2 Patshalar 5 bob
1 İzraildın' barlıq urıwları Xebronda bolg'an Dawıtqa kelip, bılay dedi: «Bizler sizin' o'z su'yegin'iz ha'm o'z etin'izbiz.
2 Burın Shaul patsha bolg'an waqıtta da, sawashta İzraildı o'zin'iz baslap ju'retug'ın edin'iz. Jaratqan İye sizge: „Xalqım İzrailg'a sen shopanlıq etip, olarg'a hu'kimdar bolasan'“, – dep wa'de bergen edi».
3 Solay etip, İzraildın' barlıq aqsaqalları Xebrong'a, patsha Dawıttın' aldına kelgende, Dawıt Xebronda Jaratqan İyenin' aldında olar menen kelisim du'zdi. Olar da Dawıttı maylap, İzrailg'a patsha etip qoydı.
4 Dawıt otız jasında patsha bolıp, qırıq jıl patshalıq etti.
5 Ol Xebronda jeti jıl altı ay Yahuda u'stinen, Erusalimde otız u'sh jıl pu'tkil İzrail ha'm Yahuda u'stinen patshalıq etti.
6 Dawıt patsha ha'm onın' adamları Erusalimde jasap atırg'an ebus xalqına shabıwıl jasaw ushın jolg'a shıqqanda, ebus xalqı: «Dawıt bul jerge kire almaydı», – dep oylap, Dawıtqa: «Sen bul jerge kire almaysan'. Soqırlar menen sholaqlar-aq seni quwıp saladı», – dep baqırdı.
7 Degen menen, Dawıt Sion qorg'anın, keyin ala «Dawıttın' qalası» dep atalatug'ın qorg'andı qolg'a kirgizdi.
8 Sol ku'ni Dawıt adamlarına bılay dedi: «Ebus xalqın jen'bekshi bolg'an ha'r bir adam suw tarmaqları arqalı barıp, Dawıttı jek ko'retug'ın sol sholaq ha'm soqır ebuslardı joq qılsın», – dedi. Sonlıqtan: «Soqırlar menen sholaqlar sarayg'a kirmeydi», – degen ga'p qalg'an eken.
9 Bunnan keyin, Dawıt qorg'an qalag'a ornalasıp aldı ha'm onı «Dawıttın' qalası» dep atadı. Ol qorg'annın' aynala do'geregine Millo degen jerden baslap qosımsha qorg'an qurdı.
10 Dawıt ku'shke tolıp bara berdi. O'ytkeni A'lemnin' Qudayı Jaratqan İye onın' menen birge edi.
11 Tir patshası Xiram Dawıtqa elshiler, sonın' menen birge kedr ag'ashların, ag'ash ustaların ha'm tas qalawshı ustalardı jiberdi. Bul adamlar Dawıt ushın bir saray qurdı.
12 Sonda Dawıt Jaratqan İyenin' o'zin İzrailg'a patsha etip tayınlag'anın ha'm O'z xalqı İzrail ushın onın' patshalıg'ın dan'qqa eristirgenin tu'sindi.
13 Dawıt Xebronnan Erusalimge kelgennen keyin de o'zine ja'ne toqallar ha'm hayallar alıp, olardan da ul ha'm qızlar ko'rdi.
14 Dawıttın' Erusalimde tuwılg'an ul-qızlarının' atları mınalar: Shammua, Shobab, Natan, Sulayman,
15 İbxar, Elishua, Nefeg, Yafia,
16 Elishama, Elyada ha'm Elifelet.
17 Filistler Dawıttın' maylanıp, İzrailg'a patsha etip qoyılg'anın esitkende, pu'tkil filist a'skerleri Dawıttı qolg'a tu'siriw ushın izlep ketti. Bunı esitken Dawıt qorg'ang'a ketti.
18 Filistler kelip, Refaim oypatlıg'ına jaylastı.
19 Dawıt Jaratqan İyeden: – Filistlerge qarsı ju'ris qılayın ba? Olardı mag'an ta'slim etesen' be? – dep soradı. Jaratqan İye Dawıtqa: – Awa, ju'ris qıl. Olardı sag'an so'zsiz ta'slim etemen, – dep juwap berdi.
20 Sonda Dawıt a'skerleri menen birge Baal-Perasimge ketti ha'm ol jerde filistlerdi qıyrattı. Keyin ol: «Ha'r bir bo'getti jaypap o'tetug'ın suw tasqını sıyaqlı, Jaratqan İye de dushpanlarımdı aldımda qıyratıp tasladı», – dedi. Sol sebepli bul jerge «Baal-Perasim» degen at berildi.
21 Filistler sol jerge o'zlerinin' butların taslap qashqan edi. Dawıt ha'm onın' adamları sol butlardı alıp ketti.
22 Bunnan son', filistler ja'ne kelip, Refaim oypatlıg'ına jaylastı. 23Dawıt Jaratqan İyeden qayta sorag'anda, Jaratqan İye og'an bılay dep juwap berdi: «Olarg'a bul jerden hu'jim qılma. Olardın' artınan aylanıp bar da, tut ag'ashları ta'repten hu'jim qıl.
23 Dawıt Jaratqan İyeden qayta sorag'anda, Jaratqan İye og'an bılay dep juwap berdi: «Olarg'a bul jerden hu'jim qılma. Olardın' artınan aylanıp bar da, tut ag'ashları ta'repten hu'jim qıl.
24 Tut ag'ashlarının' joqarısınan ayaq sesleri sıyaqlı dawıstı esitiwden-aq, ha'reketke kiris. Sebebi sol waqıtta Men senin' aldın'da filist ordasın qıyratıw ushın baratırg'an bolaman
25 Dawıt Jaratqan İyenin' buyırg'anınday qıldı ha'm filist ordasın Gebadan Gezerge deyin qıyratıp bardı.
