3 Patshalar 4 bob
1 Sulayman pu'tkil İzraildın' patshası edi.
2 Onın' qol astındag'ı ha'meldarları mınalar edi: Sadoq ulı Azariya – ruwxaniy;
3 Shishanın' ulları Elixoref penen Axiya – xatkerler; Axilud ulı Ehoshafat – jılnamashı;
4 Ehoyada ulı Benaya – sa'rka'rda; Sadoq ha'm Abiyatar – ruwxaniyler;
5 Natan ulı Azariya – u'lke ha'kimlerinin' baslıg'ı; Natan ulı Zabud – ruwxaniy ha'm patshanın' ma'sla'ha'tshisi;
6 Axishar – saray basqarıwshısı; Abda ulı Adoniram – ma'rdikarg'a alıng'anlar u'stinen juwapker.
7 Sulaymannın' pu'tkil İzrail u'lkelerin basqaratug'ın on eki ha'kimi bar edi. Olar patshanı ha'm onın' u'y-ishin azıq-awqat penen ta'miyinlep turatug'ın bolıp, olardın' ha'r biri jılına bir ay patshanı ha'm onın' u'yishin azıq-awqat penen ta'miyinlewi sha'rt edi.
8 Olardın' atları mınalar: Efrayımnın' tawlı u'lkesinin' ha'kimi Ben-Xur;
9 Maqas, Shaalbim, Beyt-Shemesh, Elon-Beyt-Xanan qalalarının' ha'kimi Ben-Deker;
10 Soxo ha'm pu'tkil Xefer jerlerin o'z ishine alg'an Arubbot u'lkesinin' ha'kimi Ben-Xesed;
11 Pu'tkil Nafat-Dor u'lkesinin' ha'kimi Sulaymannın' qızı Tafattın' ku'yewi Ben-Abinadab;
12 Taanax, Megiddo, İzreeldin' qublasındag'ı Saretannın' janındag'ı pu'tkil Beyt-Shean ha'm Beyt-Sheannan Abel-Mexola menen İoqmeamnın' arg'ı jag'ına deyin sozılıp jatırg'an u'lkelerdin' ha'kimi Axilud ulı Baana.
13 Giladtag'ı Menashshe urpag'ınan bolg'an Yairge tiyisli qalalardı ha'm Bashandag'ı Argob do'geregindegi diywallar menen qorshalıp, da'rwazasına qola ta'mbi basılg'an u'lken alpıs qalanı o'z ishine alg'an Gilad jerindegi Ramot qalasının' ha'kimi Ben-Geber;
14 Maxanayım u'lkesinin' ha'kimi İddo ulı Axinadab;
15 Naftaliy u'lkesinin' ha'kimi Sulaymannın' qızı Basemattın' ku'yewi Aximaas;
16 Asher ha'm Bealot u'lkelerinin' ha'kimi Xushay ulı Baana;
17 İssaxar u'lkesinin' ha'kimi Paruax ulı Ehoshafat;
18 Benyamin u'lkesinin' ha'kimi Ela ulı Shimey;
19 Gilad jerinin', yag'nıy amorlardın' patshası Sixon ha'm Bashan patshası Ogtın' eski jerlerinin' ha'kimi Uriy ulı Geber. Ol sol u'lkenin' jalg'ız ha'kimi edi.
20 Yahuda ha'm İzrail xalqı ten'izdin' qumınday ko'p bolıp, olar jepiship shadlıq ishinde jasadı.
21 Sulayman Evfrat da'ryasınan filistlerdin' jerine ha'm Mısır shegaralarına shekemgi barlıq patshalıqlar u'stinen hu'kimdarlıq etti. Olar Sulaymannın' o'miri dawamında og'an salıq to'lep, xızmet etti.
22 Sulaymannın' sarayının' bir ku'nlik azıq-awqatı otız kor sıpatlı biyday unı, alpıs kor iri tartılg'an biyday unı,
23 semirtilgen on bug'a, jaylawdan alıng'an jigirma bug'a, ju'z qoy, ja'ne de, suwınlar, jeyranlar, antilopalar ha'm semiz quslardan ibarat edi.
24 Sulayman Tifsaxtan Gazag'a shekemgi, Evfrat da'ryasının' batısındag'ı pu'tkil patshalıqlar u'stinen hu'kimdarlıq etti. Ol a'tiraptag'ı barlıq eller menen tınıshlıqta jasadı.
25 Sulaymannın' da'wirinde Dannan Beer-Shebag'a shekemgi Yahuda ha'm İzrail xalqının' ha'r biri o'zlerinin' a'njir ha'm ju'zim ag'ashları astında tınısh o'mir su'rdi.
26 Sulaymannın' sawash arbaları ushın qırıq mın' at qorası ha'm on eki mın' atı bar edi.
27 Sol on eki ha'kimnin' ha'r biri o'zi ushın belgilengen bir ay dawamında patsha Sulaymandı ha'm onın' dasturxanınan awqat jeytug'ınlardın' ha'mmesin azıq-awqat penen ta'miyinleytug'ın edi. Olar birde bir kemshilikke jol qoymaytug'ın edi.
28 Ha'r bir ha'kim belgilengen jerge sawash arbalarının' atları ha'm shapqır atlar ushın arpa menen saban jetkizip turatug'ın edi.
29 Quday Sulaymang'a mol danalıq, aqıl ha'm ten'iz jag'asındag'ı qum sıyaqlı sheksiz teren' tu'siniwshilik berdi.
30 Sulaymannın' danalıg'ı pu'tkil shıg'ıs xalıqlarının' danalıg'ınan ha'm Mısırdın' pu'tkil danalıg'ınan da u'stin edi.
31 Ol barlıq adamlardan o'tken dana bolıp, ezraxlı Etannan, Maxoldın' ulları Heman, Kalkol ha'm Dardadan da dana edi. Onın' dan'qı a'tiraptag'ı pu'tkil xalıqlarg'a jayıldı.
32 Ol u'sh mın' naqıl-maqal ayttı ha'm onın' bir mın' bes qosıg'ı bar edi.
33 Sulayman Lebanon tawlarındag'ı kedr ag'ashınan baslap, diywalda o'sip turatug'ın mayoran sho'bine shekem so'z etti. Ol haywanatlar, quslar, jer bawırlawshılar ha'm balıqlar tuwralı da ayttı
34 Ha'mme xalıqlardan adamlar kelip, Sulaymannın' dana so'zlerin tın'laytug'ın edi. Olar Sulaymannın' danalıg'ı tuwralı esitken du'nyanın' barlıq patshalarınan jiberilgen edi.
