3 Patshalar 16 bob

İzrail patshası Ela(8-14),İzrail patshası Zimriy(15-20),İzrail patshası Omriy(21-28),İzrail patshası Axab(29-34).

¹ Jaratqan İyeden Xananiydin' ulı Ehug'a İzrail patshası Baasha haqqında mınaday so'z tu'sti:

² «Seni Men topıraqtan shıg'arıp alıp, xalqım İzrailg'a hu'kimdar etip qoydım. Biraq sen Yarobamnın' jolınan ju'rdin' ha'm xalqım İzraildı gu'nag'a baslap, olardın' gu'nası arqalı Menin' g'a'zebimdi keltirdin'.

³ Sonlıqtan Nabat ulı Yarobamnın' urpag'ına uqsatıp, senin' ha'm senin' urpag'ın'nın' ku'lin ko'kke suwıraman.

⁴ Senin' urpag'ın'nan qalada o'lgenleri iytlerge, dalada o'lgenleri ko'ktegi quslarg'a jem boladı».

⁵ Baashanın' basqa isleri, ol islegen ha'r bir na'rse, onın' qaharmanlıqları İzrail patshalarının' jılnama kitabında jazılg'an.

⁶ Baasha o'lip, ata-babalarına qosılg'anda, Tirsag'a jerlendi ha'm onın' ornına ulı Ela patsha boldı.

⁷ Baashag'a ha'm onın' urpag'ına qarsı aytılg'an Jaratqan İyenin' usı xabarı Xananiy ulı payg'ambar Ehu arqalı aytılg'an edi. Baasha Jaratqan İyenin' na'zerinde jawız bolg'an islerdi islep, Yarobamnın' xojalıg'ına eliklep g'ana qoymay, o'z gu'naları menen Onın' g'a'zebin oyatqanı ha'm Yarobamnın' pu'tkil a'wladların qırıp taslag'anı ushın usılar ju'zege keldi.

⁸ Yahuda patshası Asanın' patshalıg'ının' jigirma altınshı jılında Baasha ulı Ela Tirsada İzrailg'a patsha boldı ha'm ol eki jıl patshalıq etti.

⁹ Sawash arbalarının' yarımına basshılıq etetug'ın Zimriy degen bir xızmetshisi Elag'a qarsı til biriktirdi. Bir ku'ni Ela Tirsada saray basqarıwshısı Arsanın' u'yinde iship, ma's bolıp qaldı+.

¹⁰ Sonda Zimriy ishke kirip, Elanı o'ltirdi ha'm onın' ornına taxtqa otırdı. Bul waqıya Yahuda patshası Asanın' patshalıg'ının' jigirma jetinshi jılında boldı.

¹¹ Zimriy patsha bolıp taxtqa otırıwdan-aq, Baashanın' urpag'ın tolıg'ı menen qırıp tasladı. Onın' doslarınan da, tuwısqanlarınan da birde bir er adamdı tiri qaldırmadı.

¹² Jaratqan İyenin' payg'ambar Ehu arqalı Baashanın' xojalıg'ına qarsı aytqan so'zleri boyınsha, Zimriy Baashanın' urpag'ın pu'tkilley qırıp tasladı.

¹³ Bul waqıya Baasha ha'm onın' ulı Elanın' gu'naları ko'p bolıp, İzrail xalqın gu'nag'a batırg'anı, o'zlerinin' ma'nissiz butları menen İzraildın' Qudayı Jaratqan İyenin' g'a'zebin keltirgeni ushın ju'z bergen edi.

¹⁴ Elanın' basqa isleri, ol islegen ha'mme na'rse İzrail patshalarının' jılnama kitabında jazılg'an.

¹⁵ Yahuda patshası Asanın' patshalıg'ının' jigirma jetinshi jılında Zimriy Tirsada tek jeti ku'n-aq patshalıq etti. Sol waqıtları İzrail a'skerleri filistlerdin' Gibbeton qalasın qamal qılıp, ordada jatırg'an edi.

¹⁶ Ordadag'ı izraillılar Zimriydin' til biriktirip, patshanı o'ltirgenin esitti ha'm sol ku'ni-aq olar sa'rka'rda Omriydi İzrailg'a patsha etip ja'riyaladı.

¹⁷ Omriy ha'm onın' qasındag'ı pu'tkil izraillılar Gibbetonnan kelip, Tirsanı qamal qıldı.

¹⁸ Zimriy qalanın' qoldan ketkenin ko'rgende, patsha sarayının' qorg'anına kirip, sol jerge ot berdi ha'm o'zi de ottın' ishinde o'lip ketti.

¹⁹ Bul onın' Yarobamnın' gu'nalı jolınan ju'rip, İzraildı gu'nag'a baslag'anı ha'm Jaratqan İyenin' na'zerinde jawız bolg'an islerdi islegeni sebepli boldı.

²⁰ Zimriydin' basqa isleri, onın' patshag'a islegen qastıyanlıg'ı İzrail patshalarının' jılnama kitabında jazılg'an.

²¹ Bunnan son', İzrail xalqı ekige bo'lindi. Olardın' yarımı Ginat ulı Tibniydin', al yarımı Omriydin' patsha bolıwın qa'ledi.

²² Aqırında, Omriyge ergen xalıq Ginat ulı Tibniyge ergen xalıqtan u'stin keldi. Tibniy o'lip, Omriy patsha boldı.

²³ Yahuda patshası Asanın' patshalıg'ının' otız birinshi jılında Omriy İzrailg'a patsha boldı. Ol ha'mmesi bolıp on eki jıl patshalıq etip, sonın' da'slepki altı jılında Tirsada patshalıq etti.

²⁴ Omriy Shemer degen adamnan Samariya to'beshigin eki talant gu'miske satıp alıp, onın' u'stine qala qurdı. Qalanı to'beshiktin' burıng'ı iyesi Shemerdin' atı menen Samariya dep atadı.

²⁵ Omriy de Jaratqan İyenin' na'zerinde jawız bolg'an islerdi islep, o'zinen aldıng'ı barlıq patshalardan da jamanıraq jawızlıqlardı isledi.

²⁶ Ol tolıq Nabat ulı Yarobamnın' jolınan ju'rdi ha'm onın' İzraildı baslag'an gu'nalarına qosılıp, o'zlerinin' ma'nissiz butları menen İzraildın' Qudayı Jaratqan İyenin' g'a'zebin keltirdi.

²⁷ Omriydin' basqa isleri ha'm onın' ko'rsetken erlikleri İzrail patshalarının' jılnama kitabında jazılg'an.

²⁸ Omriy o'lip, ata-babalarına qosılg'anda, Samariyag'a jerlendi ha'm onın' ornına ulı Axab patsha boldı.

²⁹ Yahuda patshası Asanın' patshalıg'ının' otız segizinshi jılında Omriy ulı Axab İzrailg'a patsha boldı ha'm Samariyada jigirma eki jıl patshalıq etti.

³⁰ Omriy ulı Axab Jaratqan İyenin' na'zerinde jaman bolg'an islerdi isledi. Onın' bul isleri o'zinen burın bolg'an patshalardın' ha'mmesinikinen de asıp tu'sti.

³¹ Og'an Nabat ulı Yarobamnın' gu'nalarına sherik bolıw az bolg'anday, Sidon patshası Etbaaldın' qızı İzabelge u'ylendi ha'm Baalg'a xızmet etip, og'an tabına basladı.

³² Ol Samariyada Baalg'a arnap qurdırg'an butxanasının' ishine Baal ushın qurbanlıq orın da qurdı.

³³ Bunın' u'stine, ol kiyeli ag'ashın da isletti. Axab o'zinen burın o'tken İzrail patshalarının' barlıg'ınan da artıg'ıraq gu'na islep, İzraildın' Qudayı Jaratqan İyenin' qattı g'a'zebin keltirdi.

³⁴ Axab patshalıq etken da'wirde, beyt-elli Xiel Erixo qalasın qayta qurdı. Jaratqan İyenin' Nun ulı Eshua arqalı aldın ala aytqanınday, Xiel qalanın' tiykarın salg'anda, o'zinin' tun'g'ısh ulı Abiramnan, al qalanın' da'rwazasın qoyg'anda, genje ulı Segubtan ayırıldı.