2 Patshalar 18 bob
1 Dawıt o'zinin' janındag'ı a'skerlerin bir jerge toplap, ko'zden o'tkerdi ha'm olardın' u'stinen mın'basılar menen ju'zbasılar qoydı.
2 Son'ınan olardı Seruya ulı İoabtın', onın' inisi Abishaydın' ha'm gatlı İttaydın' basshılıg'ında u'sh toparg'a bo'lip atlandırdı. Patsha a'skerlerge: – Men de sizler menen birge baraman, – dedi.
3 Biraq a'skerler: – İltimas, siz bizler menen birge barman'. Eger bizlerdin' qashıwımızg'a tuwra kelse de, olar bizlerge dıqqat awdarmaydı, ha'tte, yarımımız o'lip ketsek te, olar bizlerge dıqqat awdarmaydı. Siz bizlerdin' on mın'ımızg'a turasız. Sonlıqtan sizin' bizlerge qalada turıp ja'rdem bergenin'iz jaqsıraq, – dep juwap berdi.
4 Patsha olarg'a: – Sizler neni maqul ko'rsen'iz, sonı isleymen, – dedi. Adamlar ju'zlik ha'm mın'lıq toparlarg'a bo'linip, qaladan shıg'ıp baratırg'anda, patsha da'rwaza janında turg'an edi.
5 Patsha İoab, Abishay ha'm İttayg'a: «Menin' hu'rmetim ushın jigit Abshalomg'a zıyan tiygizben'ler», – dep buyırdı. Ha'mme a'skerler patshanın' a'skerbasılarg'a Abshalomg'a baylanıslı bergen buyrıg'ın esitti.
6 Dawıttın' a'skerleri izraillılar menen urısıw ushın urıs maydanına shıqtı. Sawash Efrayım tog'ayında boldı.
7 İzrail a'skerleri Dawıttın' a'skerlerinen jen'ilip qaldı. Ol jerde u'lken qırg'ın bolıp, sol ku'ni jigirma mın' adam o'ldi.
8 Sawash ha'mme jerge jayıldı. Sol ku'ni tog'aydag'ı qa'wipli jag'daylarg'a jolıg'ıp o'lgenlerdin' sanı qılıshtan o'lgenlerdin' sanınan ko'birek edi.
9 Abshalom an'sızda Dawıttın' adamlarına dus kelip qaldı. Ol g'ashırg'a mingen edi. G'ashır u'lken bir terebinf ag'ashının' qalın' shaqaları astınan o'tip baratırg'anda, Abshalomnın' bası shaqalar arasına kirip, ilinip qaldı. G'ashır jolın dawam etip kete berdi, al Abshalom terekke iliniwi menen, salbırap qaldı.
10 Sonda bir adam bunı ko'rip qalıp, İoabqa: – Men Abshalomnın' bir terebinf ag'ashına ilinip, salbırap qalg'anın ko'rdim, – dep xabarladı.
11 İoab xabar bergen adamg'a: – A'neqalas, onı ko'rgen bolsan', nege jerge qulatıp o'ltirmedin'? Sag'an on shekel gu'mis penen bir qayıs sawg'a eter edim, – dedi.
12 Biraq sol adam og'an bılay dep juwap berdi: – Eger qolıma mın' shekel gu'mis sanap uslatqanın'ızda da, patshanın' ulına qol ko'termegen bolar edim. Sebebi patshanın' sizge, Abishayg'a ha'm İttayg'a: «Menin' hu'rmetim ushın jigitti, Abshalomdı saqlap qalın'lar», – dep buyrıq bergenin esittik.
13 Eger men janımdı qa'terge qoyıp, Abshalomdı o'ltirgenimde, bul isim patshag'a bilinbey qalmas edi. Siz de meni jaqlamag'an bolar edin'iz.
14 Sonda İoab sol adamg'a: – Bulay etip, senin' menen waqıttı bosqa o'tkermeyin, – dep, qolına u'sh nayza alıp barıp, terebinf ag'ashına ilinip, ele tiri turg'an Abshalomnın' ju'regine qadadı.
15 Son'ınan İoabtın' on no'ker jigiti Abshalomdı qorshap alıp, onı o'ltirdi.
16 Sonnan keyin İoab sawashtı toqtatıw ushın ka'rnay sherttirgende, a'skerler izraillılardı quwıwdı toqtatıp, izine qayttı.
17 İoabtın' a'skerleri Abshalomdı tu'sirip aldı da, tog'aydag'ı bir teren' shuqırg'a tasladı. Shuqırdın' u'stine u'lken taslardı u'ydi. Pu'tkil izraillılar u'ylerine qaray qashıp ketti.
18 Abshalom tiri waqtında: «Atımdı este qaldıratug'ın birde bir ulım joq», – dep Patsha oypatlıg'ına bir estelik ornatıp, og'an o'zinin' atın bergen edi. Bul estelik ha'zir de «Abshalomnın' esteligi» dep ataladı.
19 Sadoq ulı Aximaas İoabqa: – Ruxsat ber, juwırıp barıp, patshag'a Jaratqan İyenin' onı dushpanlarınan qutqarg'anın xabarlayın, – dedi.
20 İoab og'an: – Yaq, bu'gin xabardı sen jetkizbeysen'. Basqa waqıtta xabar jetkizersen', biraq bu'gin emes. O'ytkeni patshanın' ulı o'ldi, – dedi.
21 Son'ınan İoab bir kushlı adamg'a: «Sen barıp, ko'rgenlerin'di patshag'a jetkiz», – dedi. Kushlı adam İoabtın' aldında ta'jim etti de, juwırıp ketti.
22 Biraq Sadoq ulı Aximaas ja'ne: – Ne bolsa bolsın, ruxsat ber, men de kushlının' izinen juwırayın, – dedi. İoab og'an: – Ulım, nege juwırıp barg'ın' kelip qaldı? Bul xabar ushın sag'an su'yinshi bermeydi-g'o, – dedi.
23 Degen menen, Aximaas: – Ne bolsa, sol bolsın, juwırıp baraman, – dedi. Sonda İoab: – Meyli, juwırsan' juwır, – dedi. Solay etip, Aximaas tegislik boylap juwırıp, kushlıdan ozıp ketti.
24 Sol waqıtta Dawıt qalanın' ishki ha'm sırtqı da'rwazalarının' arasında otır edi. Gu'zetshi diywal janındag'ı da'rwazanın' to'besine shıqtı. Ol a'tirapqa ko'z jiberip, bir adamnın' juwırıp kiyatırg'anın ko'rdi.
25 Gu'zetshi baqırıp, bunı patshag'a xabarladı. Patsha og'an: «Eger tek bir adam kiyatırg'an bolsa, demek, onın' jaqsı xabar alıp kiyatırg'anı», – dedi. Sol adam kem-kemnen jaqınlasıp kele berdi.
26 Gu'zetshi basqa bir adamnın' da juwırıp kiyatırg'anın ko'rip, da'rwaza qarawılına: «A'ne, ja'ne bir adam juwırıp kiyatır», – dep baqırdı. Sonda patsha: «Ol da jaqsı xabar alıp kiyatır», – dedi.
27 Gu'zetshi: – Birinshisinin' juwırg'anın Sadoq ulı Aximaastın' juwırg'anına uqsatıp turman, – dedi. Patsha og'an: – Aximaas jaqsı adam. Ol jaqsı xabar alıp keledi, – dep juwap berdi.
28 Sol waqıtta Aximaas ba'lent dawıs penen patshag'a: «Tınıshlıq», – dep baqırdı. Son'ınan patshanın' aldında et-betinen jerge jıg'ılıp, ta'jim etip: «Taqsırıma qol ko'tergenlerdi ta'slim etken Qudayın'ız Jaratqan İyege alg'ıslar bolsın!» – dedi.
29 Patsha onnan: – Abshalom jigit aman ba? – dep soradı. Aximaas patshag'a: – İoab patshanın' xızmetshisi bolg'an kushlı adam menen meni bul jerge jibergen waqtında, u'lken bir ala-sapıran bolıp atırg'an edi. Biraq ne bolg'anın bilmeymen, – dep juwap berdi.
30 Patsha og'an: – Shetke shıg'ıp, bul jerde tur, – dedi. Aximaas shetke shıg'ıp turdı.
31 Sol waqıtta kushlı adam da jetip kelip: – Taqsır, xosh xabar! Bu'gin Jaratqan İye sizge qarsı bas ko'tergenlerdin' ha'mmesinin' qolınan sizdi qutqardı, – dedi.
32 Patsha kushlıdan: – Abshalom jigit aman ba? – dep soradı. Kushlı patshag'a: – Taqsır! Dushpanların'ızdın' ha'm jaman niyet penen sizge qarsı bas ko'tergenlerdin' ha'mmesinin' aqırı bul jigittin' aqırı sıyaqlı bolsın! – dep juwap berdi.
33 Patsha albırap qaldı. Ol da'rwaza u'stindegi bo'lmege shıg'ıp, jıladı. Ol shıg'ıp baratırıp: «Wah, ulım Abshalom! Wah, ulım, ulım Abshalom! Ulım, senin' ornın'a men o'lsem bolmas pa edi! Wah, ulım, ulım Abshalom!» – dep zarlap jılar edi.
