2 Patshalar 19 bob
1 İoabqa: «Dawıt patsha Abshalom ushın jılap, aza tutıp atır», – dep xabarladı.
2 Sol ku'ngi jen'is a'skerler ushın azag'a aylandı. Sebebi olar patshanın' ulı ushın aza tutıp atırg'anın esitken edi.
3 Sol ku'ni a'skerler qalag'a sawashtan qashqan adamlar sıyaqlı uyalıp kirdi.
4 Al patsha bolsa, betin basıp, ba'lent dawıs penen: «Wah, ulım, Abshalom! Abshalom, ulım, ulım!» – dep baqırıp otırg'an edi.
5 İoab patsha otırg'an u'yge barıp, og'an bılay dedi: «Bu'gin sizin' janın'ızdı, ul-qızların'ızdın' janların, hayalların'ızdın' janların qutqarg'an adamlardın' ha'mmesin uyatqa qoydın'ız.
6 O'ytkeni siz o'zin'izdi jek ko'rgenlerdi jaqsı ko'rip, o'zin'izdi jaqsı ko'rgenlerdi jek ko'resiz. Bu'gin siz a'skerbasılardın' ha'm xızmetshilerdin' o'zin'iz ushın hesh na'rsege arzımaytug'ının ko'rsettin'iz. Awa, eger Abshalom tiri qalıp, ha'mmemiz o'lip ketkende, siz ushın jaqsı bolatug'ının men bu'gin an'lap jettim.
7 Endi sırtqa shıg'ıp, adamların'ızdı jigerlendirin'! Jaratqan İyenin' atı menen ant ishemen: eger shıqpasan'ız, bu'gin tu'nde sizin' qasın'ızda birde bir adam qalmaydı. Bul jaslıg'ın'ızdan usı ku'nge shekem basın'ızg'a tu'sken apatlardın' ishindegi en' jamanı boladı».
8 Sonda patsha qala da'rwazasının' aldına shıg'ıp otırdı. Pu'tkil a'skerlerge: «Patsha qala da'rwazasının' aldına kelip otırdı», – degen xabar jetkende, olar da patshanın' janına keldi.Sol waqıtta Abshalomnın' janındag'ı izraillılar u'ylerine qashıp ketken edi.
9 İzraildın' ha'mme urıwlarınan bolg'an adamlar bir-biri menen tartısıp bılay desti: «Patsha bizlerdi dushpanlarımızdın' qolınan qutqardı. Bizlerdi filistlerdin' qolınan qutqarg'an da sol edi. Al endi bolsa, ol Abshalom sebepli elden qashıp ketti.
10 Bizlerge basshı bolıwı ushın maylag'anımız Abshalom bolsa, sawashta o'ldi. Solay eken, endi nege Dawıt patshanı qaytarıp alıp keliwge asıqpay atırmız?»
11 Dawıt patsha ruwxaniyler Sadoq penen Abiyatarg'a bılay dep xabar jiberdi: «Yahuda aqsaqallarına bılay dep aytın'lar: „Pu'tkil izraillılardın' patshanı o'z sarayına qaytarıw haqqında aytqan so'zleri menin' qulag'ıma jetip keldi. Al sizler nege patshanı qaytarıwda son'g'ılar bolmaqshısız?
12 Sizler menin' tuwısqanlarımsız – o'z su'yegim ha'm o'z etimsiz. Nege sizler patshanı o'z sarayına qaytarıwda en' son'g'ılar bolmaqshısız?“
13 Amasag'a da bılay dep aytın'lar: „Sen menin' tuwısqanımsan' – o'z su'yegim ha'm o'z etimsen'. Eger men seni İoabtın' ornına ma'n'gige sa'rka'rda etip qoymasam, Quday meni jazalag'an u'stine jazalasın!“»
14 Solay etip, Dawıt pu'tkil yahudalılardı o'zine tolıq awdırıp aldı. Yahudalılar patshag'a: «Pu'tkil adamların'ız benen qaytıp kelin'», – dep xabar jiberdi.
15 Patsha qaytıp, İordan da'ryasına bardı. Yahuda xalqı patshanı ku'tip alıp, İordan da'ryasınan o'tkiziw ushın Gilgalg'a keldi.
16 Baxurimnen benyaminli Gera ulı Shimey de Dawıt patshanı ku'tip alıw ushın, yahudalılar menen birge asıg'ıs jolg'a shıqtı.
17 Onın' janında Benyamin urıwınan mın' adam bar edi. Shauldın' u'yinin' xızmetshisi Siba da on bes ulı ha'm jigirma qulı menen birge İordan da'ryasına, patshanın' janına jetip keldi.
18 Olar patshanın' u'y-ishin da'ryadan o'tkeriw ha'm onın' tilegin orınlaw ushın patshanın' janına keldi. Patsha da'ryanı kesip o'tpekshi bolıp turg'anda, Gera ulı Shimey patshanın' aldına jıg'ılıp,
19 og'an bılay dedi: «Taqsır, meni ayıpker sanaman'ız. Siz Erusalimnen shıqqan ku'nin'izde islegen jamanlıg'ımdı kewlin'izde saqlamay, umıtıp jiberin'.
20 Qulın'ız bolg'an men qanday gu'na islegenimdi bilemen. Sonlıqtan taqsırımdı qarsı alıw ushın, pu'tkil Yusup urıwınan birinshi bolıp men keldim».
21 Sonda Seruya ulı Abishay: «Jaratqan İyenin' maylag'an adamın g'arg'ag'anı ushın, Shimey o'liwi tiyis», – dedi.
22 Biraq Dawıt og'an: «Ha'y, Seruyanın' ulları, bul sizlerdin' jumısın'ız emes. Bu'gin sizler nege mag'an qarsı shıg'ıp atırsız? İzrailda bu'gin birde bir adam o'ltirilmeydi! Men o'zimnin' İzraildın' patshası ekenimdi bilmeymen be?!» – dedi.
23 Son'ınan ol ant iship, Shimeyge: «Sen o'lmeysen'!» – dedi.
24 Shauldın' aqlıg'ı Mefiboshet te patshanı ku'tip alıw ushın shıqqan edi. Ol patsha ketken ku'nnen baslap, aman-esen izge qaytqan ku'nine shekem ayaqların da, kiyimlerin de juwmag'an, saqalın da almag'an edi.
25 Mefiboshet patshanı ku'tip alıw ushın Erusalimnen kelgende, patsha onnan: – Mefiboshet, sen nege menin' menen birge ketpedin'? – dep soradı.
26 Mefiboshet patshag'a bılay dep juwap berdi: – Taqsır, qulın'ız bolg'an men mayıp bolg'anım sebepli, qulım Sibag'a: «Eshekti ertle, men og'an minip, patsha menen birge ketemen», – dedim. Biraq ol meni aldadı.
27 Taqsır, sizin' aldın'ızda ol mag'an jala japtı. Biraq siz, taqsır, Qudaydın' perishtesi sıyaqlısız. Siz neni maqul ko'rsen'iz, sonı islen'.
28 Sebebi taqsırım, sizin' aldın'ızda a'kemnin' urpaqlarının' ha'mmesi o'z o'limin ku'tip ju'rgeninde, siz qulın'ız bolg'an meni dasturxanın'ızdan awqat jeytug'ınlar arasına otırg'ızdın'ız. Sizden bunnan artıq bir na'rse sorawg'a ne haqım bar, o, patsha?!
29 Patsha og'an: – O'z islerin' haqqında ga'pti balalatıwdın' ne ha'jeti bar? Sag'an aytatug'ınım mınaw: Siba menen ekewin'iz jerlerdi bo'lisip alın', – dedi.
30 Biraq Mefiboshet patshag'a: – Taqsırım sarayına aman-saw qaytıp kelgen eken, endi barlıq jerlerdi Siba ala g'oysın, – dep juwap berdi.
31 Giladlı Barzillay da İordan da'ryasın kesip o'tiwde patshag'a joldas bolıp, onı shıg'arıp salıw ushın, Rogelimnen kelgen edi.
32 Barzillay og'ada qartayg'an bolıp, seksen jasqa shıqqan edi. Ol ju'da' bay adam bolg'anlıqtan, patsha Maxanayımda bolg'an waqıtta, patshanı azıq-awqat penen ta'miyinlep turg'an edi.
33 Patsha Barzillayg'a: – Menin' menen birge da'ryanı kesip o't. Erusalimde men seni azıqawqat penen ta'miyinleymen, – dedi.
34 Biraq Barzillay patshag'a bılay dep juwap berdi: – Siz benen Erusalimge ketetug'ınday, qansha o'mirim qaldı deysiz?
35 Men ha'zir seksen jastaman. Jaqsı menen jamandı ajırata almasam, ishken-jegenimnin' da'min seze almasam, erkek ha'm hayal qosıqshının' dawısın esite almasam, taqsır, sizge ju'k bolıwımnın' ne keregi bar?
36 Qulın'ız bolg'an men tek g'ana İordan da'ryasın siz benen birge kesip o'tip, sizge az-maz joldas bolmaqshı edim. Patsha, siz nege mag'an bunshelli sıy ko'rsetip atırsız?
37 Mag'an u'yime qaytıwg'a ruxsat berin'. Biraq qulın'ız Kimham usı jerde, ol siz benen birge arg'ı ta'repke o'tsin. Og'an neni maqul ko'rsen'iz, sonı islen'.
38 Patsha og'an: – Kimham menin' menen birge arg'ı ta'repke o'tedi. Sen og'an neni maqul ko'rsen', men sonı isleymen. Mennen ne tilesen' de, tilegin'di orınlayman, – dedi.
39 Sonnan keyin, patsha ha'm pu'tkil xalıq İordan da'ryasınan o'tti. Patsha Barzillaydı su'yip, og'an pa'tiya berdi. Son'ınan Barzillay u'yine qayttı.
40 Patsha Gilgalg'a ketti. Kimham da onın' menen birge ketti. Pu'tkil Yahuda a'skerleri ha'm İzrail a'skerlerinin' yarımı patshag'a joldas boldı.
41 Sonda izraillılar patshag'a barıp: – Nege tuwısqanlarımız yahudalılar sizdi urlap ketip, sizdi ha'm xojalıg'ın'ızdı pu'tkil adamların'ız benen İordan da'ryasının' arg'ı ta'repine o'tkerip qoydı? – dedi.
42 Yahudalılar izraillılarg'a: – O'ytkeni patsha bizlerdin' jaqınımız. Nege bug'an qapa bolasızlar? Patshanın' awqatınan bir na'rse jedik pe? Ya bolmasa, o'zimizge bir na'rse aldıq pa? – dedi.
43 İzraillılar yahudalılarg'a juwap berip: – Patshada bizlerdin' on payımız bar. Sonlıqtan Dawıt patshada sizlerden go're ko'birek haqımız bar. Solay eken, nege bizlerdi jerge urasızlar? Patshamızdı qaytıp alıp keliwdi birinshi bolıp bizler aytqan joq pa edik? – dedi. Degen menen, yahudalılardın' so'zleri izraillılardikinen ku'shlirek boldı.
