2 Patshalar 4 bob

İsh-Boshettin' o'ltiriliwi(1-12).

¹ Shauldın' ulı İsh-Boshet Abnerdin' Xebronda o'ltirilgenin esitkende, qa'weterge tu'sti. Pu'tkil İzrail xalqı da qorqısıp qaldı.

² İshBoshettin' xızmetinde basqınshılar toparın basqaratug'ın Baana ha'm Rexab degen eki adam bar edi. Olar Benyamin urpag'ınan bolg'an beerotlı Rimmonnın' ulları edi. Beerot qalası benyaminlilerge tiyisli qala dep sanalatug'ın edi.

³ Sebebi beerotlılar qalanı taslap, Gittayımg'a qashıp ketken edi. Sonlıqtan olar usı ku'nge shekem sol jerde kelgindi bolıp jasap kiyatır.

⁴ Shauldın' ulı İonatannın' eki ayag'ı da la'n' bolıp qalg'an Mefiboshet* degen bir ulı bar edi. İzreelden Shaul menen İonatannın' qazalang'anı haqqında xabar kelgende, Mefiboshet bes jasta edi. Sonda ta'rbiyashısı onı alıp qashıp ketken edi. Ol balanı asıg'ıs alıp qashıp baratırg'anda, balanı qolınan tu'sirip alg'anlıqtan, bala mayıp bolıp qalg'an edi.

⁵ Beerotlı Rimmonnın' ulları Rexab penen Baana jolg'a shıg'ıp, ku'n qattı qızg'an waqıtta İsh-Boshettin' u'yine kelgende, İsh-Boshet uyıqlap jatırg'an edi.

⁶ Rexab ha'm onın' tuwısqanı Baana biyday alatug'ın adam sıyaqlı u'yge kirip, İsh-Boshettin' qarnına qanjar tıg'ıp o'ltirdi de, qashıp ketti.

⁷ Waqıya bılay bolg'an edi: olar u'yge kirgende, İsh-Boshet uyıqlaytug'ın bo'lmesindegi o'z to'seginde jatırg'an edi. Rexab penen Baana İsh-Boshetti o'ltirip, basın kesip aldı ha'm bastı ko'terip, pu'tkil tu'n boyı İordan tegisligi arqalı ju'rdi.

⁸ Olar İsh-Boshettin' basın Xebrong'a, Dawıt patshag'a alıp kelip, og'an: «Mine, sizdi o'ltirmekshi bolg'an dushpanın'ız Shauldın' ulı İsh-Boshettin' bası! Jaratqan İye bu'gin Shauldan ha'm onın' urpag'ınan taqsırım, sizin' o'shin'izdi aldı», – dedi.

⁹ Biraq Dawıt beerotlı Rimmonnın' ulları Rexab penen onın' tuwısqanı Baanag'a bılay dep juwap berdi: «Meni ha'r tu'rli ba'le-qadalardan qutqarg'an tiri Jaratqan İye haqı ant ishemen:

¹⁰ burın Shauldın' o'limi haqqında xabardı mag'an xosh xabar retinde alıp kelgen adamdı uslap alıp, Siklagta o'ltirgen edim. A'kelgen xosh xabarı ushın og'an berilgen sıy usı boldı.

¹¹ Endi ayıpsız bir adamdı o'z u'yinde, to'seginde o'ltirgen jawız adamlardın' o'ltiriliwi de gu'mansız. Onın' qanı ushın sizlerden o'sh alıp, sizlerdi jer betinen joq qılıp jibermeymen be?»

¹² Son'ınan Dawıt adamlarına buyrıq berdi. Olar eki tuwısqandı o'ltirip, olardın' ayaq- qolların kesti de, denesin Xebrondag'ı hawızdın' boyına asıp qoydı. Al İshBoshettin' basın aparıp, Xebrondag'ı Abnerdin' qa'birine jerledi.