3 Patshalar 11 bob
1 Sulayman faraonnın' qızınan basqa moab, ammon, edom, xett xalıqlarınan ha'm sidonlılardan bolg'an shet elli hayallardı su'ydi.
2 Jaratqan İye İzrail xalqına usı xalıqlar tuwralı: «Sizlerdin' ju'regin'izdi o'zlerinin' qudaylarına awdırmawı ushın, olardan qız alıp, qız berispewin'iz kerek», – degen edi. Degen menen, Sulayman bul hayallarg'a su'yispenshilik penen baylandı.
3 Sulaymannın' patsha qızlarınan bolg'an jeti ju'z hayalı ha'm u'sh ju'z toqalı bar edi. Hayalları Sulaymandı joldan shıg'ardı.
4 Qartayg'an shag'ında, olar Sulaymannın' ju'regin basqa qudaylarg'a awdırdı. Sulayman ju'regin tolıg'ı menen Qudayı Jaratqan İyege bag'ıshlag'an a'kesi Dawıtqa uqsamadı.
5 Ol sidonlılardın' hayal qudayı Ashtartag'a ha'm ammonlardın' jerkenishli butı Milkomg'a* ere basladı.
6 Solay etip, Sulayman Jaratqan İyenin' na'zerinde jawız bolg'an islerdi isledi. Ol a'kesi Dawıtqa uqsamadı ha'm o'zin Jaratqan İyege tolıq bag'ıshlamadı.
7 Sulayman Erusalimnin' shıg'ısındag'ı bir to'bege moab xalqının' jerkenishli qudayı Kemoshqa ha'm ammon xalqının' jerkenishli qudayı Moloxqa arnap sıyınıw ornın qurdı.
8 Ol o'z qudaylarına arnap tu'tetki tu'tetip, qurbanlıqlar beretug'ın shet elli hayallarının' ha'mmesi ushın usılay isledi.
9 Jaratqan İyenin' Sulaymang'a g'a'zebi keldi. Sebebi ol İzraildın' Qudayı Jaratqan İyeden ju'z burg'an edi. Burın Jaratqan İye Sulaymang'a eki ret ko'rinip:
10 «Basqa qudaylardın' izine erme», – dep buyırg'an edi. Biraq Sulayman Jaratqan İyenin' buyrıg'ına boysınbadı.
11 Sonda Jaratqan İye Sulaymang'a bılay dedi: «Usılay etip, sen Menin' o'zin' menen du'zgen kelisimime ha'm Men buyırg'an qag'ıydalarıma boysınbag'anın' ushın, patshalıqtı sennen tartıp alıp, qulların'nın' birine beremen.
12 Biraq a'ken' Dawıttın' hu'rmeti ushın, Men bunı senin' da'wirin'de islemeymen. Al ulın'nın' qolınan patshalıqtı tartıp alaman.
13 Biraq ulın'nın' qolınan pu'tkil patshalıqtı tartıp almayman. Qulım Dawıttın' ha'm O'zim tan'lap alg'an qalam Erusalimnin' hu'rmeti ushın, ulın'a bir urıwdı qaldıraman».
14 Solay etip, Jaratqan İye Edom patshalarının' na'silinen bolg'an edomlı Hadadtı Sulaymang'a dushpan qılıp, og'an qarsı ko'terdi.
15 Dawıt edomlılar menen urıs alıp barg'anda, onın' sa'rka'rdası İoab o'lgenlerdi ko'miw ushın keldi ha'm Edomdag'ı erkeklerdin' ha'mmesin qırıp tasladı.
16 İoab ha'm pu'tkil izraillı a'skerler Edomdag'ı erkek zatının' ha'mmesin qırıp taslayman degenshe, sol jerde altı ay qalıp ketti.
17 Biraq sol waqıtta kishkene bala bolg'an Hadad a'kesine xızmet etken bazı edomlılar menen birge Mısırg'a qaray qashıp ketti.
18 Olar Midyannan shıg'ıp, Parang'a bardı ha'm ol jerden bazı paranlılardı qosıp alıp, Mısırg'a, faraong'a bardı. Faraon Hadadqa u'y ha'm jer berdi, onı azıq-awqat penen ta'miyinledi.
19 Hadad faraonnın' kewlinen shıqtı. Faraon Hadadtı o'z hayalının', xanbiyke Taxpenestin' sin'lisine u'ylendirdi.
20 Taxpenestin' sin'lisi Hadadqa Genubat atlı ul tuwıp berdi. Taxpenes Genubattı faraonnın' u'yinde o'sirdi. Ol faraonnın' balaları menen birge o'sti.
21 Hadad Mısırda waqtında Dawıttın' ha'm onın' sa'rka'rdası İoabtın' o'lgeni tuwralı esitti. Ol faraong'a: – Ruxsat bersen'iz, o'z elime qaytayın, – dedi.
22 Faraon og'an: – O'z elime ketemen deytug'ınday, bul jerde bir na'rseden kemshiligin' bar ma? – dep soradı. Hadad og'an juwap berip: – Hasla, biraq o'tinemen, qaytıwıma ruxsat berin', – dedi.
23 Quday ja'ne bir dushpandı, yag'nıy o'z hu'kimdarınan, Soba patshası Hadadezerden qashqan Elyada ulı Rezondı Sulaymang'a qarsı ko'terdi.
24 Dawıt sobalılardı qırıp taslag'annan son', Rezon janına qaraqshılardı toplap, olarg'a basshı bolg'an edi. Bul adamlar Damaskke ketip, sol jerde qalg'an ha'm Damaskte hu'kimdarlıqtı qolg'a kirgizgen edi.
25 Rezon da Sulaymannın' o'miri dawamında İzrailg'a dushpan bolıp keldi. Ol Aramda patshalıq etti ha'm Hadad islegen jamanlıqlarg'a qosa, ol da İzrailg'a jamanlıq islep keldi.
26 Ja'ne, Sulaymannın' xızmetkerlerinen biri Efrayım urıwınan seredalı Nabat ulı Yarobam patshag'a qarsı bas ko'terdi. Onın' anası Serua degen bir jesir hayal edi.
27 Yarobamnın' patshag'a qarsı shıg'ıwının' sebebi mınaw edi: Sulayman Millonı qurdırıp, a'kesi Dawıttın' qalasının' diywalındag'ı jarıqlardı pitetti.
28 Yarobam ma'rt adam edi. Sulayman bul jigittin' qa'biletli ekenin ko'rgende, onı Yusuptin' urıwınan alıng'an pu'tkil ma'rdikarshılar u'stinen baqlawshı etip qoydı.
29 Bir ku'ni Yarobam Erusalimnen sırtqa shıqqanda, shilolı payg'ambar Axiya onı jolda qarsı aldı. Axiyanın' u'stinde taza kiyim bar edi. Qala sırtındag'ı dalada olardan basqa hesh kim joq edi.
30 Axiya u'stindegi taza kiyimdi sheshti de, onı jırtıp, onı on eki bo'lekke bo'ldi.
31 Keyin Yarobamg'a: «On bo'legin o'zin'e al, sebebi İzraildın' Qudayı Jaratqan İye bılay deydi: „Men Sulaymannın' qolınan patshalıqtı tartıp alaman ha'm on urıwdı sag'an beremen.
32 Biraq qulım Dawıttın' hu'rmeti ha'm İzraildın' pu'tkil urıwları arasınan tan'lap alg'an qalam Erusalim ushın bir urıwdı og'an qaldıraman.
33 Sebebi Sulayman Mennen ju'z burıp, sidonlılardın' hayal qudayı Ashtartag'a, moablardın' qudayı Kemoshqa ha'm ammonlardın' qudayı Milkomg'a tabınıp ketti. Ol Menin' na'zerimde durıs bolg'an islerdi islep, qag'ıydalar ha'm nızamlarıma boysınıp jasag'an a'kesi Dawıtqa uqsamadı ha'm Menin' jollarımnan ju'rmedi.
34 Degen menen, buyrıqlarıma ha'm qag'ıydalarıma boysınıp jasag'an, tan'lap alg'an qulım Dawıttın' hu'rmeti ushın, pu'tkil patshalıqtı Sulaymannın' o'zinin' qolınan tartıp almayman. Onı o'mirinin' aqırına shekem hu'kimdar etip qoyaman.
35 Biraq patshalıqtı onın' ulının' qolınan tartıp alıp, on urıwdı Yarobam, sag'an beremen.
36 Al Menin' aldımda, atımnın' sol jerde bolıwı ushın O'zime tan'lap alg'an qalam Erusalimde qulım Dawıttın' shırag'ı ma'n'gige so'nip qalmawı ushın, Sulaymannın' ulına bir urıwdı beremen.
37 Sag'an kelsek, Men seni tan'lap alaman, sen kewlin' ku'segen na'rselerdin' ha'mmesinin' u'stinen biylik ju'rgizip, İzrailg'a patsha bolasan'.
38 Eger sen qulım Dawıt sıyaqlı aytqanlarımdı orınlap, qag'ıyda ha'm buyrıqlarıma boysınıp jasasan', na'zerimde tuwrı bolg'an islerdi islep, Menin' jollarım menen ju'rsen', onda Men senin' menen birge bolaman. Dawıtqa islegenim sıyaqlı, senin' ushın da bekkem bir urpaq – patshalar a'wladın jaratıp, İzraildı sag'an beremen.
39 Sulaymannın' gu'nası sebepli Dawıttın' urpag'ın jazalayman, biraq bunı ma'n'gige islemeymen“».
40 Sulayman Yarobamdı o'ltirmekshi boldı. Biraq Yarobam Mısırg'a, Mısır patshası Shishaqtın' janına qashıp ketip, Sulaymannın' o'limine shekem sol jerde jasadı.
41 Sulaymannın' patshalıg'ı da'wirindegi basqa waqıyalar, onın' barlıq isleri ha'm danalıqları Sulaymannın' isleri kitabında jazılg'an.
42 Sulayman qırıq jıl dawamında pu'tkil İzraildı Erusalimde turıp basqardı.
43 Sulayman o'lip, ata-babalarına qosıldı ha'm a'kesi Dawıttın' qalasına jerlendi. Onın' ornına ulı Rexabam patsha boldı.
