2 Patshalar 8 bob
1 Aradan biraz waqıt o'tkennen keyin, Dawıt filistlerdi jen'ip, olardı boysındırdı ha'm filistlerdin' qolınan Meteg-Amma qalasın tartıp aldı.
2 Son'ınan Moab xalqın da jen'iliske ushırattı. Olardı jerge qatara jatqızıp, arqan menen o'lshedi ha'm eki o'lshemdi o'ltirip, u'shinshi o'lshemdi tiri qaldırdı. Solay etip, moablılar Dawıtqa bag'ınıshlı bolıp, og'an salıq to'leytug'ın boldı.
3 Dawıt Evfrat da'ryasına shekemgi o'z patshalıg'ın qayta tiklemekshi bolıp, sol jerge ju'ris qılg'an Soba patshası Rexob ulı Hadadezerdi de jen'di.
4 Dawıt Hadadezerdin' bir mın' jeti ju'z arbalı ha'm jigirma mın' piyada a'skerin qolg'a aldı. Ol sawash arbasına jegiletug'ın barlıq atlardın' tirseklerin kesip mayırıp, onnan tek ju'z attı g'ana alıp qaldı.
5 Son'ınan Dawıt Soba patshası Hadadezerge ja'rdemge kelgen Damaskte jasaytug'ın aramlardan jigirma eki mın' adamdı o'ltirdi.
6 Ol Damasktegi aramlardın' jerine o'zinin' saqshılar toparın ornalastırdı. Aramlar da Dawıtqa bag'ınıshlı bolıp, salıq to'leytug'ın boldı. Jaratqan İye Dawıttı barg'an jerinin' ha'mmesinde jen'iske eristirdi.
7 Dawıt Hadadezerdin' sa'rka'rdaları alıp ju'rgen altın qalqanlardı alıp, Erusalimge a'keldi.
8 Ja'ne de, ol Hadadezerdin' qol astındag'ı Betax ha'm Berotay qalalarınan ko'p mug'darda qola aldı.
9 Xamat patshası Toy Dawıttın' Hadadezerdin' pu'tkil a'skerlerin jen'genin esitti.
10 Patsha Toy Dawıtqa sa'lem beriw ha'm onı sawashta Hadadezer u'stinen erisken jen'isi menen qutlıqlaw ushın, ulı İoramdı og'an jiberdi. Sebebi Toy Hadadezer menen uzaq waqıttan beri urısıp kiyatırg'an edi. İoram Dawıtqa gu'mis, altın ha'm qoladan islengen zatlardı sawg'ag'a alıp keldi.
11 Dawıt patsha bul sawg'alardı basıp alg'an ellerinen alıp kelgen gu'mis ha'm altınlar menen birge Jaratqan İyege bag'ıshladı.
12 Bular aram, moab, ammon, filist ha'm amalek xalıqlarınan alıp kelingen, ja'ne de, Soba patshası Rexob ulı Hadadezerden tartıp alıng'an gu'mis ha'm altınlar edi.
13 Dawıt Duz oypatlıg'ında edom xalqınan on segiz mın'ın o'ltirip qaytqannan son', onın' dan'qı astı.
14 Ol Edom aymag'ının' ha'mme jerine o'z saqshılar toparın ornalastırdı. Pu'tkil edomlar Dawıtqa bag'ınıshlı boldı. Jaratqan İye Dawıttı barg'an jerinin' ha'mmesinde jen'iske eristirdi.
15 Dawıt pu'tkil İzrailda patshalıq etip, xalqına tuwrı ha'm a'dillik penen hu'kimdarlıq etti.
16 Seruya ulı İoab sa'rka'rda, Axilud ulı Ehoshafat jılnamashı edi.
17 Axitub ulı Sadoq penen Abiyatar ulı Aximelex ruwxaniy, Seraya xatker edi.
18 Ehoyada ulı Benaya keretler menen peletlerden alıng'an ta'n saqshılardın' basshısı edi. Al Dawıttın' ulları ruwxaniyler edi.
