin. Tez arg'ı ta'repke o'tsin. Bolmasa, patshanın' o'zi de, janındag'ılar da tolıq qırılıp ketedi», – dedi.
17 Sol waqıtları qalada ko'rinbew ushın, İonatan menen Aximaas qala sırtındag'ı Rogel bulag'ı janında ku'tip turatug'ın edi. Bir shorı qız barıp, olarg'a bolıp o'tkenlerdi xabarlap turatug'ın, al olar esitkenlerin Dawıt patshag'a jetkizip turatug'ın edi.
18 Biraq bir o'spirim olardı ko'rip qalıp, Abshalomg'a xabarladı. Sonda İonatan menen Aximaas asıg'ıs ol jerden ketip, Baxurimdegi bir adamnın' u'yine keldi. U'ydin' ha'wlisinde bir qudıq bar edi. İonatan menen Aximaas sol qudıqqa jasırındı.
19 Sol adamnın' hayalı bir japqısh alıp, qudıqtın' awzın jawıp qoyıp, hesh na'rse sezilmewi ushın, onın' u'stine masaqlardı jayıp tasladı.
20 Abshalomnın' xızmetshileri u'yge, hayaldın' janına kelip, onnan: – Aximaas penen İonatan qay jerde? – dep soradı. Hayal olarg'a: – O'zektin' arg'ı ta'repine o'tip ketti, – dep juwap berdi. Abshalomnın' xızmetshileri olardı izlep ketti, biraq taba almay, Erusalimge qayttı.
21 Adamlar ketkennen keyin, Aximaas penen İonatan qudıqtan shıqtı da, bolıp o'tken waqıyalardı xabarlaw ushın, Dawıt patshag'a ketti. Olar Dawıtqa barıp: «Qa'ne, ha'zir-aq da'ryanı kesip o'tin'ler», – dedi ha'm Axitofeldin' og'an qarsı qanday ken'es bergenligin aytıp berdi.
22 Dawıt sol waqıtta-aq pu'tkil adamları menen birge İordan da'ryasın kesip o'tti. Tan' atqanda, İordan da'ryasın kesip o'tpegen birde bir adam qalmadı.
23 Axitofel o'zi bergen ken'estin' iske aspag'anın ko'rgende, eshegin ertlep, og'an mindi de, o'z qalasına, o'z u'yine qaytıp ketti. Ol u'y-ishine wa'siyatnama qaldırg'annan son', asılıp o'ldi. Onın' denesi a'kesinin' qa'birine qoyıldı.
24 Dawıt Maxanayımg'a barg'an waqıtta, Abshalom ha'm onın' janındag'ı İzrail a'skerleri İordan da'ryasın kesip o'tip atırg'an edi.
25 Abshalom İoabtın' ornına Amasanı sa'rka'rda etip tayınladı. Amasa izraillı İtranın' ulı bolıp, anasının' atı Abigayıl edi. Abigayıl Seruyanın' sin'lisi bolıp, olar Naxash degen adamnın' qızları edi. Seruya bolsa, İoabtın' anası edi.
26 Abshalom ha'm İzrail a'skerleri Gilad jerine orda qurdı.
27 Dawıt Maxanayımg'a barg'anda, ammonlardın' Rabba qalasınan bolg'an Naxash ulı Shobiy, lo-debarlı Ammiel ulı Maxir ha'm Rogelimnen bolg'an giladlı Barzillay
28 Dawıtqa ko'rpe-to'sekler, qırmalar ha'm ılay ıdıslar alıp keldi. Ja'ne de, Dawıt ha'm onın' janındag'ılardın' jewi ushın biyday, arpa, un, tarı, aq lobiya, qızıl lobiya, quwırmash,
29 pal, qatıq, qoy ja'ne de maldın' su'tinen alıng'an irimtik alıp keldi. Sebebi olar: «Xalıq sho'lde ash, haldan tayg'an ha'm sho'llegen bolsa kerek», – dep oylag'an edi.
