2 Patshalar 24 bob
1 Jaratqan İyenin' İzrail xalqına ja'ne g'a'zebi qaynadı ha'm Dawıttı olarg'a qarsı qoyıp, İzrail ha'm Yahuda xalqın sanap shıg'ıwdı tapsırdı.
2 Sonda patsha qasındag'ı sa'rka'rdası İoabqa mına buyrıqtı berip, og'an: – Dannan Beer-Shebag'a shekemgi barlıq urıwlarg'a barıp, xalıqtı sanap shıg'ın'lar, men xalıqtın' sanın bileyin, – dedi.
3 Biraq İoab Dawıtqa: – Qudayın' Jaratqan İye İzrail xalqın ha'zirgisinen ju'z ese qılıp ko'beytsin. Taqsır, siz de bunı ko'rgeysiz. Biraq, taqsır, nege usılay islewdi qa'lep qaldın'ız? – dedi.
4 Degen menen, İoabtın' ha'm a'skerbasılardın' so'zinen patshanın' so'zi u'stin keldi. Solay etip, olar patshanın' janınan shıg'ıp, İzrail xalqın sanaw ushın ketti.
5 Olar İordan da'ryasın kesip o'tip, Gad jerindegi oypatlıqtın' ortasındag'ı qalanın' qublasına, Aroerge shatır qurıp, sol jerde toqtadı. Son'ınan ol jerden Yazerge,
6 Giladqa, Taxtim-Xodshi jerlerine ha'm DanYaaang'a o'tip, aylanba jol arqalı Sidong'a bardı.
7 Onnan keyin, Tir qorg'anına ha'm xiw menen kenaan xalıqlarının' barlıq qalalarına bardı. Aqırında, Yahudanın' qublasındag'ı Beer-Shebag'a keldi.
8 Olar tog'ız ay jigirma ku'n eldi bastan-ayaq aylanıp shıqqannan keyin, Erusalimge qaytıp keldi.
9 İoab sanaq na'tiyjesin Dawıtqa bayan qıldı. İzrailda urısqa jaramlı segiz ju'z mın', al Yahudada bolsa, bes ju'z mın' adam bar edi.
10 Xalıqtı sanaqtan o'tkergennen keyin, Dawıttın' hu'jdanı qıynaldı ha'm Jaratqan İyege: «Bul isim arqalı u'lken gu'na isledim. Jaratqan İye, jalbarınaman, qulın'nın' ayıbın keshire go'r! Men aqmaqlıq qıldım», – dedi.
11 Erten'ine azanda Dawıt uyqıdan turmastan aldın, onın' wa'liyi bolg'an payg'ambar Gadqa Jaratqan İyeden mınaday so'z tu'sti:
12 «Barıp, Dawıtqa bılay dep ayt: „Jaratqan İye bılay deydi: Men sag'an u'sh jazanı usınaman. O'zin'e solardın' birewin tan'la, keyin sag'an sol jazanı beremen“».
13 Gad Dawıtqa barıp, mınalardı bildirdi: – Elin'izde jeti jıl ashlıq bolsın ba? Yamasa sizdi quwdalaytug'ın dushpanların'ızdın' aldında u'sh ay qashıp ju'resiz be? Yaki, elin'iz u'sh ku'n oba keselligine ushırasın ba? Endi jaqsılap oylap ko'rip, meni Jibergenge ne dep juwap beretug'ınımdı sheshin'.
14 Dawıt Gadqa: – Mag'an ju'da' qıyın. Adamnın' qolına tu'skenshe, Jaratqan İyenin' qolına tu'seyin. Sebebi Onın' rehimi ku'shli, – dep juwap berdi.
15 Solay etip, Jaratqan İye azannan baslap belgilengen waqıtqa shekem İzrail xalqına oba keselligin jiberdi. Sonda Dannan Beer-Shebag'a shekemgi xalıqtan jetpis mın' adam o'ldi.
16 Biraq Qudaydın' perishtesi Erusalimdi joq qılmaqshı bolıp qolın sozg'anda, Jaratqan İye O'zi jiberip atırg'an qırg'ınnan waz keshti ha'm xalıqtı qırg'an perishtege: «Jeter endi, qolın'dı tart», – dedi. Sol waqıtta Jaratqan İyenin' perishtesi ebus xalqınan bolg'an Arawnanın' qırman jerinde turg'an edi.
17 Dawıt xalıqtı qırg'an perishteni ko'rgende, Jaratqan İyege: «Gu'na islep, jawızlıq qılg'an meng'o. Al mına qoylardın' ne jazıg'ı bar? O'tinemen, jaqsısı, meni ha'm a'kemnin' xojalıg'ın jazala», – dedi.
18 Sol ku'ni payg'ambar Gad Dawıtqa kelip, og'an: «Ebus xalqınan bolg'an Arawnanın' qırman jerine barıp, sol jerde Jaratqan İyege arnap, qurbanlıq orın qurın'», – dedi.
19 Dawıt Gadtın' so'zine Jaratqan İyenin' buyrıg'ı sıyaqlı qulaq asıp, jolg'a shıqtı.
20 Arawna patshanın' ha'm onın' xızmetshilerinin' o'zine tuwrılap kiyatırg'anın ko'rdi. Ol Dawıttın' aldına barıp, et-betinen jerge jıg'ılıp, ta'jim etti.
21 Son'ınan ol: – Taqsır, ne ushın qulın'ızdın' janına keldin'iz? – dep soradı. Dawıt og'an: – Jaratqan İyege arnap qurbanlıq orın qurıw ushın, qırman jerin sennen satıp alıwg'a keldim. Xalıqqa kelgen oba keselligi toqtaw ushın usılay islemekshimen, – dep juwap berdi.
22 Arawna Dawıtqa: – Taqsır, neni maqul ko'rsen'iz, sonı alıp, Jaratqan İyege usının'. Mine, jandırılatug'ın qurbanlıq ushın o'gizler, otın ushın tu'yek aydaytug'ın qural ha'm o'gizlerdin' er-turmanları.
23 Taqsır! Men bulardın' ha'mmesin sizge beremen, – dedi. Son'ınan: – Qudayın'ız Jaratqan İyenin' sizge kewli tolsın! – dep qosıp qoydı.
24 Biraq patsha: – Yaq, bolmaydı! Sennen bul na'rselerdi qunın to'lep satıp alaman. Sebebi pulı to'lenbegen qurbanlıqtı Qudayım Jaratqan İyege arnap jaqpayman, – dedi. Solay etip, Dawıt qırman jerin ha'm o'gizlerdi eliw shekel gu'miske satıp aldı.
25 Son'ınan Dawıt sol jerde Jaratqan İyege arnap qurbanlıq orın qurıp, jandırılatug'ın qurbanlıqlardı ha'm tatıwlıq qurbanlıqların berdi. Jaratqan İye de el ushın etilgen duwalarg'a juwap berdi ha'm İzrailg'a kelgen oba toqtadı.
