2 Patshalar 20 bob
1 Sol arada sol jerde Benyamin urıwınan Bixriydin' ulı Sheba degen jaramas bir adam payda boldı. Sheba ka'rnay shertip: «Dawıt penen baylanısımız joq, İshay ulı Dawıtta qarızımız da joq. Ha'y, izraillılar, ha'r birin'iz o'z u'yin'izge qaytın'lar!» – dedi.
2 Sonda pu'tkil izraillılar Dawıttı taslap, Bixriy ulı Shebanın' izine erip ketip qaldı. Al yahudalılar o'z patshası ta'repinde qalıp, İordan da'ryasınan Erusalimge shekem og'an joldas boldı.
3 Dawıt patsha Erusalimdegi sarayına qaytıp barg'anda, sarayg'a qarap turıwı ushın taslap ketken toqalların baqlaw astında saqlap, olardı ta'miyinlep turdı. Biraq olar menen jatpadı. Olar o'mirinin' aqırına shekem u'y qamag'ında saqlanıp, jesir hayallar sıyaqlı jasadı.
4 Dawıt Amasag'a: «U'sh ku'n ishinde yahudalılardı aldıma shaqırıp kel. O'zin' de usı jerde bol», – dedi.
5 Amasa yahudalılardı shaqırıp keliw ushın ketti. Biraq ol belgilengen waqıtta qaytıp kelmedi.
6 Sonda Dawıt Abishayg'a: «Endi Bixriy ulı Sheba bizlerge Abshalomnan da u'lkenirek jamanlıq isleydi. Ol o'zine qorg'anlı qalalardı tawıp alıp, ko'zimizden g'ayıp bolmawı ushın, sen menin' a'skerlerimdi al da, onın' izinen quw», – dedi.
7 Solay etip, İoabtın' adamları, keretler menen peletlerden alıng'an ta'n saqshılar ha'm pu'tkil ma'rt jawıngerler Bixriy ulı Shebanı quwıw ushın, Abishaydın' basshılıg'ında Erusalimnen shıqtı.
8 Olar Gibondag'ı u'lken jartastın' janına jetip barg'anda, Amasa olardın' aldınan shıqtı. İoab sawash kiyimin kiyip alg'an edi. Ol kiyiminin' sırtınan bir qayıs tag'ıp, qayısqa qınında turg'an bir qanjar baylag'an edi. İoab aldıg'a ju'rip baratırıp, qanjardı qınınan shıg'ardı.
9 İoab Amasag'a: «Qalaysan', tuwısqanım?» – dedi de, onı su'yiw ushın, on' qolı menen Amasanın' saqalınan usladı.
10 Amasa İoabtın' qolındag'ı qanjardı an'lamadı. İoab qanjardı Amasanın' qarnına sug'ıp jibergende, onın' ishek-qarnı jerge to'gildi. Ekinshi ret urıwg'a ha'jet qalmadı, ol o'lgen edi. Bunnan son', İoab ha'm onın' inisi Abishay Bixriy ulı Shebanı quwıwdı dawam etti.
11 İoabtın' adamlarının' biri Amasanın' o'liginin' janında turıp, Amasanın' adamlarına: «İoabqa sadıq bolıp, Dawıt ta'repte bolg'an ha'r bir adam İoabqa ersin», – dedi.
12 Amasanın' o'li denesi qang'a bılg'anıp, joldın' ortasında jatırg'an edi. İoabtın' adamı o'lige jaqınlasqan ha'r bir adamnın' sol jerde toqtap qalıp atırg'anın ko'rgende, Amasanın' o'ligin su'yrep, atızg'a ılaqtırıp jiberdi de, u'stine bir kiyimdi tasladı.
13 O'lik joldan alıp taslang'annan son', ha'mme Bixriy ulı Shebanı quwıw ushın, İoabtın' izinen ketti.
14 Sol arada Sheba pu'tkil İzrail urıwlarının' jerlerinen o'tip, Abel-BeytMaaxag'a keldi. Sol aymaqlardın' xalqı da og'an qosıldı. Ha'mmesi toplanıp, Shebag'a erdi.
15 İoab barlıq adamları menen barıp, Abel-BeytMaaxa qalasında bolg'an Shebanı qorshap aldı. Olar qalanın' aldına topıraq u'ydi ha'm onın' u'stine minip, diywaldı qulata basladı.
16 Sol waqıtta aqıllı bir hayal qala ishinen baqırıp: «Tın'lan'lar! Tın'lan'lar! İoabqa aytın'lar, berman kelsin, men onın' menen so'ylesejaqpan», – dedi.
17 İoab hayalg'a jaqınlastı. Sonda hayal onnan: – İoab degen sizbisiz? – dep soradı. – Awa, men, – dep juwap berdi İoab. Hayal İoabqa: – Onda shorın'ızdın' ga'pin esitin', – dedi. İoab og'an: – Qulag'ım sende, – dedi.
18 Hayal so'zin bılay dep dawam etti: – Burıng'ılar: «Abel qalasına barıp, ma'sla'ha't alın'lar», – deytug'ın ha'm ma'sele solay sheshiletug'ın edi.
19 Bizler İzraildın' tınıshlıg'ın qa'leytug'ın sadıq adamlarmız. Siz bolsan'ız, İzraildag'ı anaday qa'dirli qalalardın' birin wayran qılmaqshısız. Jaratqan İyenin' iyeligin ne ushın joq qılmaqshısız?
20 İoab hayalg'a juwap berip bılay dedi: – Hasla, olay emes! Men wayran qılmaqshı da, joq qılmaqshı da emespen.
21 Hesh qanday olay emes. Efrayım tawlı u'lkesinen bolg'an Bixriy ulı Sheba degen adam Dawıt patshag'a qarsı bas ko'terdi. Eger onın' jalg'ız o'zin tutıp bersen'iz, men qaladan artqa sheginemen. Sonda hayal İoabqa: – Onın' basın sizge diywaldan taslaymız, – dedi.
22 Son'ınan hayal o'zinin' dana so'zlerin pu'tkil xalıqqa jetkiziw ushın ketti. Xalıq Bixriy ulı Shebanın' basın kesip, İoabqa ılaqtırdı. Sonda İoab ka'rnay shertti ha'm onın' adamları qalanı taslap, u'ylerine ketti. İoab ta Erusalimge, patshanın' janına qaytıp keldi.
23 İoab pu'tkil İzrail a'skerlerinin' sa'rka'rdası edi. Ehoyada ulı Benaya keretler menen peletlerden alıng'an ta'n saqshılardın' a'skerbasısı edi.
24 Adoniram ma'rdikarg'a alıng'anlar u'stinen juwapker, Axilud ulı Ehoshafat jılnamashı edi.
25 Shewa xatker, Sadoq ha'm Abiyatar ruwxaniyler edi.
26 Ja'ne de, yairli İra Dawıttın' ruwxaniyi edi.
