2 Patshalar 22 bob
1 Jaratqan İye Dawıttı pu'tkil dushpanlarınan ha'm Shauldın' qolınan qutqarg'an ku'ni Dawıt Jaratqan İyege arnap, mına jırdı ayttı:
2 «Jaratqan İye menin' su'yengen tawım, qorg'anım ha'm qutqarıwshım,
3 Qudayım menin' qorg'awshı jartasım, Onnan pana tabaman, Ol qalqanım, qu'diretli qutqarıwshım, Ol qorg'anım ha'm panam, Qutqarıwshım, zulımlıqtan meni Sen qutqarasan'.
4 Maqtawg'a ılayıqlı Jaratqan İyeni shaqıraman, Qutqarılaman dushpanlarımnan.
5 A'jel tolqınları qorshap alıp, Nabıt qılıw ag'ısları qorqıttı meni.
6 O'liler ma'kanının' arqanları bayladı meni, O'lim duzaqları shıqtı qarsıma.
7 Azap ishinde Jaratqan İyege jalbarındım, Qudayımdı shaqırdım. İbadatxanasınan Ol dawısımdı esitti, Qıshqırg'anım qulag'ına jetip bardı.
8 Sol waqıtta jer ju'zi titirep, shayqaldı, Aspannın' tiykarı la'rzege keldi, Sebebi Jaratqan İye g'a'zepke mingen edi.
9 Murnınan tu'tin ko'terildi, Awzınan jalmap jutatug'ın jalın shıg'ıp, Onnan ko'mir shog'ı jawdı.
10 Ko'klerdi jarıp, to'menge tu'sip, Qara bult Onın' ayag'ının' astında.
11 Bir kerubqa minip, Samaldın' qanatları u'stinde ushtı.
12 Tu'nekke oranıp, Qara bultlardı O'zine shertek qıldı.
13 Onın' aldındag'ı nurdan, Ko'mir shog'ı shashırap turdı.
14 Gu'rkiredi aspannan Jaratqan İye, Dawıs berdi Quday Taala.
15 Oqlar atıp, dushpanlardı pıtırattı, Shaqmaq shaqtırıp, olardı albıratıp tasladı.
16 Jaratqan İyenin' keyisinen, Murnınan shıqqan ku'shli deminen, Ten'izdin' tu'bi ko'rindi, Du'nyanın' tiykarı ashılıp qaldı.
17 Aldı meni Jaratqan İye qolın sozıp joqarıdan, Ha'm shıg'ardı teren' suwlardan.
18 Qutqardı meni ku'shli dushpanımnan, Mennen ku'shlirek bolg'an, Meni jek ko'retug'ınlardan.
19 Qarsı turdı olar mag'an basıma is tu'skende, Biraq tirek boldı mag'an Jaratqan İye.
20 Ol ken' jerge shıg'ardı meni, Kewli tolıp, qutqardı meni.
21 Jaratqan İye haqlıg'ım ushın sıy berip, Pa'k qollarım ushın esesin qaytardı.
22 O'ytkeni ju'rdim Jaratqan İyenin' jolı menen, Jamanlıq islemedim, Qudayımnan uzaqlasıp.
23 Ko'z aldımda saqladım barlıq qararların, Ju'z burmadım Onın' qag'ıydalarınan.
24 Minsiz boldım onın' aldında, O'zimdi saqladım gu'na islewden.
25 Esesin qaytardı Jaratqan İye, Haqlıg'ım ha'm ko'z aldındag'ı pa'kligim ushın.
26 Sen sadıqqa sadıqlıq ko'rsetip, Minsizge minsiz bolasan'.
27 Pa'k adamg'a pa'kligin'di ko'rsetip, Jalatayg'a jalatayshılıg'ına qaray is tutasan'.
28 Kishipeyillerdi qutqarasan', Menmenlerdi baqlap, ko'kiregin basasan'.
29 Qaran'g'ılıg'ımdı jaqtıg'a aylandıratug'ın, O'zin' shırag'ımsan', Jaratqan İye!
30 Senin' menen la'shkerlerdi qıyratıp, Qudayım menen diywallardan asarman.
31 Qudaydın' jolı minsiz, Jaratqan İyenin' so'zi haq, Ol qalqanı O'zinen pana izlegen ha'r bir adamnın'.
32 Jaratqan İyeden basqa Quday bar ma? Qudaydan basqa qorg'awshı jartas bar ma?
33 Quday menin' qorg'anım, Jolımdı minsiz qılatug'ın da Ol.
34 Kiyiktin' ayaqlarınday qılar ayaqlarımdı, Qoyar meni biyikliklerge.
35 U'yretedi qollarımdı urısıwg'a, Ha'm qola oq jaydı kerip tartıwg'a.
36 Beresen' mag'an qutqarılıw qalqanın'dı, Ma'rtebeli qılar ja'rdemin' meni.
37 Ken' qılarsan' basar jolımdı, Ayaqlarım menin' su'rnikpes.
38 Joq qıldım dushpanlarımdı quwıp jetip, İzge qaytpadım olardı joq qılmay turıp.
39 Qırıp, joq ettim, tura almay qaldı, Ayaqlarım astında sozılıp jatıp.
40 Sawash ushın meni toltırdın' ku'shke, Mag'an qarsı shıqqanlardı bas iydirdin' aldımda.
41 Dushpanlarımdı mennen qashatug'ın qıldın', Men de o'zimdi jek ko'rgenlerdi joq ettim.
42 Jalbarındı olar, biraq qutqarg'an bolmadı, Jaratqan İyeni shaqırdı, biraq Ol juwap bermedi.
43 Ezdim olardı jerdegi topıraq yan'lı, Basqıladım olardı jerdegi ılay yan'lı.
44 Qutqardın' xalqımnın' ko'terilisinen meni, Milletlerge basshı qılıw ushın saqladın' meni, Xızmet eter o'zim tanımaytug'ın xalıqlar mag'an.
45 Jat elliler mag'an bende bolar, Men tuwralı esitiwden mag'an boysınar,
46 Jat ellilerdin' ju'zleri quwarıp, Shıg'ar titirep, panalag'an jerlerinen.
47 Jaratqan İye tiri! Qorg'awshı jartasıma alg'ıslar bolsın! Qutqarıwshım bolg'an jartasım ullılansın!
48 Ol boladı menin' o'shimdi alg'an, Xalıqlardı mag'an bag'ınıshlı qılg'an.
49 Qutqarar Ol dushpanlarımnan, U'stin qılar mag'an qarsı shıqqanlardan, Azat qılar jawızlardın' qolınan.
50 Bunın' ushın Jaratqan İye! Ta'riyipleymen Seni xalıqlar arasında, Saz shertip alg'ıs aytaman atın'a arnap.
51 Jaratqan İye O'z patshasın ullı jen'islerge eristirer, Maylag'an patshası Dawıtqa ha'm onın' urpag'ına, Ma'n'gige miyrim-sha'pa'a'tin ko'rseter».
