2 Patshalar 21 bob
1 Dawıt patshalıq etken da'wirde u'sh jıl qatara asharshılıq boldı. Sonda Dawıt Jaratqan İyeden ken'es soradı ha'm Jaratqan İye og'an: «Bug'an Shaul ha'm onın' qanxor u'y-ishi sebepshi boldı. O'ytkeni Shaul gibonlılardı o'ltirdi», – dep juwap berdi.
2 Patsha gibonlılardı shaqırtıp alıp, olar menen so'ylesti. Gibonlılar İzrail xalqınan emes, al amor xalqınan qalg'an xalıq bolıp, izraillılar olardı tiri qaldırıwg'a ant ishken edi. Degen menen, İzrail ha'm Yahuda xalqı ushın jan ku'ydirgen Shaul olardı joq qılıwg'a ha'reket etti.
3 Dawıt gibonlılardan: – Sizler ushın ne isleyin? Jaratqan İyenin' xalqına pa'tiyan'ızdı beriwin'iz ushın, bul gu'nanı ne menen juwayın? – dep soradı.
4 Gibonlılar Dawıtqa: – Bizlerge Shauldan ha'm onın' u'y-ishinen gu'mis te, altın da kerek emes. İzrailda hesh kimdi de o'ltiriwdi qa'lemeymiz, – dedi. Dawıt ja'ne: – Sizler neni qa'lesen'iz, men sonı orınlayman, – dedi.
5 Sonda gibonlılar patshag'a bılay dep juwap berdi: – İzraildın' hesh bir jerinde jasamawımız ushın, Shaul bizlerdi qırıp taslamaqshı boldı.
6 Sonlıqtan Shauldın' urpaqlarınan jetewin bizlerge ber. Bizler olardı Jaratqan İyenin' tan'lag'anı bolg'an Shauldın' qalası Gibada, Jaratqan İyenin' aldında darg'a asamız. Patsha: – Men olardı sizlerge beremen, – dedi.
7 Dawıt patsha Shauldın' ulı İonatan menen Jaratqan İyenin' aldında ant ishiskeni sebepli, İonatannın' ulı Mefiboshetke rehim qıldı.
8 Al Ayya qızı Rispanın' Shauldan tuwg'an Armoniy ha'm Mefiboshet degen eki ulın, Shauldın' qızı Merabtın' mexolalı Barzillay ulı Adrielden tuwg'an bes ulın aldırıp,
9 olardı gibonlılardın' qolına tapsırdı. Gibonlılar olardı tawda, Jaratqan İyenin' aldında darg'a astı. Olardın' jetewi de bir waqıtta jan berdi. Olar ba'ha'rdegi jıyın-terimnin' da'slepki ku'nlerinde, arpa orag'ının' baslang'an waqtında o'ltirildi.
10 Ayya qızı Rispa aza kiyimin alıp, sol tawdag'ı bir jartastın' u'stine jaydı ha'm jıyın-terimnin' da'slepki ku'nlerinen baslap, denelerdin' u'stine gu'zgi jawın jawg'ang'a shekem sol jerde otırdı. Ol denelerdi ku'ndiz aspandag'ı quslardan, tu'nde jabayı haywanlardan qorıdı.
11 Dawıtqa Shauldın' toqalı Ayya qızı Rispanın' islegen isleri haqqında bildirildi.
12 Sonda Dawıt barıp, Shauldın' ha'm onın' ulı İonatannın' su'yeklerin Yabesh-Gilad xalqınan aldı. Filistler Gilboada Shauldı o'ltirgen ku'ni onın' ha'm onın' ulının' denelerin Beyt-Shan qalasının' maydanına asıp qoyg'an edi. Al Yabesh-Gilad xalqı denelerdi jasırın tu'rde ol jerden alıp qaytqan edi.
13 Dawıt Shauldın' ha'm onın' ulı İonatannın' su'yeklerin ol jerden alıp keldi. Darg'a asılg'an jeti adamnın' su'yekleri de jıynaldı.
14 Olardın' ha'm Shaul menen onın' ulı İonatannın' su'yekleri Benyamin jerindegi Selag'a, Shauldın' a'kesi Kishtin' qa'birine qoyıldı. Solay etip, patshanın' barlıq buyrıqları orınlandı. Bunnan keyin, Quday el ushın soralg'an duwalarg'a juwap berdi.
15 Filistler menen izraillılar arasında jan'adan urıs baslandı. Dawıt adamları menen barıp, filistlerge qarsı urıstı ha'm ol qattı sharshadı.
16 Ushının' o'zi u'sh ju'z shekel qoladan islengen nayza ko'terip, taza qılısh asıng'an da'w a'wladlarınan bolg'an İshbiy-Benob Dawıttı o'ltirmekshi boldı.
17 Biraq Seruya ulı Abishay Dawıtqa ja'rdemge kelip, sol filistti o'ltirdi. Bunnan keyin, Dawıttın' adamları ant iship, Dawıtqa: «İzraildın' shırag'ı o'ship qalmawı ushın, artıq sizin' bizler menen urısqa barıwın'ızg'a jol qoymaymız», – dedi.
18 Son'ınan Gob qalasında filistler menen ja'ne urıs baslandı. Bul urısta xushalı Sibbexay da'w a'wladlarınan bolg'an Saf degen adamdı o'ltirdi.
19 Gobta izraillılar menen filistler arasında tag'ı bir urıs boldı. Urısta beytlehemli Yaare-Oregimnin' ulı Elxanan gatlı Goliyattı o'ltirdi. Goliyattın' nayzasının' sabı toqıw u'skenesinin' qadasınday edi.
20 Keyin ala Gat qalasında ja'ne sawash boldı. Ol jerde da'wdey bir adam bar edi. Onın' qolları ha'm ayaqları altı barmaqlı bolıp, ha'mmesi bolıp jigirma to'rt barmag'ı bar edi. Ol da da'w a'wladlarınan edi.
21 Usı adam izraillılardı masqaralag'anda, Dawıttın' a'jag'ası Shimeanın' ulı İonatan onı o'ltirdi.
22 Dawıt ha'm onın' adamları ta'repinen o'ltirilgen usı to'rt adam da Gattag'ı da'w a'wladlarınan edi.
