Dawıttın' Yahudag'a patsha bolıwı(1-7),İzrail menen Yahuda arasındag'ı sawash(8-32).
2 Patshalar 2 bob
1 Bunnan keyin, Dawıt Jaratqan İyeden: – Yahuda qalalarının' birine barayın ba? – dep soradı. Jaratqan İye og'an: – Bar, – dep juwap berdi. Dawıt Onnan: – Qay jerge barayın? – dep soradı. Jaratqan İye Dawıtqa: – Xebrong'a bar, – dep juwap berdi.
2 Solay etip, Dawıt o'zinin' eki hayalı: izreelli Axinoam ha'm karmelli Nabaldın' jesiri Abigayıl menen birge sol jerge ketti.
3 Dawıt o'zinin' janındag'ı adamların da xojalıqları menen birge alıp ketti. Olar Xebronnın' o'zine ha'm a'tirapındag'ı qalalarg'a ornalastı.
4 Sonda yahudalılar Xebrong'a kelip, Dawıttı maylap, Yahudag'a patsha etip qoydı. Son'ınan olar Dawıtqa: «Yabesh-Gilad turg'ınları Shauldın' denesin jerledi», – dedi.
5 Dawıt Yabesh-Gilad turg'ınlarına xabarshılar jiberip, olarg'a bılay dedi: «Mırzan'ız Shauldı jerlep, og'an ko'rsetken sadıqlıg'ın'ız ushın Jaratqan İye sizlerdi jarılqasın!
6 Endi sizlerge Jaratqan İye miyrimsha'pa'a'tin ha'm sadıqlıg'ın ko'rsetsin. Bul isin'iz ushın, men de sizlerge jaqsılıq qılaman.
7 Sonlıqtan ku'shli ha'm ma'rt bolın'lar! Mırzan'ız Shaul qaytıs boldı. Al Yahuda xalqı bolsa, meni maylap, o'zlerine patsha etip qoydı».
8 Shauldın' sa'rka'rdası Ner ulı Abner Shauldın' ulı İsh-Boshetti* Maxanayımg'a alıp bardı.
9 Ol jerde Abner İsh-Boshetti Giladtın', Asherdin', İzreeldin', Efrayımnın', Benyaminnin' ha'm pu'tkil İzraildın' u'stinen patsha etip tayınladı.
10 Shauldın' ulı İsh-Boshet qırıq jasında patsha bolıp, İzrailda eki jıl patshalıq etti. Biraq Yahuda xalqı Dawıt penen birge qaldı.
11 Dawıt Xebronda Yahuda xalqına jeti jıl altı ay patshalıq etti.
12 Bir ku'ni Ner ulı Abner Shauldın' ulı İsh-Boshettin' adamları menen birge Maxanayımnan Gibong'a ketti.
13 Al Seruya ulı İoab bolsa, Dawıttın' adamları menen barıp, Gibon hawızının' janında olardı qarsı aldı. Usı eki topardın' biri hawızdın' bir ta'repinde, ekinshisi ekinshi ta'repinde otırdı.
14 Sonda Abner İoabqa: – Jigitler orınlarınan turıp, ko'z aldımızda alıssın, – dep usınıs qıldı. İoab og'an: – Meyli, alısa g'oysın, – dep kelisim berdi.
15 Solay etip, Benyamin urıwınan Shauldın' ulı İsh-Boshet ta'repten on eki adam ha'm Dawıt ta'repten on eki adam aldıg'a shıqtı.
16 Olardın' ha'r biri qarsılasının' basınan uslap aldı da, bir-birinin' bu'yirine qılısh shanshıp, birgelikte jan tapsırdı. Sonlıqtan Gibondag'ı sol jerge XelqatHassurim, yag'nıy «Qılıshlar maydanı» degen at berildi.
17 Sol ku'ni sawash ju'da' qatal tu's alıp, Dawıttın' adamları Abner menen izraillılardı jen'iliske ushırattı.
18 Seruyanın' u'sh ulı: İoab, Abishay ha'm Asahel de sol jerde edi. Asahel kiyik sıyaqlı shapqır edi.
19 Ol izinen qalmay, Abnerdi quwalap ketti.
20 Sonda Abner artına burılıp: – Asahel, bul senbisen'? – dep soradı. Asahel og'an: – Awa, bul men, – dep juwap berdi.
21 Abner og'an: – İzimnen quwıwdı toqtatıp, jigitlerdin' birine hu'jim qıl da, quraljarag'ın al, – dedi. Biraq Asaheldin' Abnerdi quwıwdı toqtatqısı kelmedi.
22 Sonda Abner Asahelge ja'ne eskertip: «Meni quwıwdı toqtat! Seni o'ltiriwimnin' nege keregi bar? Son'ınan tuwısqanın' İoabtın' ju'zine qalay qarayman?» – dedi.
23 Biraq Asahel quwıwdı toqtatpag'anlıqtan, Abner nayzasının' artqı ushın Asaheldin' qarnına tıg'ıp jiberdi. Nayza Asaheldin' arqasın tesip shıqtı. Ol jerge jıg'ıla sala, jan berdi. Asahel jıg'ılıp o'lgen jerden o'tip baratırg'anlardın' ha'mmesi sol jerde toqtap qaldı.
24 Al İoab penen Abishay Abnerdi quwıwdı dawam etip, ku'n batqanda, Gibon sho'line ketetug'ın joldag'ı Giaxtın' qarsı aldındag'ı Amma to'beshigine keldi.
25 Benyamin urıwının' adamları Abnerdin' izine erip jıynalıp, bir toparg'a birlesti ha'm bir to'beshiktin' basına shıg'ıp, sap tartıp turdı.
26 Abner dawıslap baqırıp, İoabqa: – Qılıshımız ma'n'gige insanlardı qırıwı kerek pe? Yamasa sen bunın' aqıbetinin' qayg'ılı bolatug'ının bilmeysen' be? A'skerlerin'e tuwısqanların quwıwdı toqtatıwdı qashan buyırasan'? – dedi.
27 İoab Abnerge: – Tiri Quday haqı ant ishemen: eger o'zin' aytpag'anın'da, a'skerler erten' azang'a shekem tuwısqanların quwıwdı toqtatpag'an bolar edi, – dep juwap berdi.
28 Son'ınan İoab ka'rnay shertti ha'm pu'tkil xalıq toqtadı. Keyin olar izraillılardı quwmadı da, olar menen urıspadı da.
29 Abner ha'm onın' adamları tu'n boyı İordan tegisligi boylap ju'rdi. Olar İordan da'ryasın kesip o'tip, Bitron jolı arqalı Maxanayımg'a qaytıp bardı.
30 İoab ta Abnerdi quwıwdı toqtatıp, qaytıp kelgennen son', ha'mme adamların jıynadı. Asahelden basqa, Dawıttın' adamlarınan ja'ne on tog'ız adam qazalang'an bolıp shıqtı.
31 Biraq Dawıttın' adamları Abner ta'reptegi Benyamin urıwının' adamlarınan u'sh ju'z alpıs adamdı o'ltirgen edi.
32 İoab ha'm onın' adamları Asaheldin' denesin alıp kelip, Beytlehemdegi a'kesinin' qa'birine jerledi. Son'ınan olar tu'n boyı jol ju'rip, tan' ata Xebrong'a jetip keldi.
