3 Patshalar 3 bob
1 Sulayman Mısır faraonının' qızlarının' birine u'ylenip, faraon menen baylanıs du'zdi. Ol hayalın Dawıttın' qalasına alıp keldi. Sulayman o'z sarayın, Jaratqan İyenin' İbadatxanasın ha'm Erusalimnin' a'tirapındag'ı diywallardı tiklegenshe, hayalı sol jerde jasadı.
2 Xalıq ele sıyınıw orınlarında qurbanlıqlar beretug'ın edi. Sebebi sol waqıtqa shekem Jaratqan İyenin' atına arnap İbadatxana qurılmag'an edi.
3 Sulayman a'kesi Dawıttın' ko'rsetpeleri menen ju'rip, Jaratqan İyeni su'yetug'ın edi. Degen menen, ol da sıyınıw orınlarında qurbanlıqlar berip, tu'tetkiler tu'tetetug'ın edi.
4 Patsha qurbanlıq beriw ushın Gibon qalasına ketti, sebebi sıyınıw ornının' en' baslısı sol jerde edi. Sulayman sol qurbanlıq orında mın' bas maldı jandırılatug'ın qurbanlıqqa berdi.
5 Gibonda bolg'anda, Sulayman tu'nde tu's ko'rdi. Tu'sinde Jaratqan İye og'an ko'rinip: – Tile tilegin'di, sorag'anın'dı beremen, – dedi.
6 Sulayman Og'an bılay dedi: – Sen qulın' bolg'an a'kem Dawıtqa u'lken jaqsılıq isledin'. Sebebi ol haq ha'm Sag'an sadıq bolıp, Senin' aldın'da shın ju'rekten tuwrı islerdi islep ju'rdi. Sen bu'gin og'an taxtına otıratug'ın bir ul inam etip, og'an u'lken jaqsılıq islewdi dawam ettin'.
7 O Qudayım, Jaratqan İye, Sen O'z qulın'dı a'kem Dawıttın' ornına patsha etip qoydın'. Biraq men ele ju'da' jaspan, basqarıwg'a ele ta'jiriybem joq.
8 Qulın' O'zin' tan'lag'an xalıqtın', ko'pliginen sanap shıg'ıw mu'mkin bolmag'an ullı xalıqtın' ortasında tur.
9 onlıqtan jaman menen jaqsını ayırıp bilip, xalqın'a biylik etiwim ushın, mag'an aqılg'a tolı bir ju'rek ber. Bolmasa, Senin' bul ullı xalqın'dı kim basqara aladı?
10 Sulaymannın' bul tilegine Jaratqan İyenin' kewli toldı.
11 Quday Sulaymang'a bılay dedi: – Sen o'zin' ushın uzaq o'mir, baylıq ha'm dushpanların'nın' o'limin tilemedin', al durıs hu'kim ju'rgiziw ushın danalıq soradın'.
12 Men senin' tilegin'di orınlayman. Sag'an danalıqqa ha'm aqılg'a tolı ju'rek beremen. Sag'an uqsag'anı sennen burın bolmag'an ha'm sennen keyin de bolmaydı.
13 Sag'an soramag'anların'dı da: baylıq ha'm dan'qtı da beremen. O'mirin' boyı patshalar arasında sag'an ten' keletug'ını bolmaydı.
14 Eger sen de a'ken' Dawıt sıyaqlı qag'ıydalarıma ha'm buyrıqlarıma boysınıp, Menin' jollarım menen ju'rsen', sag'an uzaq o'mir de beremen.
15 Sulayman oyang'anda, bunın' tu'si ekenin an'ladı. Son'ınan Erusalimge keldi. Ol Jaratqan İyenin' Kelisim sandıg'ının' aldında turıp, jandırılatug'ın qurbanlıqlar ha'm tatıwlıq qurbanlıqların berdi. Ol pu'tkil xızmetshileri ushın u'lken zıyapat berdi.
16 Bir ku'ni eki buzıq hayal patshanın' aldına keldi.
17 Hayallardın' biri patshag'a bılay dedi: «Taqsır! Men mına hayal menen bir u'yde jasayman. Bizler birge qalg'an waqıtta, men bosandım.
18 Men bosang'annan keyin, u'shinshi ku'ni mına hayal da bosandı. Bizler birge edik, u'yde ekewimizden basqa hesh kim joq edi.
19 Tu'nde mına hayal balasın astına basıp alıp, bala o'lip qaldı.
20 Qulın'ız bolg'an men uyıqlap atırg'anımda, tu'n ortasında ol ornınan turıp, menin' balamdı janımnan alıp, o'zinin' qoynına jatqarıptı. Al o'zinin' o'lip qalg'an balasın bolsa, menin' qoynıma salıptı.
21 Tan'da balamdı emiziw ushın turg'anımda, ol jansız jatırg'an eken. Biraq azanda dıqqat penen qarag'anımda, onın' menin' balam emes ekenin bildim».
22 Ekinshi hayal: «Yaq, tiri bala meniki, o'lgeni seniki», – dedi. Birinshi hayal: «Yaq, o'lgen bala seniki, al tirisi meniki», – dedi. Olar patshanın' aldında usılay tartısıp turdı.
23 Sonda patsha: «Birewin'iz: „Tiri bala meniki, al o'lgeni seniki“, – deysiz. Ekinshin'iz: „O'lgen bala seniki, al tirisi meniki“, – deysiz.
24 Onda mag'an bir qılısh a'kelin'ler!», – dedi. Qılısh alıp kelingende,
25 patsha: «Tiri balanı ekige bo'lip, yarımın birewine, qalg'an yarımın ekinshisine berin'ler», – dep buyırdı.
26 Sonda balasına janı ashıp, ju'regi sızlag'an tiri balanın' anası patshag'a: «Taqsır, o'tinemen, tiri balanı o'ltirmen', onı mına hayalg'a berin'», – dedi. Al ekinshi hayal bolsa: «Bala sag'an da, mag'an da joq, onı ekige bo'lin'», – dedi.
27 Sonda patsha juwap berip: «Toqtan'lar, balanı o'ltirmen'ler! Onı birinshi hayalg'a berin'ler. Balanın' anası – sol boladı», – dedi.
28 Pu'tkil izraillılar patsha shıg'arg'an bul hu'kimdi esitip, patshanı hu'rmet etetug'ın boldı. Sebebi olar Sulaymanda a'dil hu'kim shıg'arıw ushın, Qudaydan berilgen danalıq bar ekenin bildi.
