3 Patshalar 17 bob
1 Giladtın' Tishbe qalasınan bolg'an İliyas Axabqa: «Men xızmet etetug'ın İzraildın' Qudayı, tiri Jaratqan İye haqı ant ishemen: men aytpag'anımsha, kelesi jılları jawın da jawmaydı, shıq ta tu'speydi», – dedi.
2 Sol waqıtta Jaratqan İyeden İliyasqa mınaday so'z tu'sti:
3 «Bul jerden ketip, shıg'ıs ta'repke qaray ju'r ha'm İordan da'ryasının' shıg'ısındag'ı Kerit sayının' boyına jasırın.
4 Sen sol saydan suw ishesen', sol jerde seni bag'ıwdı g'arg'alarg'a buyırdım».
5 İliyas Jaratqan İyenin' so'zine boysınıp, İordan da'ryasının' shıg'ısındag'ı Kerit sayının' boyına bardı ha'm sol jerde qaldı.
6 G'arg'alar ha'r ku'ni azanda ha'm keshte og'an nan menen go'sh a'kelip turdı, ol suwdı saydan ishti.
7 Biraq bir qansha waqıt o'tkennen keyin, jerge jawın jawmag'anlıqtan, say da qurıp qaldı.
8 Sol waqıtta İliyasqa Jaratqan İyeden mınaday so'z tu'sti:
9 «Endi Sidong'a jaqın jerdegi Sarafat qalasına barıp, sol jerde qal. Sol jerde jasaytug'ın bir jesir hayalg'a seni bag'ıwdı buyırdım».
10 İliyas Sarafatqa ketti. Ol qala da'rwazasına jaqınlag'anda, sol jerde otın jıynap ju'rgen bir jesir hayalg'a ko'zi tu'sti. Ol hayalg'a: – Mag'an ishiw ushın bir sarqum suw beresen' be? – dedi.
11 Hayal suw a'keliw ushın ketip baratırg'anda, İliyas onın' izinen: – İltimas, mag'an shappattay nan da ala kel, – dep baqırdı.
12 Hayal og'an: – Sizin' Qudayın'ız, tiri Jaratqan İye haqı ant ishemen: jeytug'ın hesh na'rsem joq. Tek ıdıstag'ı bir uwıs un menen gu'zede azg'antay may g'ana bar. Mine, eki qısım otın teremen de, barıp sol unnan ulım menen o'zime bir na'rse pisiremen. Usı son'g'ı asımızdı jep bolıp, o'lip ketemiz, – dedi.
13 İliyas hayalg'a bılay dedi: – Qorqpa, barıp aytqanın'dı pisir. Biraq da'slep bir kishkene sho'rek jawıp, mag'an a'kelip ber. Al o'zin' ha'm ulın' ushın keyin jabasan'.
14 Sebebi İzraildın' Qudayı Jaratqan İye bılay deydi: «Jaratqan İye jerge jawın jibergenshe, ıdıstag'ı un da, gu'zedegi may da tawısılmaydı».
15 Hayal barıp, İliyastın' aytqanların isledi. Hayal, onın' xojalıg'ı ha'm İliyas uzaq waqıt azıq-awqattan tarıqpadı.
16 Jaratqan İyenin' İliyas arqalı aytqan so'zi boyınsha, ıdıstag'ı un da, gu'zedegi may da tawısılmadı.
17 Aradan biraz waqıt o'tkennen son', u'y iyesi bolg'an jesir hayaldın' balası nawqaslanıp qaldı. Onın' nawqası ju'da' awır bolıp, aqırında demi tawısıldı.
18 Sonda hayal İliyasqa: – Ha'y, Qudaydın' adamı, men sizge ne qılıp edim? Siz mag'an gu'nalarımdı esletiw ha'm ulımdı o'ltiriw ushın kelip pe edin'iz? – dedi.
19 İliyas hayalg'a: – Balan'dı mag'an ber, – dedi de, balanı hayaldın' qolınan alıp, onı o'zi jasaytug'ın joqarg'ı bo'lmege alıp shıqtı ha'm o'z to'segine jatqardı.
20 Son'ınan Jaratqan İyege jalbarınıp bılay dedi: «Qudayım Jaratqan İye, nege Sen u'yinen mag'an pana bergen jesir hayaldın' balasın o'ltirip, og'an jamanlıq isledin'?»
21 Keyin İliyas u'sh ret balanın' u'stine o'zin taslap, Jaratqan İyege: «Qudayım Jaratqan İye, bul balag'a qaytadan jan bere go'r», – dep jalbarındı.
22 Keyin İliyas u'sh ret balanın' u'stine o'zin taslap, Jaratqan İyege: «Qudayım Jaratqan İye, bul balag'a qaytadan jan bere go'r», – dep jalbarındı+. 2
23 liyas balanı joqarg'ı bo'lmeden alıp tu'sip, anasına berip atırıp: – Qara, balan' tiri, – dedi.
24 Sonda hayal İliyasqa: – Endi bildim, siz Qudaydın' adamısız ha'm siz arqalı aytqan Jaratqan İyenin' so'zi haq, – dedi.
