2 Patshalar 23 bob

Dawıttın' son'g'ı so'zleri (1-7), Dawıttın' ma'rt a'skerleri (8-39).

¹ Dawıttın' son'g'ı so'zleri mınalar boldı: «İshay ulı Dawıt, Quday ma'rtebeli qılg'an adam, Yaqıptın' Qudayının' maylag'anı, İzraildın' su'yikli jırshısı bılay deydi:

² So'yler Jaratqan İyenin' Ruwxı men arqalı, Onın' so'zi menin' tilimde.

³ So'yledi İzraildın' Qudayı, İzraildın' su'yengen jartası mag'an bılay dedi: „İnsanlardı a'dillik penen ha'm Qudaydan qorqıp basqarg'an adam,

⁴ Ol bultsız aspandag'ı tan' nurına uqsaydı, Jerden sho'p shıg'aratug'ın jawınnan keyingi nurlarg'a uqsaydı“.

⁵ U'y-ishim de Quday menen solay emes pe? Ol menin' menen ma'n'gi qalatug'ın, Ha'r ta'repleme qolaylı ha'm isenimli kelisim du'zdi. Menin' qutqarılıwımdı da, tileklerimdi de Ol iske asırmay ma?

⁶ Al nahaqlar qol menen uslap bolmaytug'ın tikenler kibi ılaqtırılar,

⁷ Tikenlerdi joq qılmaqshı bolg'anlar, Temir a'sbap yamasa nayzanın' sabı menen qurallanar. Tikenler turg'an jerinde jag'ıp jiberiler».

⁸ Dawıttın' batır jawıngerlerinin' atları mınalar: u'sh adamnın' ishinde basshı bolg'an taxkemonlı İosheb-Bashshebet bir urısqanda nayzası menen segiz ju'z adamdı o'ltirdi.

⁹ Ekinshisi axoxlının' urpag'ınan Dodo ulı Elazar bolıp, urısıw ushın toplang'an filistlerge qarsı shıqqan Dawıttın' janındag'ı u'sh batırdın' biri edi. İzraillılar ol waqıtta artqa shegingen edi.

¹⁰ Biraq Elazar ornında turıp qaldı. Ol qolı talıp, qılıshqa jabısıp qalg'ansha, filistlerdi o'ltirdi. Sol ku'ni Jaratqan İye ullı jen'is inam etti. İzraillılar tek o'lgenlerdin' zatların oljag'a alıw ushın g'ana Elazardın' janına bardı.

¹¹ U'shinshisi hararlı Age ulı Shamma edi. Filistler Lexiydegi bir qızıl lobiya atızının' janında toplang'anda, İzrail a'skerleri olardın' aldına tu'sip qashqan edi.

¹² Biraq Shamma atızdın' ortasında turıp, sol jerdi qorg'adı ha'm filistlerdi o'ltirdi. Sonda Jaratqan İye ullı jen'is inam etti.

¹³ Jıyın-terim waqtında, otız basshıdan u'shewi Dawıtqa qosılıw ushın Adullam u'n'girine ketti. Sol waqıtta filistlerdin' bir toparı Refaim oypatlıg'ında orda qurg'an edi.

¹⁴ Bul waqıtta Dawıt qorg'anda, al filistlerdin' tiykarg'ı toparı Beytlehemde edi.

¹⁵ Dawıt suw ishkisi kelip: «Qa'nekey, Beytlehem da'rwazasının' janındag'ı suw saqlag'ıshtan birew mag'an suw a'kelip berse edi!», – dedi.

¹⁶ Sonda bul u'sh batır filistlerdin' ordasın jarıp o'tip, Beytlehem da'rwazasının' janındag'ı suw saqlag'ıshtan suw alıp, Dawıtqa a'kelip berdi. Biraq Dawıt onı ishiwden bas tarttı ha'm suwdı jerge to'gip, Jaratqan İyege usındı.

¹⁷ Ol: «Jaratqan İye, bunı islewden meni saqlay go'r! Janların qa'wip astına qoyıp, barg'an bul u'sh adamnın' qanın isheyin be?» – dep, Dawıt suwdı ishpedi. Bul u'sh batır usınday erlik ko'rsetken edi.

¹⁸ İoabtın' tuwısqanı, Seruyanın' ulı bolg'an Abishay sol otız batırdın' basshısı edi. Abishay nayzası menen u'sh ju'z adamdı o'ltirdi. Sonlıqtan ol da u'sh batır sıyaqlı dan'q tarattı.

¹⁹ Ol otız*batırg'a qarag'anda ataqlıraq bolıp, olarg'a basshı edi. Biraq ol sol u'sh batırdın' qatarına kirmedi.

²⁰ Ehoyada ulı qabseelli Benaya da ma'rt jawınger bolıp, ol da ullı isler isledi. Ol moablı eki ku'shli jawıngerdi, al qar jawg'an ku'ni bir shuqırg'a tu'sip, arıslandı o'ltirdi.

²¹ Ja'ne ol da'wdey bir mısırlını da o'ltirdi. Mısırlının' qolında nayzası bar edi. Al Benaya og'an tayaq penen qarsı shıg'ıp, onın' qolındag'ı nayzasın tartıp aldı da, onı o'zinin' nayzası menen o'ltirdi.

²² Ehoyada ulı Benayanın' islegen isleri mine usılar. Ol da sol u'sh batır sıyaqlı dan'q tarattı.

²³ Ol otız batırg'a qarag'anda ataqlıraq bolsa da, biraq sol u'sh batırdın' qatarına kirmedi. Dawıt onı o'zinin' ta'n saqshılarına basshı etip qoydı.

²⁴ Otız batırdın' qatarında bolg'anlar to'mendegiler: İoabtın' inisi Asahel, Beytlehemli Dodonın' ulı Elxanan,

²⁵ xarodlılar Shamma ha'm Eliqa,

²⁶ peletli Xeles, teqoalı İkkesh ulı İra,

²⁷ anatotlı Abiezer, xushalı Mabunnay,

²⁸ axoxlı Salmon, netofalı Maharay,

²⁹ netofalı Baana ulı Xeleb,Benyamin urıwınan gibalı Ribay ulı İttay,

³⁰ piratonlı Benaya, Gaash sayları aymag'ınan Hidday,

³¹ arbalı Abiy-Albon, barxumlı Azmawet,

³² shaalbonlı Elyaxba, Yashennin' ulları:

³³ hararlı Shammanın' ulı İonatan, hararlı Sharar ulı Axiam,